Morero o sehloho oa Nikanore
1Eitse ha Nikanore a utloa hore batho ba Judase ba libakeng tsa Samaria, a rera ho ba futuhela, ka ntle ho kotsi ea letho, ka letsatsi la Sabatha. 2Bajuda ba neng ba qobeletsoe ho mo sala morao ba 'molella, ba re: “Se ba timetse ka mokhoa o hlaha, o sehloho joalo; empa u hlomphe letsatsi lena, leo Ea bonang tsohle a le khethileng har'a a mang, hore e be le halalelang.” 3Senokoane sane sa motho sa ba botsa hore na ho na le 'Musi leholimong ea laetseng hore Sabatha e bolokoe. 4Bona ba mo hlalosetsa, ba re: “Morena ea phelang, ea busang leholimong, ke eena ka bo-eena ea laetseng hore letsatsi la bosupa le bolokoe.” 5Eaba o re: “'Na ea busang lefatšeng, le 'na ke laela hore ho nkoe libetsa, 'me ho phethoe tšebetso ea khosi.” Leha ho le joalo, ha aa ka a atleha ho phetha morero oa hae o sehloho.
Mabotho a Judase a itokisetsa ho loana
6Joale Nikanore, ka ho ikhohomosa le ho ikakasa hampe, a nahana ho haha sefika sa tlholo ka tse hapiloeng ho Judase le batho ba hae. 7Ha e le Makabea, a se ke a nyahama pelo, empa a 'na a boloka tšepo ea hore Molimo o tla mo thusa. 8A khothatsa batho ba hae ho se tšabe phutuhelo ea balichaba; empa ba hopole thuso eo, mehleng e fetileng, ba e fumaneng, e hlahang leholimong; 'me le hona joale ba lebelle tlholo e tsoang ho Ea matla 'ohle. 9A ba a ba khothatsa ka mantsoe a Buka ea Molao le ea Baporofeta, 'me ka ho ba hopotsa lintoa tseo ba ileng ba li hlanaka pele, a boela a ba kenya mafolo-folo. 10Hoba a ba tsose molota, a qetella puo ea hae ka ho bontša kamoo balichaba ba sa tšepahaleng, 'me ba roba likano kateng. 11Eaba o hlomella e mong le e mong oa bona, e seng ka tšireletso ea thebe le lerumo, empa ka matla a tsoang khothatsong ea 'nete. A ba thabisa bohle ka ho ba phetela pono eo a ileng a e bona torong, e neng e ka tšeptjoa.
12Pono e bile joana: Oniase eo e bileng moprista e moholo, motho ea lokileng 'me ea khabane, ea ikokobetsang ka mehla, ea bonolo mekhoeng ea hae, sebui se tummeng, 'me eo ho tloha bonyenyaneng a neng a tloaetse ho etsa tse molemo, Judase a 'mona a otlolotse matsoho a hae, a rapella sechaba sohle sa Bajuda. 13Ka morao ho mona ha hlaha e mong, ea rapelang ka mokhoa o tšoanang, motho ea moriri o moputsoa, ea hlomphehang, ea babatsehang boemong ba hae, motho e moholo ruri. 14Eaba Oniase o bua, a re: “Enoa ke morati oa bana babo, ea rapellang haholo sechaba sa habo rona le motse o halalelang: ke Jeremia, moporofeta oa Molimo.”
15Joale Jeremia a otlolla letsoho la hae le letona, a fa Judase sabole ea khauta, 'me a re ho eena: 16“Nka sabole e halalelang e le mpho e tsoang ho Molimo, 'me ka eona u tla fenya lira.”
17Eitse hoba ba khothatsoe ke mantsoe ana a matlehali a Judase, a nang le matla a ho tsosa bonatla ho mang kapa mang, le a ho etsa bahlankana bahale, ba ikemisetsa ho se lule liahelong, empa ho futuha senna, le ho khaola khang ka ho hlanaka ntoa ka sebete; hobane motse oa Jerusalema le tumelo le Tempele li ne li le kotsing. 18Ba ne ba sa khathatseha haholo ka basali ba bona le bana, leha e le bana babo bona le bang ka bona; empa tšabo e kholo ea bona, ea mantlha, e ne e le bakeng sa khalalelo ea Tempele. 19Ba neng ba le ka har'a motse ba ne ba khathatsehile ka ntoa ena e tlang ho loanela nahathothe.
