Amanone le Tamare
1Abosalome, mora oa Davida, o ne a e-na le khaitseli e ntle. Lebitso la eona e le Tamare. Amanone, mora oa Davida oa ntlo e 'ngoe, o ne a rata Tamare haholo.
2Amanone a tšoenyeha haholo, hoo a bileng a kula ka baka la ho rata khaitselie, Tamare. Tamare e ne e sa le moroetsana, 'me Amanone a sitoa ho mo etsa letho.
3Amanone o ne a e-na le motsoalle ea bohlale haholo, ea neng a bitsoa Jonadabe. E ne e le mora oa Shima, ngoan'abo Davida. 4Jonadabe a re ho Amanone: “Ngoan'a khosi ea ka, molato ke'ng ha u nts'u fella likobong tjee, ka tsatsi le leng le le leng? Ak'u mpolelle hle!”
Amanone a re ho eena: “Ke rata Tamare, khaitseli ea mor'eso Abosalome.”
5Jonadabe a re ho eena: “Tsamaea u e'o robala, u ikulise; e tle ere ha ntat'ao a tlil'o u hloela u re ho eena: ‘Ntate, kea u kōpa: E-re khaitseli ea ka Tamare a ke a tle koano, a tl'o ntokisetsa lijo ke ntse ke mo shebile, a 'ngoathele ka letsoho la hae, ke je.’ ”
6Eaba Amanone oa robala, oa ikulisa. Ha khosi e tlile ho 'mona, Amanone a re ho eona: “Kea u kōpa: Ak'u re khaitseli ea ka Tamare a tle koano, a tl'o nketsetsa likuku tse seng kae, ke ntse ke mo shebile, 'me a mphe tsona ka letsoho la hae, ke je.”
7Davida a rōmela molaetsa ho Tamare, lapeng, a re: “E-ea ha khaitseli ea hao Amanone, u e'o mo lokisetsa lijo.” 8Eaba Tamare o ea ha khaitseli ea hae Amanone, 'me a fumana a robetse. A nka hlama, a e luba Amanone a ntse a mo shebile, eaba o pheha likuku. 9Tamara a tšōla pane, a bea likuku kapele ho Amanone.
Empa Amanone a hana ho ja, a re: “E-re banna bohle ba tsoe.” Eaba banna bohle baa tsoa. 10Joale Amanone a re ho Tamare: “Tlisa lijo ka kamoreng, u mphe tsona ka letsoho la hao, ke je.” Tamare a nka likuku tseo a li apehileng, 'me a li isa ho Amanone, khaitseli ea hae, a le ka kamoreng. 11Eare ha a re o mo nea tsona hore a je, Amanone a mo qhautsa ka letsoho, a re ho eena: “Tl'u robale le 'na, khaitseli ea ka!”
12Empa Tamare a re ho eena: “Che, khaitseli, u se ke ua nqōbella, hobane naheng ea Iseraele ha ho etsoe tjena. Se ke ua etsa ketso ena e manyala. 13Nka shebana le batho joang, ke lihlong? Le uena u tla ba e mong oa banna ba khopo naheng ea Iseraele. Ka baka lena, ak'u buisane le khosi, kea u kōpa, hobane ha e ka ke ea u hanela ka 'na.” 14Empa Amanone a se ke a mo mamela. Kaha a ne a le matla ho feta Tamare, a 'meta, a mo robala.
15Joale Amanone a mo hloea haholo, 'me lehloeo la hae le ne le feta lerato leo a neng a mo rata ka lona pele. Eaba Amanone o re ho eena: “Ema, u tsamaee!”
16Tamare a re ho Amanone: “Che! Ho nteleka joale ke phoso e kholo, e mpe le ho feta eo u nkentseng eona.”
Empa le mona Amanone a se ke a mo mamela. 17Eaba o bitsa mohlankana ea mo sebeletsang, o re: “Ntša mosali enoa ka mona hona joale! U mo notlelle kantle!” 18Mosali enoa o ne a apere seaparo se mebala-bala, hobane barali ba khosi, bao e ntseng e le baroetsana, ba ne ba apara joalo. Mohlanka oa Amanone a ntša Tamare, a mo notlella kantle.
19Tamare a nka molora, a itšèla ka oona hloohong, a hahōla seaparo sa hae se mebala-bala, seo a neng a se apere, a itšoara hloohong, a tsamaea a ntse a bokolla haholo.
