Paulosi o etela Jerusalema
1Ha re se re khaohane le bona, ra kena ka sekepeng, ra toba Kose; ka letsatsi le hlahlamang ra fihla Rodose, 'me ha re tloha moo, ra ea Patara. 2Ra fumana sekepe se tšelelang Fenisia, ra kena ka ho sona, 'me ra tloha. 3Eare hoba re hlahele Sipera, 'me re e nee letsoho le letšehali, ra tšelela Siria ka sekepe, ra emisa Tire, hobane sekepe se ne se tšoanetse ho laolla thōtō teng. 4Ra fumana barutuoa, 'me ra hlola moo matsatsi a supileng. Ka tšusumetso ea Moea ba bolella Paulosi hore a se ke a nyolohela Jerusalema. 5Ha re qetile matsatsi ao, ra tloha, ra tsoela pele, bohle ba re felehetsa, ka basali le ka bana, ho fihlela kantle ho motse. Ra khumama lebōpong la leoatle, ra rapela; 6ra lumelisana, 'me ra kena ka sekepeng, ha bona ba khutlela mahabona.
7Hoba re qete leeto la rōna ho tloha Tire, ra fihla Potolemaise, 'me teng ra lumelisa balumeli, ra hlola le bona tsatsi le le leng. 8Ka la hosasane ra tloha, 'me ra fihla Sesaria. Ra kena ha 'moleli Filipi, e mong oa ba supileng ba neng ba khethoe Jerusalema, ra hlola le eena. 9Monna enoa o ne a e-na le barali ba bane, ba baroetsana, ba neng ba porofeta.
10Ha re hlotse teng matsatsi a mangata, ha fihla moporofeta e mong ea tsoang Judea, ea bitsoang Agabuse. 11A tla ho rōna, a nka leqhama la Paulosi, a itlama maoto le matsoho ka lona, a re: “Moea o Halalelang o bolela tsena: ‘Bajuda ba tla tlama mong'a leqhama lena, tjena, koana Jerusalema, ba neelane ka eena matsohong a balichaba.’ ”
12Eare ha re utloa hona, rōna le ba sebaka seo ra rapela Paulosi hore a se ke a nyolohela Jerusalema. 13Empa Paulosi a araba, a re: “Le etsa'ng ha le lla tjee, le utloisa pelo ea ka bohlōkō? 'Na ha kea itokisetsa ho tlangoa feela, empa le hona ho shoela Jerusalema ka baka la lebitso la Morena Jesu.”
14Eare ha a hana ho rapeleha, ra ineela, ra re: “A ho etsoe thato ea Morena!”
15Kamora' matsatsi ao, ha re se re itokisitse, ra nyolohela Jerusalema. 16Ba bang ba barutuoa ba Sesaria ba ea le rōna; ba re isa ha e mong ea bitsoang Menasone oa Sipera, morutuoa oa khale, eo re neng re il'o hlola le eena.
Paulosi o chakela Jakobo
17Ha re fihla Jerusalema, balumeli ba re amohela ka thabo. 18Ka letsatsi le hlahlamang Paulosi a ea le rōna ho Jakobo, 'me baholo bohle ba ne ba le teng. 19Hoba a ba lumelise, a ba qaqisetsa ka ho tlala, ka tlhahlamano, tseo Molimo a li entseng ho balichaba ka bosebeletsi ba hae.
