1Ntoa ea e-ba telele pakeng tsa ntlo ea Davida le ntlo ea Saule. Davida a 'na a tsoela pele ho matlafala, empa ntlo ea Saule eona ea 'na ea fokola ho-ea-ho-ile.
Bara ba Davida
2Davida a ba le bara ha a le Heborone. Mora oa hae oa matsibolo, ea tsoetsoeng ke Ahinoame oa Mojesereele, ea e-ba Amanone. 3Oa bobeli ea e-ba Kilabe, ea tsoetsoeng ke Abikaele, eo e neng e le mohat'sa mofu Nabale oa Mokaramele. Oa boraro ea e-ba Abosalome, mora oa Maaka, morali oa Talamai, khosi ea Geshure. 4Mora oa bone ea e-ba Adoniea, mora oa Hagite. Oa bohlano ea e-ba Shefatiea, mora oa Abitale. 5Oa botšelela ea e-ba Jitereame, oa mosali oa Davida ea bitsoang Egela. Bana ke ba ileng ba tsoalloa Davida ha a le Heborone.
Qabang ea Ishe-Boshete le Abinere
6Ha ntoa e ntse e loana pakeng tsa ntlo ea Saule le ntlo ea Davida, Abinere a iponahatsa e le eena ea matla ho ba ntlo ea Saule. 7Saule o ne a e-na le mosali oa lefielo eo lebitso la hae e neng e le Risepa, morali oa Aea. Eaba Ishe-Boshete o re ho Abinere: “Ke ka baka la'ng ha u robala le mosali oa lefielo oa ntate?”
8Joale Abinere a halefisoa haholo ke mantsoe ao a Ishe-Boshete, 'me a re: “Na 'na ke ntja e lefuoang ka lesapo naheng ee ea Juda? Ke ile ka tšepahala ho ba lelapa la ntat'ao Saule, le ho bana babo, le ho metsoalle ea hae; ebile ha kea neelana ka uena matsohong a Davida; feela u nqōsa ka phoso ea ho bōkana le mosali eo! 9Molimo a ke a otle Abinere tjena, le ho feta, haeba nke ke ka etsetsa Davida seo Molimo a mo hlapanyelitseng sona, 10e leng ho amoha ntlo ea Saule 'muso, le ho bea Iseraele le Juda tlas'a terone ea Davida, ho tloha Dane ho ea fihla Beeresheba.” 11Eaba Ishe-Boshete o se a le nyaea le koloba, ka baka la ho tšaba Abinere.
Bo-Abinere le Davida baa boelana
12Abinere a rōma maqōsa ho Davida, a re: “Naha ee ke ea mang?” A boela a re: “Bona mona, a re etse selekane le uena, 'me ke tla u thusa hore Baiseraele bohle ba u sale morao.”
13Davida a re: “Ho lokile, ke tla etsa selekane le uena, empa ke batla ntho e le 'ngoe feela ho uena, e leng hore u se ke ua mpona, haese haeba u ka ntlisetsa Mikale, morali oa Saule, pele u e-tla ho tla kopana le 'na.”
14Eaba Davida o rōma maqōsa ho Ishe-Boshete, mora oa Saule, o re: “'Nee mosali oa ka Mikale, eo ke neng ke mo nyale ka maekō a lekholo a Bafilesita.”
15Ishe-Boshete a rōma maqōsa, a amoha Paletiele, mora oa Laishe, mosali oa hae Mikale. 16Paletiele a tsamaea a ntse a lla, a setse mosali oa hae morao, a ba a ea fihla Bahurime. Abinere a re ho eena: “Khutlela hae!” Eaba Paletiele oa khutla.
17Joale Abinere a buisana le baholo ba Iseraele, a re: “Ke khale le batla ho bea Davida hore e be khosi ea lōna. 18Etsang joalo he, hobane Morena o buile ho Davida, a re: ‘Ka letsoho la mohlanka oa ka Davida ke tla namolela sechaba sa ka sa Baiseraele matsohong a Bafilesita le matsohong a lira tsohle tsa sona.’ ” 19Abinere a ba a bua le ba morabe oa Benjamine, a nt'o ea Heborone ho Davida, 'me a 'molella tsohle tseo a lumellaneng ka tsona le Baiseraele le ba ntlo ea Benjamine.
20Eaba Abinere o ea Heborone ho Davida, a e-na le banna ba mashome a mabeli. Davida a etsetsa Abinere, le banna bao a neng a e-na le bona, mokete. 21Abinere a re ho Davida: “Joale ke tla tsamaea, ke e'o bōkellela mong'a ka, khosi, Baiseraele bohle, hore ba tl'o etsa selekane le uena, 'me u tle u buse hohle moo u ratang ho busa teng.” Davida a lumella Abinere hore a tsamaee, 'me eo a ikela ka khotso.
