Naamane o folisoa lepera
1Naamane, molaoli oa lebōtho la khosi ea Arame, e ne e le motho e moholo, oa bohlokoa ho mong'a hae, hobane ke ka eena Morena a ileng a lopōlla Arame. E ne e le mohale oa senatla, feela e le molepera.
2Baarame ba ne ba ile ba futuha ka mabōthoana a bona, ba tla ba thōpile moroetsanyana oa Moiseraele, 'me ea e-ba eena ea sebeletsang mohats'a Naamane. 3Moroetsanyana a re ho mofumahali oa hae: “Ha mong'a ka a ne a ka ea ho moporofeta ea phelang Samaria, o ne a tla mo folisa lepera lena le hae.”
4Naamane a kena ka ho mong'a hae, a 'molella, a re: “Moroetsanyana enoa ea tsoang naheng ea Iseraele o bua tjena.”
5Khosi ea Arame ea re: “Tsamaea, u ee hona teng, 'me 'na ke tla ngolla khosi ea Iseraele.” Naamane a tsamaea a nkile silefera e etsang boima ba likilo tse makholo a mararo le mashome a mane, le khauta e etsang boima ba likilo tse mashome a supileng, le mefuta e leshome ea liaparo tse ntle. 6A tlisetsa khosi ea Iseraele lengolo le reng: “Ha lengolo lena le fihla ho uena, tseba hore ke rōmetse Naamane, mohlanka oa ka, ho uena, hore u mo folise lepera leo la hae.”
7Ha khosi ea Iseraele e se e balile lengolo lena, ea hahōla liaparo tsa eona, ea re: “Na 'na ke Molimo ea ka bolaeang a ba a phelisa, ha e le moo monna eo a nthōmella motho eo hore ke mo folise lepera? Kea le kōpa: Shebang taba ena hantle. Na ha le bone hore motho eo o mpatla ntoa!”
8Eare ha Elisha a utloa hore khosi ea Iseraele e hahōtse liaparo tsa eona, a rōmela molaetsa ho eona, a re: “Ke ka baka la'ng ha u hahōtse liaparo tsa hao? E-re motho eo a tle ho 'na mona hona joale, 'me o tla tseba hore ho na le moporofeta naheng ena ea Iseraele.” 9Eaba Naamane o tla ka lipere tsa hae, le ka kariki ea hae ea ntoa, o fihla a ema kapele ho monyako oa ntlo ea Elisha. 10Elisha a rōma leqōsa ho eena, a re: “Tsamaea, u e'o tola hasupa ka nōkeng ea Jorodane, 'me nama ea hao e tla hlōma, ebe ua fola.”
11Empa Naamane a halefa, a tsamaea a ntse a re: “A ke le boneng! Ke ne ke hopotse hore motho enoa o tla tla ka seqō, o tl'o ema kapele ho 'na, a rapele Morena Molimo oa hae, 'me ka letsoho la hae a phōlle moo lepera le leng teng, ebe lea fola. 12Na metsi a linōka tsa Damaseka, bo-Abana le Parapara, ha aa hloeka ho feta metsi 'ohle a naha ea Iseraele? Na nke ke ka tola ho tsona, eaba kea fola?” Naamane a khutla, a tsamaea a halefile.
13Empa bahlanka ba hae ba atamela pel'a hae, ba bua le eena, ba re: “Ntate oe, ha moporofeta a ne a u laetse hore u etse ntho e kholo, na u ne u ke ke ua e etsa? Joale ho bonolo hakaakang ha a re feela ho uena: ‘Tola, 'me u tla fola!’ ” 14Ka hona a theoha, a qoela hasupa ka nōkeng ea Jorodane, ho ea ka polelo ea moporofeta oa Molimo. Nama ea hae ea boela ea hlōma, ea tšoana le ea ngoana oa lesea, eaba oa fola.
