Jeremia o pata Tente ea Morena
1“Ho ka baloa mangolong a khopotso hore moporofeta Jeremia o ile a laela ba neng ba isoa kholehong ho pata mollo oa aletare, joalokaha ho tsoa hlalosoa. 2Le teng, ho ea ka mangolo ao, a eletsa ba neng ba ea kholehong, bao a neng a ba neile Molao, hore ba se lebale litaelo tsa Morena, le hore ba se khelosoe ke ho bona melimo ea khauta le silefera le likhabiso tsohle tsa eona. 3Ka lipuo tse ling tse kang tsena, a ba khothatsa ho hlokomela hore lipelong tsa bona ba se lebale Molao oa Moshe. 4Mangolong ao ho boleloa hape hore moporofeta ka ho latela tšenolelo, a laela hore Tente ea Morena le areka li ee le eena, ho fihlela a fihla thabeng eo Moshe a ileng a nyolohela ho eona 'me a bona naha eo Molimo a e tšepisitseng sechaba sa habo rona. 5Ha Jeremia a fihla moo, a fumana lehaha le kang ntlo; 'me a kenya Tente le areka le aletare ea mokubetso ka har'a lona; eaba o thiba monyako.
6“Joale ba bang ba neng ba mo felehelitse ba khutlela teng ho tla tšoaea tsela, empa ba sitoa ho e fumana. 7Eitse ha Jeremia a tsebisoa hona, a ba nyatsa, a re: ‘Sebaka seo se ke ke sa tsejoa ho fihlela Molimo a phutha sechaba sa hae hape 'me a se etsetsa mohau. 8Mohlang oo Morena o tla se supisa, tlotla ea Morena e tla totobala 'moho le leru, joalokaha e ne e iponahatsa ka nako ea Moshe, le mohla Salomone a rapelang, har'a mokete o moholo, hore Tempele e halaletsoe.’ ”
Mokhoa oa Salomone oa ho etsa mokete oa Khakolo
9“Hape-hape mangolong ao, ho hlalosoa kamoo Salomone, motho ea bohlale, a ileng a nyehela ka sehlabelo sa khakolo le sa phethahatso ea Tempele kateng. 10Joalokaha, ka thapelo eo Moshe a ileng a e etsa ho Morena, mollo o ile oa theoha leholimong 'me oa chesa lintho tsa sehlabelo, ka mokhoa o tšoanang, hoba Salomone a rapele, mollo oa theohela holim'a mahlabelo a secheso 'me oa a metsa. 11Moshe o ne a re: ‘Kaha nyehelo bakeng sa libe ha ea jeoa, e metsitsoe ke mollo.’ 12Ka mokhoa o tšoanang, Salomone a keteka matsatsi a robeli.
Nehemia o bokella libuka
13“Mangolong ao a khopotso le libukeng tsa liketsahalo tsa nako ea Nehemia, ka ntle ho litaba tsena ho boleloa le kamoo a ileng a etsa pokello ea libuka kateng. Nehemia a bokella libuka tse buang ka likhosi, libuka tsa baporofeta le tsa Davida, le mangolo a likhosi a amanang le linyehelo. 14Ka mokhoa o joalo, Judase le eena a bokella libuka tsohle tse neng li qhalane ka baka la ntoa e re hlahetseng; li matsohong a rona. 15Ka hona haeba le ka hloka tse ling tsa tsona, romelang batho ba tla le tlisetsa tsona.
Memo moketeng oa Khakolo ea Tempele
16“Re le ngoletse re le lekhatheng la ho ketekela Tlhoekiso ea Tempele; 'me le tla be le etsa hantle, haeba le boloka matsatsi ao. 17Re tšepa hore Molimo ea pholositseng sechaba sa hae, 'me ea re fileng rona bohle bojalefa le borena le boprista le khalalelo, 18joalokaha a tšepisitse Molaong oa Moshe, haufinyane o tla re hauhela, 'me o tla re khutlisa liqoleng tsohle tsa lefatše, a re phuthele Qalong ea hae e halalelang; hobane o re ntšitse bomalimabeng bo boholo, 'me o hloekisitse Qalo ena.”
Ketella-pele ea mongoli oa buka
19Libukeng tse hlano tseo a li ngotseng, Jasone oa Sirene o ne a qaqisa litaba tsa Judase Makabea le bana babo, le tsa tlhoekiso ea Tempele e kholo le khakolo ea aletare; 20le tsa lintoa le Antiokose Epifanese le mora oa hae Eupatore; 21le tsa liponahatso tse hlahileng leholimong ho banna ba ileng ba siisana ka ho loana senna ho sireletsa meetlo ea Sejuda; hoo, e le ba seng bakae, ba ileng ba ikhapela thepa naheng eohle, ba phalalisa matšoelehali a balichaba. 22Ba boela ba hapa Tempele e tumileng lefatšeng lohle, ba lopolla Jerusalema, 'me ba boela ba tiisa melao e neng e le kotsing ea ho felisoa; hobane Morena, ho lokeng ha hae, o ile a ba mohau ho bona. 23Libuka tseo tse hlano, ke tla leka ho li akaretsa bukeng e le 'ngoe.
24Ka ho elelloa bongata ba lipalo, le bothata boo lingoli tse ratang ho utloisisa lipale tsa histori li bo fumanang ka baka la bongata ba litaba, 25ke ile ka hlokomella babali: hore ho ba ratang ho bala e tle e be thabo; le ho ba ithutang ho tseba ka hlooho, e tle e be ntho e bonolo; le hore bohle ba ka tšohang ba bala litaba tsena ba tle ba fumane molemo. 26Ha e le 'na ea inketseng mosebetsi ona o boima oa khutsufatso, ke etsa mosebetsi o seng bobebe, empa o fufuletsang, o hlokisang boroko. 27Ho tšoana le ha motho a lokisa lijo tsa mokete; o leka ho khotsofatsa batho ba bang, 'me hase ntho e bonolo. Empa ka ho lebella teboho ea bongata, ke tla sehla tlas'a bothata ke thabile. 28Ke tla siela sengoli Jasone ho ikitlaeletsa ho qaqisa ntlha e 'ngoe le e 'ngoe ea litaba; 'na ke tla hlalosa tsa mantlha feela ho akaretsa. 29Joalokaha sehahi sa ntlo e ncha se tšoanela ho hlokomela mohaho likarolong tsohle tsa oona, athe ea filoeng mosebetsi oa ho ferefa le ho khabisa ntlo a tšoanela ho sheba feela tse amanang le mokhabiso, le ho 'na ho joalo, chebong ea ka. 30Ke tšoanelo ea sengoli sa histori ho kena litabeng ka ho tlala, ho li hlahlobisisa kaofela ha tsona, le ho shebisisa ntlha e 'ngoe le e 'ngoe ea tsona. 31Athe ea lekang feela ho nolofatsa litaba, o lumeletsoe ho thahasella ho li khutsufatsa le ho phema ho li hlahisa ka ho tlala. 32A nke ke qale pale hona joale ke sa eketse tse boletsoeng ka letho; hobane e ka be e le booatla ho etsa ketella-pele e telele, empa litaba tsona li tla ba khutšoanyane.