20Eaba Abosalome, khaitseli ea Tamare, o re ho eena: “Na khaitseli ea hao Amanone, o robetse le uena? Khutsa hle, khaitseli! Amanone ke khaitseli ea hao ea lapa le leng. Lebala taba ena.” Ka mokhoa o joalo, Tamare a lula tlung ea Abosalome, khaitseli ea hae, a hlomohile.
21Ha khosi Davida a utloela litaba tsena tsohle, a halefa haholo. 22Abosalome a se ke a hlola a buisana ntho efe kapa efe le Amanone, hobane o ne a hloile Amanone, kaha o ne a ile a beta Tamare, khaitseli ea hae.
Abosalome oa iphetetsa
23Kamora' lilemo tse peli, Abosalome a etsa letsema la ho kuta linku mane Baale-Hasore e pel'a Efraime. Eaba o mema bara bohle ba khosi, 24'me a fihla ho khosi, a re: “Bona, mohlanka oa hao o na le letsema la ho kuta linku. Ke kōpa khosi hore e ke e ee le bahlanka ba eona, 'moho le 'na mohlanka oa hao.”
25Khosi ea re ho Abosalome: “Che, ngoan'aka, a re se ke ra ea bohle, esere re tšoha re u imela.” Abosalome a pheèlla khosi, empa ea se ke ea ea, ea mpa mo hlohonolofatsa.
26Eaba Abosalome o re: “Haeba u sa ee, kea kōpa: E-re mor'eso, Amanone, a ee le rōna.”
Khosi ea re ho eena: “A ee le uena hobane'ng?” 27Abosalome a 'na a pheèlla Davida ho fihlela a lumella Amanone le bara bohle ba khosi hore ba ee.
28Abosalome a laela bahlanka ba hae, a re: “Mamelang mona! Ha Amanone a se a tahiloe ke veine, e tle ere ha ke re ho lōna: ‘Ho eena!’ le 'molaee le sa tšabe letho. Ke le laela joalo. Le be sebete, le be bahale!” 29Bahlanka ba Abosalome ba etsa Amanone joalokaha Abosalome a ba laetse. Bara bohle ba khosi ba raoha, ba loabela limmeile tsa bona, ba baleha.
30Eare ba sa ntsane ba le tseleng, Davida a bēheloa, ha thoe: “Abosalome o bolaile bara bohle ba khosi, 'me ha ho le ea mong oa bona ea setseng.” 31Joale khosi ea ema, ea hahōla liaparo tsa eona, ea tjapalla fatše. Bahlanka bohle ba khosi ba ema pel'a khosi, liaparo tsa bona li hahōtsoe.
32Jonadabe, mora oa Shima, ngoan'abo Davida, a bua, a re: “Mong'a ka a se ke a hopola hore bara bohle ba khosi ba bolailoe; ke Amanone feela ea bolailoeng. Hona ho entsoe ka taelo ea Abosalome. O ne a ho rere ho tloha mohl'a letsatsi leo ka lona khaitseli ea hae, Tamare, a neng a betoe ke Amanone. 33Ka baka lena, mong'a ka, khosi e se ke ea itšoenya ka ho nahana hore bara bohle ba eona ba bolailoe, hobane ke Amanone feela ea bolailoeng.”
34Ka nako ena Abosalome o ne a se a balehile. Ha mohlankana oa sebōhōli a phahamisa mahlo, a talima, a bona batho ba bangata ba theosa letsoapo, ba e-tla ka tsela e kamorao ho eena.
35Jonadabe a re ho khosi: “Bona, bara ba khosi ke bana ba fihla! Ho etsahetse feela joalokaha mohlanka oa hao a boletse.”
36Hoba a qete ho bua, bara ba khosi ba fihla, 'me ba bokolla haholo. Khosi le eona le bahlanka bohle ba eona, ba bokolla haholo.
37Empa Abosalome a inea naha, a ea ho Talamai, mora oa Amihude, khosi ea Geshure. Davida eena a llela mora oa hae ka linako tsohle.
38Abosalome a fela a inea naha, a ea Geshure, 'me a hlola teng lilemo tse tharo. 39Ha khosi Davida a se a tetse Amanone, a qala ho hlōlōheloa Abosalome.