15Joale a khutlela ho moporofeta oa Molimo, a e-na le sehlopha sohle sa hae, a fihla a ema kapele ho eena, a re: “Joale kea tseba hore lefatšeng lohle ha ho na Molimo, haese naheng ea Iseraele feela. Ka baka leo, kea u rapela: Amohela mpho ea teboho, e tsoang ho mohlanka oa hao.”
16Empa Elisha a re: “Ka Molimo ea phelang, eo ke mo sebeletsang, nke ke ka amohela letho!” Naamane a mo qophella hore a e nke, empa Elisha a hana.
17Joale Naamane a re: “Kea u rapela he: Ak'u nee mohlanka oa hao moqeqeko oa mobu o lekaneng ho belesoa limmeileng tse peli, hobane ho tloha joale mohlanka oa hao a ke ke a hlola a etsetsa molimo o mong nyehelo ea secheso, kapa mahlabelo, haese Morena feela. 18Feela Morena a ke a tšoarele mohlanka oa hao ntho ena: Ha mong'a ka a kena ka tempeleng ea Rimone ho ea rapela, a itšetlehile ka letsoho la ka, 'me le 'na ke obamela fatše ka tempeleng ea Rimone, Morena a ke a tšoarele mohlanka oa hao ntho ena.”
19Eaba Elisha o re ho eena: “Itsamaele ka khotso.”
Naamane a tsamaea sebakana ho tloha ho Elisha.
Gehasi o otloa ka lepera
20Joale Gehasi, mohlanka oa Elisha, moporofeta oa Molimo, a re: “Mong'a ka o hauhetse Naamane enoa oa Moarame, ka ho hana ho amohela seo a neng a tlile le sona. Empa ka Morena ea phelang, ke tla matha kamora' hae, ke e'o nka ho hong ho eena.”
21Eaba Gehasi o sala Naamane morao. Ha Naamane a bona a e-tla a matha, a theoha kariking ea hae ea ntoa, a mo khahlanyetsa, a re: “Molato ke'ng?”
22Gehasi a re: “Ha ho molato. Mong'a ka o nthōmile ho uena, o re: ‘Hona joale ho tsoa fihla mona ho 'na bahlankana ba babeli ba sehlopha sa baporofeta, ba tsoang naheng e maralla ea Efraime. Kea u rapela: Ak'u ba fe silefera e etsang boima ba likilo tse mashome a mararo le metso e mene, le mefuta e 'meli ea liaparo tse ntle.’ ”
23Eaba Naamane o re: “Kea u rapela: Nka silefera e etsang boima ba likilo tse mashome a tšeletseng le metso e robeli.” A mo qophella hore a e nke. A kenya silefera eo ka mekotlaneng e 'meli, a e tlama. A nka le mefuta e 'meli ea liaparo tse ntle, 'me tsena tsohle a li jarisa bahlanka ba hae ba babeli, ba eteletse Gehasi pele. 24Ha ba fihla Ofele, Gehasi a li nka ho bona, a li kenya ka tlung. A re banna bao ba tsamaee, 'me ba tsamaea. 25Gehasi a kena ka tlung, a ema kapele ho mong'a hae.
Elisha a re ho eena: “O tsoa kae Gehasi?”
Gehasi a re: “Ha ho moo mohlanka oa hao a kileng a ea teng.”
26Empa Elisha a re ho eena: “Ha u tsebe hore ke ne ke ntse ke tsamaea le uena ka moea, ha monna eloa a theoha kariking ea hae ea ntoa, a u khahlanyetsa? Na nako ee ke ea ho amohela chelete, le ea ho amohela liaparo, le meru ea mohloaare, le lirapa tsa morara, le linku, le lipholo, le bahlanka, le makhabunyane? 27Ka lebaka lena, lepera la Naamane le tla u khomarela, le khomarele le litlōhōlō tsa hao kamehla eohle.” A tloha kapele ho Elisha e le molepera, a le mosoeu joaloka lehloa.
