2 LIKHOSI 10

₁Akabe o ne a e-na le bara ba mashome a supileng motseng oa Samaria. Jehu a ngola mangolo, a a rōmela Samaria ho babusi ba motse, le ho baholo ba sechaba, le ho bahōlisi ba bana ba Akabe. Mangolong ao o ne a itse: ₂“Bana ba mong'a lōna ba ho lōna moo; le bile le na le likariki tsa ntoa, le lipere, le qhobosheane, le lihlomo tsa ntoa. Hang-hang ha lengolo lena le fihla ho lōna, ₃le khethe e mong oa bara ba mong'a lōna, eo le bonang a lokela, a bile a tšoanela, le 'mee teroneng ea ntat'ae, 'me le loanele ntlo ea mong'a lōna.”

₄Empa ba kenoa ke tšabo e kholo, ba re: “Jehu o hlōtse likhosi tse peli! Rōna re ka mo etsa'ng?”

₅Mookameli oa lelapa la khosi, le 'musi oa motse, le baholo ba sechaba, le bahōlisi ba bana ba Akabe, ba rōmela molaetsa ho Jehu, ba re: “Re bahlanka ba hao, 'me re tla etsa tsohle tseo u tla re laela tsona. Ha re ka ke ra bea khosi e 'ngoe; uena etsa seo u bonang se lokile.”

₆Joale Jehu a ba ngolla lengolo la bobeli, a re: “Haeba le le ba ka, 'me eba le tla mamela litaelo tsa ka, hosasane, ka eona nako ena, le nke lihlooho tsa bara ba mong'a lōna, le tle ho 'na mona Jesereele.”

Bara ba khosi ba ne ba le mashome a supileng, ba le matsohong a banna ba baholo ba motse, ba ba hōlisitseng. ₇Eare ha lengolo le fihla ho bona, ba tšoara bara ba khosi ba mashome a supileng, ba ba bolaea, ba kenya lihlooho tsa bona ka lirōtōng, ba li rōmela Jesereele, ho Jehu.

₈Morōmuoa a fihla ho Jehu, a re: “Ba tlisitse lihlooho tsa bara ba khosi Akabe.”

Eaba Jehu o re: “Li etseng liqubu tse peli, le li bee khorong ea motse ho fihlela hosasane, hoseng.”

₉Ka la hosasane, e sa le hoseng, Jehu a tsoa, a ea ema khorong ea motse, a re ho sechaba sohle se teng moo: “Lōna ha le na molato. Ke 'na ea ileng a rera mong'a ka, ka 'molaea. Empa baa bohle ba bolailoe ke mang? ₁₀Joale tsebang hore tsohle tseo Morena a li buileng ka lelapa la Akabe li tla phethahala, hobane Morena o entse seo a neng a se bue ka mohlanka oa hae Elia.” ₁₁Ka baka leo, Jehu a bolaea bohle ba lelapa la Akabe ba neng ba setse Jesereele, le banna bohle bao e neng e le litšiea tsa hae, le metsoalle ea hae, le baprista ba hae, ho fihlela ho sa sala le ea mong.

₁₂Joale Jehu a ema, a tloha Jesereele, a ea Samaria. Ha a ntse a tsamaea, a fihla sebakeng se bitsoang Motebong, ₁₃moo a ileng a teana le bana babo Akasiea, khosi ea Juda, 'me a re ho bona: “Le bo-mang?”

Ba mo araba, ba re: “Re bana babo Akasiea. Re theohela tlase koana ho ea boka likhomo ho bana ba khosi le ho bana ba mofumahali.”

₁₄Jehu a re: “Ba tšoareng!” Ba ba tšoara, ba ba bolaela pel'a seliba se hona moo Motebong. E ne e le banna ba mashome a mane a metso e 'meli, 'me ba se ke ba siea le ea mong.

₁₅Hoba Jehu a tlohe moo Motebong, a kopana le Jehonadabe, mora oa Rekabe, a e-tla ho tla mo khahlanyetsa. Jehu a mo lumelisa, 'me a re ho eena: “Na u nthata joaloka ha ke u rata?”

Jehonadabe a araba, a re: “Ho joalo!”

Jehu a re: “Haeba ho le joalo, ntšoare ka letsoho.” Jehonadabe a mo tšoara ka letsoho, 'me Jehu a mo hloesetsa ka kariking ea ntoa. ₁₆Eaba Jehu o re: “Tloo, u tl'o bona kamoo ke chesehelang Morena kateng.” Joale ba palama kariki ea Jehu ea ntoa.

₁₇Ha a fihla Samaria, a bolaea masalla 'ohle a ba lelapa la Akabe, a neng a le moo Samaria. A felisa lelapa leo, ho ea kamoo Morena a neng a laele Elia kateng.