Nikanore oa hloloa 'me o shoela ntoeng
20Eitse ha bohle ba lebeletse hore kahlolo e tla oa, lira tse neng li se li khobokane tsa hlophisa mara. Litlou tsa emisoa libakeng tse tšoanelang, bapalami ba lipitsi ba ema lithekong tsa mphi. 21Makabea a talima mabotho-botho ana, bongata ba lihlomo tse fapakaneng, le bohale ba litlou. Eaba o otlollela matsoho a hae leholimong, a rapela Morena ea etsang limakatso, ea fanang ka tlholo ho ba e lokelang; e seng ka baka la matla a libetsa, empa ka ho ea kamoo eena a bonang kateng. 22Thapelong ea hae a bua ka mokhoa ona: “Oho Morena, uena ea ileng a romela lengeloi la hao mehleng ea Hesekiea, khosi ea Juda, 'me la bolaea ba likete tse lekholo le mashome a robeli a metso e mehlano ba mphi ea Saneheribe; 23romela hona joale hape, uena ea busang leholimong, lengeloi la hao le lokileng ho re etella pele, le tle le kenyetse lira tšabo le thothomelo. 24Ka matla a letsoho la hao, ak'u otle ba tlileng ho loantša sechaba sa hao se halalelang ba ntse ba nyefola.” Thapelo ea hae ea fella moo.
25Joale bahlabani ba Nikanore ba atamela ka literompeta le ka lipina tsa ntoa; 26athe banna ba Juda ba futuhelana le lira ba rapela, ho kopa thuso ho Molimo. 27Ba loana ka matsoho a bona, empa ba rapela Molimo ka lipelo tsa bona; ba rapalatsa fatše batho ba seng ka tlase ho likete tse mashome a mararo a metso e mehlano, ba thabetse haholo thuso e bonahalang ea Molimo. 28Ha ntoa e fetile 'me ba khutla ka thabo, ba bona Nikanore moo a shoeleng, a oele fatše a ntse a apere tsa ntoa. 29Eaba ba hlaba litlatse har'a mofere-fere o moholo 'me ba boka Morena ka puo ea habo bona.
30Joale Judase, eo ka 'mele le ka moea oohle a 'nileng a loanela ba habo a le moleng o kapele ho bohle, 'me a itella bona ho tloha bonyenyaneng ba hae, a laela hore ho pongoe hlooho ea Nikanore le letsoho la hae 'moho le sephaka, hore li tle li isoe Jerusalema. 31Ha a fihlile moo, a bitsa ba naha ea habo, 'me a emisa baprista ka pele ho aletare; eaba o roma batho ho ea lata ba Qhobosheaneng. 32A bontša bohle hlooho ea Nikanore eane ea nyonyehang, le letsoho leo monyefoli le moikakasi eane a ileng a le otlolla ho tlontlolla Ntlo e halalelang ea Ea matla 'ohle. 33A ba a laela hore leleme la Nikanore ea khopo le qotsuloe, le fuoe linonyana e le litsekana; 'me tseo e leng moputso oa bohlanya ba hae li fanyehoe malokana le Tempele. 34Joale bohle ba hoeletsa leholimong ba boka Morena, ea ileng a bontša tlotla ea hae, ba re: “Ho bokoe ea bolokileng Qalo e halalelang ea hae e hloekile!” 35Eaba Judase o fanyeha hlooho ea Nikanore holim'a Qhobosheane, hore e tle e be sesupiso se totobetseng sa thuso ea Morena, se ka bonoang ke bohle. 36Ka tumellano ea bohle, ha laeloa hore letsatsi lena le se ke la lebaleha; le ketekeloe ka la leshome le metso e meraro la khoeli ea leshome le metso e 'meli e bitsoang Adare ka Searame, ke hore letsatsi le etellang pele letsatsi la Moredekai.
Mathetho
37Lietsahala tse amanang le Nikanore tsa e-ba joalo. Kaha, ho tloha nakong eo, motse o le matsohong a Baheberu, ke tla fella moo. 38Tseo haeba ke li ngotse hantle, ka makhethe, ke seo ke neng ke se batla; empa haeba ke sa phethisa hantle 'me ke fokotse, le teng ke sa entse se leng matleng a ka. 39Joalokaha ho le hobe ho noa veine feela kapa metsi feela, empa seno se monate, se latsoehang, e le veine e kopaneng le metsi; ka mokhoa o joalo, ho fapanya mekhoa ea ho ngola pale ke ntho e khahlisang kutloisiso ea mobali. Empa ke fella mona.