Abinere oa bolaoa
22Joale bo-Joabe le bahlanka ba Davida ba fihla, ba e-tsoa moo ba neng ba hlasetse teng, 'me ba tla ka khapo e ngata haholo. Empa Abinere o ne a se a le sieo Heborone, ho Davida, hobane Davida o ne a se a mo lōkōlōtse, 'me a iketse ka khotso. 23Ha bo-Joabe le lebōtho lohle leo a neng a e-na le lona ba fihla, Joabe a bolelloa, ha thoe: “Abinere, mora oa Nere, o ile a fihla mona ho khosi, 'me khosi e mo lōkōlōtse, o iketse ka khotso.”
24Eaba Joabe o fihla ho khosi, o re: “Ke eng ee, eo u e entseng? Bona mona, Abinere o ne a tlile ho uena; ke ka baka la'ng ha u ile ua mo lokolla, 'me joale a etse ruri? 25Na ha u tsebe hore Abinere, mora oa Nere, o ne a tlile ho tla u thetsa, le ho u bona mafolomabe, le ho tseba tsohle tseo u li etsang?”
26Ha Joabe a e-tsoa ka ho Davida a rōma maqōsa ho sala Abinere morao, 'me maqōsa ao a mo khutlisa ha a le selibeng sa Sira, empa Davida o ne a sa tsebe. 27Hoba Abinere a fihle Heborone, Joabe a mo nkela kathōkoana ho khoro ea motse, eaka o il'o bua le eena ka lekunutu, eaba o mo phehletsa mpeng, a 'molaea ho phetetsa mali a Asaele, ngoan'abo.
28Hamorao, ha Davida a utloa ketso ena, a re: “Mahlong a Morena, 'na le 'muso oa ka ha re na molato le o monyenyane maling ana a Abinere, mora oa Nere. 29Mali ao a botsoe Joabe le bohle ba ntlo ea ntat'ae. Tlung ea Joabe ho 'ne ho be le ea nang le seso se qhitsang, kapa ea nang le lepera, kapa ea holofetseng hoo a tsamaeang ka melamu, kapa ea bolaoang ka sabole, kapa eo e leng mokōpa-kōpa.”
30Ka mokhoa o joalo Joabe le ngoan'abo Abishai ba bolaea Abinere, hobane o ne a ile a bolaea ngoan'abo bona Asaele, ha ba le ntoeng Gibeone.
Abinere oa epoloa
31Joale Davida a re ho Joabe le ho batho bohle ba neng ba e-na le eena: “Hahōlang liaparo tsa lōna, le apare mekotla, le tsamaee kapele ho setōpō sa Abinere le ntse le mo llela.” Khosi Davida eena a sala setōpō morao. 32Eaba ba epela Abinere motseng oa Heborone. Khosi ea phahamisa lentsoe la eona, ea llela lebitleng la Abinere. Sechaba sohle sa lla.
33Khosi ea llela Abinere, ea re:
“Abinere, u shoeletse'ng
joaloka tseketseke?
34U ne u sa tlangoa matsoho,
maoto a hao
a se mahlaahleleng a lethose;
u shoele
joaloka ea bolaoang ke balotsana.”
Sechaba sohle sa boela sa mo llela.
35Joale sechaba sohle sa tla ho Davida, sa re a je e sa ntsane e le motšeare, empa Davida a hlapanya, a re: “Molimo a nkotle tjena, le ho feta, haeba ekare letsatsi le e-s'o likele ka ja bohobe kapa ho hong feela.”
36Sechaba sohle sa hlokomela ntho ena, 'me sa e thabela. Eng kapa eng eo khosi e neng e e etsa, sechaba sohle se ne se bona e lokile. 37Joale sechaba sohle, le Baiseraele bohle ba tseba mohl'a letsatsi leo hore hase khosi e bolaileng Abinere, mora oa Nere.
38Eaba khosi e re ho bahlanka ba eona: “Na ha le tsebe hore kajeno, naheng ee ea Iseraele, ho shoele khosana le mohlabani e moholo? 39Leha ke tlotsitsoe hore ke be khosi, kajeno kea fokola. Banna bana, e leng bara ba Seruea, ba ntlhōtse ka ho hloka mohau. Morena a ke a putse ea entseng bokhopo bona ho ea ka bokhopo boo ba hae.”