₁₈Jehu a khōbōkanya sechaba sohle, 'me a re ho sona: “Akabe o ile a sebeletsa Baale hanyeyane, empa Jehu eena o tla sebeletsa Baale haholo. ₁₉Ka baka lena, mpitsetseng baporofeta bohle ba Baale, le bahlanka bohle ba hae, le baprista bohle ba hae. Ho se be le ea mong ea tla ba sieo, hobane ke tla etsetsa Baale sehlabelo se seholo. Mang kapa mang ea tla ba sieo a ke ke a phela.” Feela Jehu o ne a etsa leqheka, ka morero oa hore a tle a bolaee ba rapelang Baale.

₂₀Jehu a boela a re: “Phatlalatsang hore ho tla ba le phutheho e halalelang ea Baale!” Eaba baa e phatlalatsa. ₂₁Jehu a rōmela maqosa hohle naheng ea Iseraele. Bohle ba rapelang Baale ba tla, 'me ha se ke ha e-ba le ea mong ea sa tleng. Ba fihla ba kena ka tempeleng ea Baale, 'me ea tlala tsoete! ₂₂Jehu a re ho mohlokomeli oa kamore ea liaparo: “Tlisetsa bohle ba rapelang Baale liaparo!” Eo a ba tlisetsa tsona.

₂₃Eaba bo-Jehu le Jehonadabe, mora oa Rekabe, ba kena ka tempeleng ea Baale. Jehu a re ho ba rapelang Baale: “Hlahlobisisang, le ikholise hore har'a lōna mona ha ho le ea mong oa bahlanka ba Morena, haese ba rapelang Baale feela.” ₂₄Ha ba kena ka tempeleng ho ea etsa mahlabelo le linyehelo tsa secheso, Jehu o ne a ile a bea banna ba mashome a robeli kantle, 'me a re ho bona: “Haeba e mong oa banna bana bao ke ba beang matsohong a lōna a ka phōnyōha, ea tla mo tlohela hore a phōnyōhe o tla bolaoa bakeng sa eo ea phōnyōhileng!”

₂₅Hang-hang hoba Jehu a qete ho etsa nyehelo ea secheso, a re ho balebeli le ho balaoli: “Kenang, le ba bolaee! Ho se be le ea mong ea ka tsoang!” Ba ba bolaea ka lisabole. Balebeli le balaoli ba ba lahlela kantle, ba nt'o kena kahare-hare ho tempele ea Baale. ₂₆Ba ntša sefika sa thupa se ka tempeleng ea Baale, ba se chesa. ₂₇Ba thua sefika sa Baale, ba heletsa le tempele ea hae, ba e etsa mohlabana ho fihlela kajeno-ea-bokajeno. ₂₈Ka mokhoa ona, Jehu a felisa Baale naheng ea Iseraele.

₂₉Leha ho le joalo, libe tsa Jeroboame, mora oa Nebate, ea neng a etse hore Baiseraele ba etse sebe, tsona ha aa ka a li tlohela, a 'na a khumamela namane ea khauta e neng e le Bethele, le e neng e le Dane.

₃₀Joale Morena a re ho Jehu: “Kahobane u entse hantle ha u phethahatsa tseo mahlong a ka li lokileng, 'me lelapa la Akabe u le entse tsohle tseo ke neng ke li rata, bana ba hao ba tla lula teroneng ea Iseraele ho isa molōkong oa bone.” ₃₁Empa Jehu a se ke a tsotella ho tsamaea ka molao oa Morena Molimo oa Iseraele, ka pelo ea hae eohle, hobane ha aa ka a tlohela libe tsa Jeroboame, ea neng a etse hore Baiseraele ba etse sebe.

₃₂Mehleng eona eo, Morena a qala ho ngotla naha ea Baiseraele. Hasaele a ba hlōla ka nqeng tsohle tsa naha ea Iseraele; ₃₃ho tloha ka bochabela ho Jorodane, e leng naha eohle ea Gileade, le ea ba morabe oa Gade, le oa Rubene, le oa Manase, le ho tloha Arōoere e pel'a nōka ea Arenone, ho ea fihla Gileade le Bashane.

₃₄Liketso tse ling tsa Jehu, le tsohle tseo a ileng a li etsa, le tsa bohlabani ba hae, li ngotsoe Bukeng ea Liketsahalo ea Likhosi tsa Iseraele.

₃₅Jehu a shoa, 'me a epeloa Samaria. Mora oa hae, Jehōoakase, a mo hlahlama. ₃₆Jehu o ne a ile a busa naha ea Iseraele ka lilemo tse mashome a mabeli a metso e robeli.