Sheba o fetohela Davida
1Gilegale ho ne ho e-na le monna ea khopo, ea neng a bitsoa Sheba. E ne e le mora oa Bikiri oa Mobenjamine. Sheba a letsa lenaka, a re:
“Ha re amane ka letho le Davida,
mora oa Jese hase letho ho rōna.
Baiseraele,
motho le motho lapeng la hae!”
2Joale banna bohle ba Iseraele ba fetohela Davida, 'me ba latela Sheba, mora oa Bikiri, empa banna ba morabe oa Juda bona ba khomarela khosi Davida, ho tloha Jorodane, ho ea fihla Jerusalema.
3Ha Davida a fihla ha hae Jerusalema, a nka basali ba hae ba mafielo ba leshome, bao a neng a ba siile hae hore ba hlokomele lelapa la khosi, a ba koalla ka tlung, a ba beela molebeli. Davida a ba fepa, empa a se ke a kopanela likobo le bona. Ba lula ba koaletsoe joalo, ho fihlela ba e-shoa, eka ke bahlolohali.
Amasa oa bolaoa
4Khosi ea re ho Amasa: “Nkèpèlè pitso ea banna ba morabe oa Juda, 'me kamora' matsatsi a mararo u be u le mona.” 5Eaba Amasa oa tsamaea, o ea bitsa banna ba morabe oa Juda. Empa a lieha ho fihla, nako eo a neng a e baletsoe ke Davida ea ba ea feta.
6Davida a re ho Abishai: “Sheba, mora oa Bikiri, o kotsi ho rōna le ho feta Abosalome. Phutha bahlanka ba mong'a hao, u mo phalalise, esere a kena metseng e nang le liqhobosheane, 'me a re phonyoha.” 7Bahlabani ba Joabe, le Bakerete, le Bapelete, le banna ba bahale, ba tsoang Jerusalema, ba latela Abishai, 'me ba phalalisa Sheba, mora oa Bikiri.
8Eitse ha ba fihla lefikeng le leholo le Gibeone, Amasa a khahlana le bona. Joabe o ne a apere seaparo sa bohlabani, se tlamiloeng ka leqhama le nang le sabole. Sabole eo e ne e le ka selateng sa eona, e tlameletsoe thekeng ho eena. Ha a ntse a tsamaea, sabole eo ea mōnyōhela fatše.
9Joabe a re ho Amasa: “U ntse u phela, ngoan'eso?” Joabe a mo tšoara ka litelu, ka letsoho le letona, hore a mo ake. 10Empa Amasa a se ke a tsotella sabole e ka letsohong la Joabe. Joabe a mo hlaba ka eona mpeng, mala a petletsehela fatše, 'me Amasa a shoa Joabe a sa mo pheta le ho mo pheta.
Joale bo-Joabe le Abishai ngoan'abo, ba phalalisa Sheba, mora oa Bikiri. 11E mong oa bahlabani ba Joabe a ema pel'a Amasa, 'me a re: “Mang le mang ea latelang Joabe le Davida a fetele ka ho Joabe!” 12Amasa eena a sala a rapaletse kahar'a letša la mali a hae, kahar'a 'mila o moholo. Ha monna eo a bona hore batho bohle ba eme tlekelele! a tlosa setōpō sa Amasa ka 'mileng o moholo, a se hulanyetsa kathōho ho tsela. Ha a bona hore batho bohle ba fihlang moo ba ema tlekelele! eaba o se koahela ka kobo. 13Hoba setōpō sa Amasa se tlosoe 'mileng, batho bohle ba latela Joabe, ba phalalisa Sheba, mora oa Bikiri.
14Sheba a fohla merabe eohle ea Iseraele, a ba a ea fihla Abele-Bete-Maaka le ho Baberi. Bohle ba phutheha, 'me le bona ba mo latela. 15Ha Sheba a le Abele-Bete-Maaka, balateli ba Joabe ba mo etsetsa thibella. Ba tšèla mobu, oa etsa qubu pel'a lerako la motse. Ba thuthuka lerako leo hore ba le lihe. 16Mosali e mong ea bohlale a hōoeletsa a le kahar'a motse, a re: “Theang tsebe, le mamele! Bolellang Joabe, le re: ‘Atamela koano, re ke re tl'o bua!’ ” 17Joabe a atamela, 'me mosali eo a re ho eena: “Na ke uena Joabe?”
Joabe a re: “E, ke 'na Joabe!”
Joale mosali a re ho eena: “Ak'u mamele puo ea lekhabunyane la hao.”
Joabe a re: “Ke mametse!”
18Mosali a bua, a re: “Maele a boholo-holo a re: ‘Tsamaea, u e'o botsa motseng oa Abele,’ ebe taba li felile. 19Motse ona oa heso ke o mong oa metse e ratang khotso, o tšepahalang naheng ea Baiseraele. Empa u batla ho timetsa motse ona, oo e leng 'm'a metse ea Iseraele? Ke ka lebaka la'ng ha u rata ho ripitla motse oo e leng lefa la Morena?”
20Joabe a araba, a re: “Le ho ka! Nke ke ka leka ho o ripitla, kapa ho o timetsa. 21Ha ho joalo. Monna ea tsoang naheng e maralla ea Efraime, ea bitsoang Sheba, mora oa Bikiri, o fetohetse khosi, eena khosi Davida. Neelana ka eena feela, 'me ke tla tloha motseng ona.”
Mosali eo a re ho Joabe: “Ke tla u akhella hlooho ea monna eo le holim'a lerako.”
22Joale mosali eo, ka bohlale ba hae, a ea bua le sechaba sohle sa habo. Sechaba sa khaola hlooho ea Sheba, mora oa Bikiri, sa e akhella Joabe. Eaba Joabe o letsa lenaka, 'me bahlabani ba qhalana, monna ka mong a ikela lapeng la hae. Joale Joabe a khutlela Jerusalema, ho khosi.
Balaoli ba Davida
23Joabe ea e-ba molaoli oa mabōtho 'ohle a Iseraele. Benaea, mora oa Jehoeada, eena ea e-ba molaoli oa lebōtho la Bakerete le Bapelete. 24Adorame eena ea e-ba molaoli oa makhoba. Jehoshafate, mora oa Ahilode, ea e-ba mongoli oa liketsahalo; 25Shefa ea e-ba mongoli oa puso, 'me bo-Sadoke le Abiatare ea e-ba baprista. 26Ira oa Mojaire eena ea e-ba moprista oa Davida.
