2 LIKETSAHALO 13

₁Ka selemo sa leshome le metso e robeli sa puso ea khosi Jeroboame, Abiea a qala ho busa naha ea Juda. ₂O ile a busa ka lilemo tse tharo, a le Jerusalema. Lebitso la 'm'ae e ne e le 'Mikiea, morali oa Uriele, oa motse oa Gibea.

Ntoa ea qhōma pakeng tsa Abiea le Jeroboame. ₃Abiea a thèa thekō ea ntoa ka mokhetho oa bahale ba likete tse makholo a mane. Jeroboame le eena a thèa thekō ea ntoa ka mokhetho oa bohale ba likete tse makholo a robeli.

₄Abiea a ema holim'a thaba ea Semaraime, e naheng e maralla ea Efraime, a hōoeletsa, a re: “Uena Jeroboame, le lōna Baiseraele bohle, 'mameleng! ₅Na ha le tsebe hore Morena Molimo oa Iseraele, o neile Davida puso ea Iseraele eohle, kamehla eohle? O mo neile eona le litlōhōlō tsa hae, ka selekane sa mehla eohle? ₆Empa joale Jeroboame, mora oa Nebate, mohlanka oa Solomone, mora oa Davida, o tsohetse mong'a hae matla, o mo fetohetse. ₇Banna ba litlōkōtsebe, ba baikaketsi, ba bōkanetse Jeroboame, 'me Jeroboame o fetohetse Rehoboame, mora oa Solomone, ea ntseng a tètèma, ea sitoang ho itoanela.

₈“Joale lōna le ikemiselitse ho loantša puso ea Morena e matsohong a litlōhōlō tsa Davida, hobane le le letšoelehali, le bile le e-na le manamane a khauta, ao Jeroboame a le etselitseng 'ona, hore e be melimo ea lōna ea bohata. ₉Na hase lōna ba lelekileng baprista ba Morena, e leng bara ba Arone, le Balevi, 'me la itlhomamisetsa baprista, ho latela mekhoa ea lichaba tsa linaha tse ling? E mong le e mong ea tlang a qhōba pohoana le lipheleu tse supileng, le mo etsa moprista oa melimo eo ea bohata.

₁₀“Empa ha e le rōna, Morena ke Molimo a rōna, 'me ha rea mo furalla. Baprista ba sebeletsang Morena ke bara ba Arone, 'me ba thusoa ke Balevi tšebeletsong ea bona. ₁₁Hoseng ho hong le ho hong, le ka phirimana e 'ngoe le e 'ngoe, ba nyehella Morena ka linyehelo tsa secheso, le ka mokubetso o monko o monate. Ba bile ba bea bohobe bo halalelang holim'a tafole e hloekileng; ba bonesa le mabone a holim'a liluloana tsa khauta, hore a tuke ka phirimana e 'ngoe le e 'ngoe, hobane re bōlōka taelo ea Morena Molimo oa rōna, empa lōna le mo furaletse. ₁₂Bonang mona! Molimo o na le rōna; ke eena molaoli oa rōna. Baprista ba hae ba tla re hlabela mokhosi ka literompeta, hore re futuhe. Oho, bana ba Iseraele, se loantšeng Morena Molimo oa bo-ntat'a lōna, hobane ha le ka ke la atleha.”

₁₃Jeroboame a rōmela bahlabani ba bang hore ba e'o ba lalla kamorao; kahoo mabōtho a hae a ne a le kapele ho mabōtho a naha ea Juda, 'me ba laletseng ba le kamorao ho 'ona. ₁₄Ha bahlabani ba naha ea Juda ba hetla, ba bona hore ba futuheloa kapele le kamorao. Ba ipiletsa ho Morena, baprista ba letsa literompeta. ₁₅Bahlabani ba naha ea Juda ba hlaba mokhosi. Eare ba sa ntsane ba hlaba mokhosi, Molimo a etsa hore Jeroboame le Baiseraele bohle ba hlōloe ke bo-Abiea le bahlabani ba Juda. ₁₆Bana ba Iseraele ba baleha bahlabani ba Juda, 'me Molimo a neelana ka bona matsohong a bahlabani bao ba Juda. ₁₇Abiea le bahlabani ba hae ba ba etsa mofela. Ha bolaoa mokhetho oa bahale ba Iseraele ba likete tse makholo a mahlano. ₁₈Mohlang oo bahlabani ba Juda ba hlōla bana ba Iseraele, kaha ba ne ba le matla, ba tšepile Morena Molimo oa bo-ntat'a bona.

₁₉Abiea a phalalisa Jeroboame, 'me a hapa motse oa Bethele le metsana ea oona, le motse oa Jeshana le metsana ea oona, le motse oa Eferone le metsana ea oona. ₂₀Mehleng ea Abiea, Jeroboame ha aa ka a hlola a tsosa mohlahla, 'me Morena a mo otla, a shoa.

₂₁Abiea a 'na a matlafala. A nyala basali ba leshome le metso e mene, ba mo tsoalla bara ba mashome a mabeli a metso e 'meli, le barali ba leshome le metso e tšeletseng.

₂₂Liketso tse ling tsa Abiea, le mekhoa ea hae, le maele a hae, li ngotsoe Bukeng ea Moporofeta Ido.