Puso ea Manase, khosi ea Juda
1Manase o ne a e-na le lilemo tse leshome le metso e 'meli ha a qala ho busa. A busa ka lilemo tse mashome a mahlano a metso e mehlano, a le Jerusalema. Lebitso la 'm'ae e ne e le Hefesiba. 2A etsa bobe mahlong a Morena, a latela manyala a balichaba bao Morena a neng a ba leleke kapele ho bana ba Iseraele. 3A boela a haha libaka tseo ho rapelloang melimo ea bohata ho tsona, tseo ntat'ae Hesekiea a neng a ile a li heletsa. A tsosa lialetare tsa Baale; a etsa setšoantšo sa Ashera joalokaha Akabe, khosi ea Iseraele, a ne a ile a etsa; a khumamela letsatsi, le khoeli, le linaleli, a li sebeletsa. 4A haha le lialetare ka Tempeleng ea Morena, eo Morena a neng a bue ka eona, a re: “Ke tla khumamelloa Jerusalema.” 5A hahela letsatsi, le khoeli, le linaleli lialetare mabaleng a mabeli a Tempele ea Morena. 6A etsa sehlabelo sa secheso ka mora oa hae, a sebelisa boloi, le bonōhe, 'me a sebelisana le mathuela, le linohe. A etsa bobe bo boholo mahlong a Morena, a mo halefisa.
7Setšoantšo se betliloeng sa Ashera, seo a neng a se entse, a se hloma ka Tempeleng eo Morena a neng a bue ka eona ho Davida le ho mora oa hae Solomone, a re: “Ka Tempeleng ena, le mona Jerusalema eo ke e khethileng har'a melōko eohle ea Iseraele, ke moo ke tla khumamelloa teng kamehla eohle. 8Haeba Baiseraele ba ka hlokomela ho phetha tsohle tseo ke ba laetseng tsona, ho ea ka Molao oohle, oo mohlanka oa ka Moshe a ba laetseng oona, nke ke ka hlola ke etsa hore ba tsoe naheng eo ke neng ke e nee bo-ntat'a bona.” 9Empa ha baa ka ba mamela; Manase a ba khelosa, 'me ba etsa bobe bo fetang le ba lichaba tseo Morena a neng a li timetse mahlong a bana ba Iseraele.
10Eaba Morena o bua ka bahlanka ba hae, baporofeta, o re: 11“Manase, khosi ea Juda, o entse manyala ana, o bile o entse le bokhopo bo fetang ba Baamore, ba bileng teng pele ho eena, 'me o entse hore ba morabe oa Juda ba etse sebe ka ho rapela melingoana ena ea hae ea litšoantšo. 12Ka baka lena, Morena Molimo oa Iseraele, o bua tjena: ‘Ke tla lihela koluoa e kholo holim'a Jerusalema le Juda, hoo litsebe tsa e mong le e mong ea tla e utloa li tla lla mangenengene. 13Ke tla ahlōla Jerusalema joalokaha ke ne ke ahlōle Samaria, le joalokaha ke ne ke ahlōle lelapa la Akabe. Ke tla hlakola Jerusalema joalokaha motho a hlakola sejana, a be a se ribeha. 14Bao e leng masalla a sechaba sa ka ke tla ba furalla, ke neelane ka bona matsohong a lira tsa bona, ba fetohe batlatlapuoa le bathōpuoa ba lira tsohle tsa bona, 15hobane ba entse bobe mahlong a ka, 'me ba nkhalefisa, ho tloha mohla bo-ntat'a bona ba tsoang naheng ea Egepeta, ho fihlela kajeno.’ ”
16Kantle ho sebe seo a entseng hore ba morabe oa Juda ba se etse, Manase o entse bobe mahlong a Morena, a tšolla mali a mangata a se nang molato, hoo a ileng a phalla kahohle motseng oa Jerusalema.
17Liketso tse ling tsa Manase, le sebe seo a ileng a se etsa, le tsohle tseo a li entseng, li ngotsoe Bukeng ea Liketsahalo tsa Likhosi tsa Juda.
18Manase a shoa, 'me a epeloa tšimong e bitsoang ea Usa, ea ntlo ea hae ea bokhosi. Amona, mora oa hae, a mo hlahlama.
Puso ea Amona, khosi ea Juda
19Amona o ne a e-na le lilemo tse mashome a mabeli a metso e 'meli ha a qala ho busa. A busa ka lilemo tse peli, a le Jerusalema. Lebitso la 'm'ae e ne e le Meshulemete, morali oa Haruse, oa motse oa Joteba.
20Amona a etsa bobe mahlong a Morena, joalokaha Manase, ntat'ae, a ne a ile a etsa. 21A tsamaea mehlaleng eohle ea ntat'ae, a sebeletsa melingoana ea bohata, a e khumamela, joalokaha ntat'ae a ne a ile a e sebeletsa. 22A furalla Morena Molimo oa bo-ntat'ae, a se ke a tsamaea ka tsela ea Morena.
23Eaba bahlanka ba khosi Amona baa mo rera, ba 'molaela ka tlung ea hae. 24Empa sechaba sa naha eo sa bolaea bohle ba ileng ba rera khosi Amona, 'me sa bea Josiea, mora oa hae, hore e be khosi.
25Liketso tse ling tsa Amona li ngotsoe Bukeng ea Liketsahalo tsa Likhosi tsa Juda. 26Amona a epeloa lebitleng la hae, tšimong e bitsoang ea Usa, 'me Josiea, mora oa hae, a mo hlahlama.
