1 SAMUELE 17

₁Bafilesita ba khōbōkanya mabōtho a bona hore a ee ntoeng; ba a khōbōkanya Soko e naheng ea Juda. Ba hloma pakeng tsa Soko le Aseka e naheng ea Efese-Damime. ₂Bo-Saule le banna ba Iseraele le bona ba khōbōkana, ba hloma ka khohlong ea Ela, 'me ba thea thekō ea ntoa ho loantša Bafilesita. ₃Bafilesita ba ne ba eme holim'a thaba, ka lehlakoreng lane, Baiseraele le bona ba eme holim'a thaba, ka lehlakoreng lena, khohlo e le pakeng tsa bona.

₄Liahelong tsa Bafilesita ha tsoa seqhobanehali. Lebitso la sona e ne e le Goliate, a e-tsoa Gate. Bolelele ba sona e ne e batla e le limethara tse tharo. ₅Hloohong se ne se roetse katiba ea lethose, se apere baki e entsoeng ka lipapetloa tsa lethose, tse rokahantsoeng, 'me boima ba baki eo ea sona e le likilo tse ka bang mashome a mahlano a metso e supileng. ₆Litlhafung se ne se roetse likhohlopo tsa lethose, lehetleng se jere mophekapheka oa lerumo la lethose. ₇Thekō ea lerumo la sona e ne e le kalo ka mofeng oa mochine o ohlang, hlooho ea lerumo leo e le boima ba likilo tse supileng. Mojari oa thebe ea sona o ne a sa eteletse pele.

₈Goliate a ema, a hōoeletsa mabōtho a Baiseraele, a re: “Ke ka baka la'ng ha le futuha ka mabōtho? 'Na ke Mofilesita, lōna le makhoba a Saule! Khethang monna har'a lōna mono, a theohele ho 'na mona! ₉Haeba monna eo a ka ntoantša, a mpolaea, rōna re tla ba makhoba a lōna, empa haeba nka mo hlōla, ka 'molaea, lōna le tla ba makhoba a rōna, le re sebeletse!” ₁₀Mofilesita eo a boela a re: “Kajeno ke phephetsa mabōtho a Baiseraele. Mpheng monna, re tl'o loana!” ₁₁Ha Saule le Baiseraele bohle ba utloa mantsoe a Mofilesita eo, ba tšoha, ba tšaba haholo.

₁₂Davida e ne e le mora oa Moeferata o Betlelehema e Juda, eo lebitso la hae e neng e le Jese, ea neng a e-na le bara ba robeli. Mehleng ea Saule, Jese o ne a se a tsofetse, e le e mong oa maqheku. ₁₃Bara ba Jese ba baholo, ba bararo, ba ne ba ile ntoeng le Saule. Mabitso a bara bao ba hae ba bararo, ba neng ba ile ntoeng, e ne e le Eliabe, letsibolo la hae, le Abinadabe ea mo hlahlamang, le Shamma, oa boraro. ₁₄Davida e ne e le eena oa ho fela. Baholoane ba hae ba bararo ba ne ba ile ntoeng le Saule. ₁₅Davida o ne a ee a etele Saule, 'me a boele a khutlele Betlelehema ho ea alosa linku tsa ntat'ae.

₁₆Mofilesita eo o ne a ee a tle hoseng ho hong le ho hong, le mantsiboea a mang le a mang, a 'ne a sasanke, 'me hona a ho etsa ka matsatsi a mashome a mane.

₁₇Eaba Jese o re ho Davida, mora oa hae: “Nka likilo tse leshome tsa koro e halikiloeng, le linkhoa tse leshome, u phakise u li ise liahelong, ho bana beno. ₁₈Lireleli tsena tse leshome u li ise ho molaoli oa ba sekete. U botse bana beno hore na ba ntse ba phela joang, u be u ntlele le se pakang hore ba ntse ba phela hantle. ₁₉Saule, le bana beno, le bana bohle ba Baiseraele, ba ntse ba loana le Bafilesita ka khohlong ea Ela.”