20Ha ba utloa tsena, ba tlotlisa Molimo, ba re ho Paulosi: “Ua bona, ngoan'eso, hore ho na le likete-kete tsa Bajuda ba lumetseng, 'me bohle ba chesehela Molao. 21Ba boleletsoe hore u ruta Bajuda bohle ba jakileng har'a balichaba ho koenehela Moshe. U re ba se ke ba bōlōtsa bana ba bona, leha e le ho tsamaea ka meetlo. 22Ha ho le joalo, ho ka thoe'ng? Ha ho pelaelo, ba tla utloa hore u tlile. 23Ka lebaka leo, etsa seo re u bolellang sona: Re na le banna ba bane, ba ikanneng. 24Ba nke, u itlhoekise le bona, u ba lefelle hore ba beoloe lihlooho. Bohle ba tla tseba hore ha ho letho litabeng tseo ba ileng ba li bolelloa ka uena, empa le uena u ntse u tsamaea u bōlōkile Molao. 25Ha e le balichaba ba lumetseng, re ile ra ba tsebisa ka lengolo qeto ea rōna ea hore ba ilè tse hlabetsoeng melimo ea bohata, le mali, le lintho tse fenethiloeng, le bohlola.”
26Eaba ka letsatsi le hlahlamang Paulosi o nka banna bao, 'me hoba a itlhoekise le bona, a kena ka Tempeleng, a bolela letsatsi leo nako ea tlhoekiso e tla fela ka lona, ho nt'o hlahisoa nyehelo bakeng sa e mong le e mong oa bona.
Paulosi o tšoaroa ka Tempeleng
27Ha matsatsi a supileng a se a ea fela, Bajuda ba tsoang Asia, ha ba bona Paulosi ka Tempeleng, ba ferekanya letšoele lohle, ba mo tšoara. 28Ba hōoa, ba re: “Banna ba Iseraele, thusang! Monna enoa ke eena ea rutang batho bohle, kahohle, thuto e loantšanang le sechaba, Molao le Qalo ena; ebile o kentse Bagerike ka Tempeleng, o silafalitse Qalo ena e halalelang.” 29Ba ne ba ile ba bona pele ho moo Terofimose oa Efese a e-na le Paulosi motseng, ba hopola eka Paulosi o ile a mo kenya ka Tempeleng.
30Motse oohle oa hlōkōleha, batho ba phalla, ba tšoara Paulosi, ba mo hulela kantle ho Tempele, 'me hang-hang menyako ea koaloa. 31Ha ba ntse ba leka ho 'molaea, molaoli oa lebōtho la ba sekete a tsebisoa hore Jerusalema eohle e moferefereng. 32A nka bahlabani le balaoli ba ba lekholo ka potlako, a phallela ho bona. Eare ha batho ba bona molaoli oa ba sekete le bahlabani, ba khaotsa ho teteka Paulosi.
33Eaba molaoli oa ba sekete oa atamela, o tšoara Paulosi, o laela hore a tlangoe ka mahlaahlela a mabeli, a nt'o botsa hore na ke mang, 'me o entse'ng. 34Joale har'a letšoele ba bang ba hōoa ntho ena, ba bang eane. Kaha molaoli a ne a sitoa ho tseba hoo e leng 'nete ka baka la lerata, a laela hore Paulosi a isoe qhobosheaneng. 35Eare ha Paulosi a fihla mehatong e nyolohang, a tšoanela ho jaroa ke bahlabani ka baka la ho halefa ha letšoele, 36hobane bongata ba sechaba bo ne bo latela, bo ntse bo hōoa, bo re: “'Molaee!”
Paulosi oa ikarabella
37Ha a se a tla kenngoa ka qhobosheaneng, Paulosi a re ho molaoli oa ba sekete: “Na u ka ntumella ho buisana le uena?”
Eaba eo o re: “Na u tseba Segerike? 38Na ha u Moegepeta eloa eo maobanyana moo a neng a tsose moferefere, a isa banna ba kete li 'ne ba babolai nahathothe?”
39Paulosi a re: “'Na ke monna oa Mojuda ea tsoaletsoeng Tarasuse e Silesia; ke moahi oa motseng, e seng oa motsaneng. Joale kea u kōpa, ak'u ntumelle ho bua le sechaba sena.”
40Ha molaoli a mo lumeletse, Paulosi a ema mehatong e nyolohang ea monyako, a phōka sechaba ka letsoho. Ha ho se ho khutsitse tuu! a bua le bona ka Seheberu, a re:
