'Mikiea o eletsa Akabe
1Jehoshafate e ne e le morui e moholo, ea tlōtlehang haholo, 'me a nyallana le Akabe. 2Hoba ho fete lilengoana, a theohela Samaria ho Akabe. Akabe a hlabela Jehoshafate le batho ba neng ba e-na le eena linku tse ngata, le likhomo tse ngata, a ba a mo hlohleletsa hore a futuhele Rama e Gileade. 3Akabe, khosi ea Iseraele, a re ho Jehoshafate, khosi ea Juda: “Na u tla ea le 'na, re futuhele Rama e Gileade?”
Jehoshafate a araba, a re ho eena: “Rōna le uena re ntho e le 'ngoe. Sechaba sa ka ke sechaba sa hao. Re tla futuha le uena.”
4Jehoshafate a boela a re ho khosi ea Iseraele: “Kea u kōpa: Ak'u botse Morena pele.”
5Khosi ea khōbōkanya baporofeta ba ka bang makholo a mane, ea re ho bona: “Na re ka futuhela Rama e Gileade, kapa che?”
Ba re ho khosi: “Futuha, hobane Morena o tla neelana ka Rama e Gileade matsohong a khosi.”
6Empa Jehoshafate a re: “Na ekaba moo ha ho sa na moporofeta e mong oa Morena, eo re ka 'motsang?”
7Khosi ea Iseraele ea araba Jehoshafate, ea re ho eena: “Ho sa na le monna e mong hape eo re ka reng a re botsetse ho Morena, empa 'na ke mo hloile, hobane ha a ke be a mporofetele tse molemo, o mporofetela tse mpe. Ke 'Mikiea, mora oa Jimela.”
Jehoshafate a re ho khosi: “Khosi e se ke ea bua joalo.”
8Joale khosi ea Iseraele ea bitsa le leng la matona ea re ho lona: “Potlaka, u e'o mpitsetsa 'Mikiea, mora oa Jimela.”
9Khosi ea Iseraele, le Jehoshafate, khosi ea Juda, ba ne ba apere liaparo tsa bona tsa bokhosi, ba lutse literoneng tsa bona, seotlong se kantle ho khoro ea motse oa Samaria, 'me baporofeta bohle ba porofeta ba le kapele ho bona. 10Sedekiea, mora oa Kenaneea, o ne a iketselitse linaka tsa tšepe, 'me a re: “Morena o bua tjena: ‘Ka linaka tsena u tla sututsa Baarame ho fihlela u ba timetsa.’ ”
11Baporofeta bohle ba porofeta joalo, ba re: “Futuhela Rama e Gileade, u tla atleha, hobane Morena o tla neelana ka eona matsohong a khosi.”
'Mikiea o porofeta ho hlōloa ha Akabe
12Morōmuoa ea neng a il'o bitsa 'Mikiea a bua ho eena, a re: “Ak'u bone, baporofeta bana ba ntsoeleng ha ba bolella khosi taba tse molemo. Le uena ak'u bue joaloka bona, u bolele tse molemo.”
13Empa 'Mikiea a re: “Ka Morena ea phelang, ke tla bua feela tseo Morena a mpolellang tsona!”
14Ha 'Mikiea a fihla ho khosi, khosi ea re ho eena: “'Mikiea, na re ka futuhela Rama e Gileade, kapa che?”
'Mikiea a mo araba, a re: “E futuheleng, 'me le tla atleha, hobane ho tla neelanoa ka baahi ba teng matsohong a hao.”
15Empa khosi ea re ho eena: “Eka khona ke u laele hakae hore u se mpolelle letho, haese 'nete feela, ka lebitso la Morena?”
16'Mikiea a re:
“Ke bona Baiseraele bohle
ba qhalakane holim'a lithaba,
joaloka linku tse se nang molisa,
'me Morena o re:
‘Bana ha ba na mong'a bona:
Motho ka mong
a ipoella ha hae ka khotso!’ ”
17Eaba khosi ea Iseraele e re ho Jehoshafate: “Na ha kea ka ka u bolella hore a ke ke a mporofetela tse molemo, haese tse mpe feela?”