₂₀Davida a tsoha e sa le ka malungoalungoana; a siea linku le molisana e mong; a nka lijo, a tsamaea joalokaha Jese a ne a mo laetse. A fihla liahelong tsa Baiseraele ka nako eo lebōtho le neng le e-tsoa, le e-ea lebaleng la ntoa. Lebōtho le ne le ntse le hlaba mokhosi oa ntoa. ₂₁Baiseraele le Bafilesita ba thea thekō ea ntoa, mabōtho a tjamelana. ₂₂Davida a siea thōtō ea hae matsohong a molebeli, a mathela thekōng ea ntoa. Ha a fihla teng a lumelisa bana babo, a ba botsa bophelo. ₂₃Eare a sa ntsane a bua le bona, a bona seqhobanehali se se se e-tla. Lebitso la sona e ne e le Goliate oa Mofilesita oa Gate, a e-tsoa mabōthong a Bafilesita. O ne a ntse a pheta mantsoe ao a 'nileng a a bua pele ho mona. Davida a utloa mantsoe ao.

₂₄Eare ha banna bohle ba Baiseraele ba bona monna eo, ba 'maleha, 'me ba kenoa ke tšabo e kholo. ₂₅Joale banna ba Baiseraele ba re: “Na le bona monna eo ea nyolohelang koano? Ruri o nyolohela ho tla tlaka Baiseraele. Khosi e tla putsa monna ea ka 'molaeang, e mo nee leruo le lengata. E tla mo nea le morali oa eona, e be e ntše lelapa labo monna eo lekhethong le tlamang Baiseraele.”

₂₆Davida a bua ho banna ba neng ba eme pel'a hae, a re: “Monna ea ka bolaeang Mofilesita eo, 'me a tlosa sekhobo har'a Baiseraele, o tla putsoa ka'ng? Mofilesita eo oa leqai eena ke mang, a ka tlakang mabōtho a Molimo ea phelang?”

₂₇Banna ba mo araba ka ho pheta mantsoe ao hape, ba re: “Ho tla etsoa joalo ho monna ea ka bolaeang Mofilesita eo.”

₂₈Eliabe, moholoane oa hae, o ne a ntse a utloa ha Davida a bua le banna bao. Bohale ba hae ba tlōkōmela Davida, 'me a re: “U tlisitsoe ke'ng moo? Mohlatsoana ola oa linku u o siile le mang, koa lehoatateng? Ke tseba boikakaso ba hao, le pelo ea hao e mpe! U tlile koano feela hore u tl'o shebella ntoa!”

₂₉Davida a re: “Ke entse'ng joale? Na ha kea tšoanela ho botsa?” ₃₀Davida a furalla Eliabe, a talima ka ho e mong. A 'motsa eona potso eo a e botsitseng. Banna bao ba 'na ba mo araba joaloka pele.

₃₁Ha batho ba utloa mantsoe a Davida ba tsebisa Saule, 'me eena a re Davida a bitsoe.

₃₂Davida a re ho Saule: “Ho se be le ea mong ea nyahamang pelo ka baka la Mofilesita enoa. 'Na, mohlanka oa hao, ke tla ea, ke e'o loantša Mofilesita enoa!”

₃₃Empa Saule a re ho Davida: “U ke ke ua ba ua loantša Mofilesita eo, hobane u sa le moshanyana. Eena haesale e le mohlabani ho tloha bocheng ba hae.”

₃₄Eaba Davida o re ho Saule: “Mohlanka oa hao o alosa linku tsa ntat'ae. Ha tau kapa bèrè e hlaha, 'me e hlasinya konyana kahar'a mohlape, ₃₅ke ee ke e lelekise, ke e otle, ke pholose konyana e molomong oa eona. Ha tau eo, kapa bère eo, e ntoantša, ke ee ke e tšoare ka litlena, ke e khakhathe, ke e bolaee. ₃₆Mohlanka oa hao o se a ile a bolaea tau le bèrè. Mofilesita enoa oa leqai o tla shoa joaloka e 'ngoe ea tsona, hobane o tlakile mabōtho a Molimo ea phelang.” ₃₇Davida a boela a re: “Morena ea 'namoletseng marōng a tau, le marōng a bèrè, o tla 'namolela matsohong a Mofilesita enoa.”

Eaba Saule o re ho Davida: “Tsamaea, Morena o tla ba le uena!”

₃₈Saule a apesa Davida seaparo sa hae sa ntoa, a mo roesa katiba e entsoeng ka lethose, a nt'o mo apesa baki e entsoeng ka tšepe. ₃₉Davida a tlamella sabole ea Saule holim'a seaparo sa hae. A leka ho tsamaea, empa a hlōleha, hobane o ne a sa tloaela liaparo tsena. Davida re ho Saule: “Ke sitoa ho tsamaea ka liaparo tsena, hobane ha kea li tloaela.” Eaba Davida oa li hlōbōla. ₄₀A nka molamu oa hae, a khetha majoe a mahlano a boreleli ka nōkaneng, a a kenya ka pataneng ea hae, e leng kotla ea hae, letjeketjane le le ka letsohong la hae, a nt'o atamela ho Mofilesita.

