Polao ea Menelaose
1Selemong sa lekholo le mashome a mane a metso e robong, Judase le batho ba hae ba utloa hore Antiokose Eupatore o se a e-tla ka mphi e kholo ho loantša Judea, 2a e-na le Lisiase, moalosi oa hae, eo litaba tsa 'muso li neng li le matsohong a hae. Ba ne ba e-na le mabotho a Bagerike ba litaaso ba likete li lekholo le nang le leshome, 'moho le bapalami ba likete li hlano le makholo a mararo, 'me ba e-na le litlou tse mashome a mabeli a metso e 'meli, le likariki tse makholo a mararo tseo mabili a tsona a neng a fasellelitsoe lisekele.
3Menelaose le eena a ikopanya le bona; 'me ka bomene-mene bo boholo a khothatsa Antiokose, e seng ka baka la katleho ea naha ea habo, empa e le ka tšepo ea hore o tla tiisoa setulong sa hae. 4Empa Molimo, Khosi ea likhosi, a etsa hore Antiokose a halefele motho eo ea khopo. Hoba Lisiase a bontše khosi hore sesosa sa bobe bohle ke Menelaose, ea laela hore a isoe Berea, 'me a bolaeloe hona sebakeng seo ka ho ea ka tloaelo ea sona. 5Sebakeng seo ho na le tora e bophahamo ba limethara tse mashome a mabeli a metso e 'meli, e tletseng molora 'me e nang le mochini o phikolohang, o sekametseng ka nqa tsohle moloreng. 6Ke moo ho hloesetsoang teng ea utsoitseng lintho tse halalelang, kapa ea entseng bokhopohali bo bong bo itseng, hore a timele ka ho liheloa meloreng. 7Ke ka mokhoa ona motho eo ea khopo a ileng a shoa, a hloka leha e le lepato. 8Tsena tsa hlahela Menelaose ka toka; hobane hangata o ne a tlontlolotse aletare eo mollo le molora oa eona o neng o halalela, a shoela ka moloreng.
Ntoa haufi le motse oa Modine
9Khosi Antiokose o ne a ntse a e-tla, ka moea o tletseng merero e sehloho, ea ho hlokofatsa Bajuda hampe ho feta ntat'ae. 10Eitse ha Judase a utloa tsa ho tla ha hae, a laela matšoele ho rapela Morena, nyene le bosiu, hore a ba hlahe thusong joalokaha a 'nile a etsa kamehla; hobane ba ne ba le lekhatheng la ho amohuoa Molao, le naha ea habo bona, le Tempele e halalelang. 11Ba kopa Molimo hore a se lumelle hore sechaba se neng se sa tsoa re khefu, se boele se oele liatleng tsa balichaba bao ba nyefolang. 12Eare ha bohle hammoho ba phethile hona, 'me ba rapetse Morena ea mohau ka lillo le boitimo, ba rapaletse fatše ka matsatsi a mararo, ka ntle ho khaotso, Judase a ba khothatsa, a ba a ba laela ho itokisa.
13Hoba a buisane le baholo ba neng ba phuthehetse ho eena, a ikemisetsa ho tsamaea le bahlabani ba hae, pele khosi e ka tlisa mphi ea eona Judea 'me ea hapa Jerusalema; e le hore a leke ho hlola ka thuso ea Molimo. 14Joale ha a beile tsohle ho 'Mopi oa tsohle, 'me a khothalelitse bahlabani ba hae ho loana senna ho isa lefung, bakeng sa melao, Tempele, motse, naha ea habo bona le meetlo ea habo bona, a ea lara haufi le motse oa Modine. 15Hoba a ba nee lepetjo le reng: “Tlholo ea Molimo”, ka bahlankana ba sebetehali bao a ba khethileng a hlasela tente ea khosi bosiu. A bolaea banna ba likete tse ka bang peli liahelong, a hlaba tlou e kholo ho feta tse ling, 'me a bolaea motsamaisi oa eona. 16Qetellong liahelo tsa tlala tšabo e kholohali le mofere-fere; eaba ba ikela ba atlehile. 17Bosiu bo ne bo qala ho sa, ha ba qeta tsena kaofela, hobane Morena a thusitse Judase ka ho mo sireletsa.
Antiokose V o etsa selekane le Bajuda
18Ha khosi Antiokose a se a thulane le mathata ana a bakoang ke bonatla ba Bajuda, eaba o leka ho hapa liqhobosheane tsa bona ka bohlale. 19A futuhela Bete-Sure, e neng e le qhobosheane e matla ea Bajuda; empa a chechisoa, a phalalisoa, a hloloa. 20Judase a romela tse hlokahalang ho lebotho le neng le lebetse qhobosheane eo. 21Empa Rodokose, e mong oa ba mphi ea Bajuda, a senolela lira makunutu; a batloa, a tšoaroa 'me a fenethoa. 22Khosi Antiokose a boela a buisana le baahi ba Bete-Sure, 'me hoba ba etse litumellano, eaba oa tsamaea, a ea loantša bahlabani ba Judase, a mpa a hloloa ke bona. 23Eitse ha a utloa hore Filipi, eo litaba tsa 'muso li neng li le matsohong a hae, eo a neng a mo siile Antiokia, o se a mo koenehetse, a ferekana moeeng. A bitsa Bajuda, a qala lipuisano tsa khotso le bona, a hlapanyetsa ho hlompha litokelo tsa bona, 'me a boelana le bona. A nyehela ka sehlabelo, a tlotla Tempele, a ba a siela Qalo e halalelang limpho. 24A amohela Makabea ka mokhoa o mofuthu, 'me a bea Hegemonidese molaoli oa setereke, ho tloha Potolemaise ho ea fihla naheng ea Bagera.
25Joale a ea Potolemaise. Baahi ba motse oo ba ne ba sa khotsofala ho hang ka tumellano e entsoeng le Bajuda, ba ne ba halefile, hoo ba ileng ba leka ho e senya. 26Eaba Lisiase o ema holim'a sethala, a buella kutloano eo ka matla 'ohle a hae, a ba kholisa, a ba phoka, a etsa hore ba be le kutloisiso; a nt'o khutlela Antiokia. Li bile joana litaba tsa ho futuha le ho khutla ha khosi.