18'Mikiea a tsoela pele, a re: “Ka baka leo he, utloa lentsoe la Morena: Ke bone Morena a lutse teroneng ea hae, 'me mabōtho 'ohle a leholimo a eme pel'a hae ka letsohong la hae le letona, le ka letsohong la hae le letšehali. 19Morena a re: ‘Ke mang ea tla qhekanyetsa Akabe hore a futuhe, a tle a e'o bolaeloa Rama e Gileade?’
“E mong a bua tjena, e mong a bua tjena. 20Joale moea o mong oa tsoa har'a lebōtho la Morena, oa bua, oa re: ‘Ke 'na ea tla mo qhekanyetsa!’
“Morena a re ho oona: ‘Joang?’
21“Oa araba, oa re: ‘Ke tla ea, ke etse hore baporofeta bohle ba hae ba bue leshano.’
“Morena a re: ‘U tla mo qhekanyetsa, u be u atlehe. Tsamaea, u e'o etsa joalo!’
22“Ka baka leo he, ak'u bone kamoo Morena a entseng hore baporofeta bana ba hao bohle ba bue leshano! Empa Morena eena o se a boletse kuluoa e tla u oela holimo.”
23Joale Sedekiea, mora oa Kenaneea a atamela ho 'Mikiea, a mo oahlela lerameng mona, a re: “Moea oa Morena o ile oa tsoa joang ka ho 'na, ho ea bua le uena?”
24'Mikiea a re: “Mohla u kenang ka kamoreng e kahare-hare ho ea ipata teng, ke mohla u tla tseba.”
25Khosi ea Iseraele ea re: “Tšoarang 'Mikiea, le mo khutlisetse ho Amona, 'musi oa motse ona, le ho khosana Jōoashe, mora oa khosi, 26le re: ‘Khosi e bua tjena: Hlahlelang monna enoa chankaneng, le mo sotle ka ho mo phelisa ka bohobenyana le ka metsinyana feela, ho fihlela ke khutla ka khotso.’ ”
27'Mikiea a re: “Haeba u ka khutla ka khotso, e tla ba hase Morena ea buileng ka molomo oa ka.” Eaba o re: “Ebe le utloile, lōna bohle!”
Lefu la Akabe
28Khosi ea Iseraele, le Jehoshafate, khosi ea Juda, ba nyoloha, ba futuhela Rama e Gileade. 29Khosi ea Iseraele ea re ho Jehoshafate: “Ke tla ikhakanya, ke itahlele ntoeng, empa uena u apare liaparo tsa hao tsa bokhosi.” Khosi ea Iseraele ea ea ntoeng e ikhakantse.
30Khosi ea Arame ea laela balaoli ba eona ba likariki tsa ntoa, ba neng ba e-na le eona, ea re: “Le se ke la loantša motho ofe kapa ofe, haese khosi ea Iseraele feela.”
31Ha balaoli ba likariki tsa ntoa ba bona Jehoshafate, ba re: “Enoa ke eena khosi ea Iseraele!” Ba mo etsetsa sakana-la-nkōpe, ba mo loantša. Jehoshafate a hlaba mokhosi, 'me Morena a mo thusa, a etsa hore ba khaotse ho mo loantša. 32Ha balaoli ba likariki ba hlokomela hore hase eena khosi ea Iseraele, ba khaotsa ho mo phalalisa.
33Mohlabani e mong a betsa motsu feela, a sa o lebisa ho motho, 'me a hlaba khosi ea Iseraele moo seaparo sa eona sa ntoa se kopanang teng. Eaba khosi e re ho moqhōbi oa kariki ea ntoa: “Sokolla kariki ea hao, u 'ntše har'a lebōtho, hobane ke tsoile kotsi.” 34Mohlang oo ntoa ea 'na ea eketsa ho befa. Khosi ea Iseraele ea itšetleha ka kariking ea eona ea ntoa, e ntse e talimile ka ho Baarame, ho fihlela mantsiboea, 'me ka phirimana ea e-shoa.