₄₁Mofilesita a 'na a atamela ho Davida, mojari oa thèbè ea hae a mo eteletse pele. ₄₂Ha Mofilesita a ntse a qamaka, a bona Davida, 'me a mo halala, hobane Davida e ne e le moshanyana, a le mosehla, sebōpeho sa hae se khahleha. ₄₃Mofilesita a re ho Davida: “Na 'na ke ntja, ha u ntlela ka molangoana tjee?” Mofilesita a rōhaka Davida ka molimo oa hae, ₄₄a re ho Davida: “Tloo koano, ke tsoe ke fepa linonyana tsa leholimo le libatana tsa naha ka nama ea hao!”

₄₅Eaba Davida o re ho Mofilesita: “U ntlela ka sabole, le ka lerungoana, le ka mophekapheka oa lerumo, empa 'na ke tla ka lebitso la Morena oa mabōtho, Molimo oa mara a Iseraele, ao u ntseng u a tlaka. ₄₆Kajeno lena Molimo o tla neelana ka uena matsohong a ka; ke tla u bolaea, ke be ke u khaole hlooho! Ka litōpō tsa mabōtho a Bafilesita ke tla fepa linonyana tsa leholimo, le libatana tsa naha, e le hore lefatše lohle le tle le tsebe hore Molimo o teng Iseraeleng. ₄₇Le letšoele lena lohle le tle le tsebe hore Morena ha a pholose ka sabole le lerumo feela, hobane ntoa ena ke ea Morena, 'me o tla neelana ka lōna matsohong a rōna.”

₄₈Eitse ha Mofilesita a ema, a e-tla, 'me a atamela ho Davida, Davida a phakisa a mathela thekōng ea ntoa, ho ea khahlanyetsa Mofilesita eo. ₄₉Davida a kenya letsoho la hae ka kotleng ea hae, a ntša lejoe, a le betsa ka letjeketjane, la bata Mofilesita phatleng. Lejoe leo la fohlotsa phatla ea Mofilesita, 'me Mofilesita a re ka sefahleho fatše polopoqo!

₅₀Davida a hlōla Mofilesita ka letjeketjane le ka lejoe. A bata Mofilesita, a 'molaea, empa Davida a ne a sa nka sabole.

₅₁Eaba Davida o mathela ho Mofilesita, o fihla a mo okamela, a tsomula sabole ea Goliate selateng sa eona, a 'molaea ka ho mo khaola hlooho ka sabole eo.

Ha Bafilesita ba bona hore senatla sa bona se shoele, ba phasaphasa. ₅₂Joale banna ba Iseraele le banna ba morabe oa Juda ba raoha, ba hlaba mokhosi, ba phalalisa Bafilesita ho ea fihla Gate le likhorong tsa Ekerone. Mahlatsipa a Bafilesita ba oeleng a etsa mohoula ho tloha Shaaraime, ho ea fihla Gate, le ho ea fihla Ekerone. ₅₃Ha bana ba Iseraele ba khutla ho tsoa phalalisa Bafilesita, ba fihla ba hapa tse ka liahelong tsa Bafilesita. ₅₄Davida a nka hlooho ea Mofilesita, a e isa Jerusalema, empa lihlomo tsa Mofilesita tsona a li bea ka tenteng ea hae.

₅₅E ne e ile eare ha Saule a bona Davida a e-tsoa ho ea loana le Mofilesita, a re ho Abinere, molaoli oa lebōtho: “Abinere, moshanyana eo ke mora oa mang?”

Abinere a re: “Ke hlapanya ka khosi ea ka e phelang: Ha ke tsebe!”

₅₆Khosi ea re: “Tsamaea u e'o botsa hore na moshanyana eno ke mora oa mang.”

₅₇Ha Davida a khutla ho tsoa bolaea Mofilesita, Abinere a mo nka, a mo hlahisa kapele ho Saule, Davida a ntse a nkile hlooho ea Mofilesita ka matsoho.

₅₈Saule a re ho Davida: “U mora oa mang, uena mohlankana?”

Davida a re: “Ke mora oa Jese, mohlanka oa hao oa Betlelehema.”