LIKETSO 5

₁Monna e mong ea bitsoang Ananiase, le mosali oa hae Safira, ba rekisa tšimo. ₂Ka tumellano le mosali oa hae a itšiela karolo ea chelete ea thekiso, 'me a isa e 'ngoe, a e bea maotong a baapostola.

₃Eaba Petrose o re: “Ananiase, ke ka baka la'ng Satane a keneng pelong ea hao hore u thetse Moea o Halalelang, 'me u itšiele karolo ea chelete ea thekiso ea tšimo? ₄Ha e e-s'o rekisoe, na e ne e se ea hao na? Ha e se e rekisitsoe, na chelete e ne e se matleng a hao na? Ke ka baka la'ng u ileng ua rera ka pelong ea hao ho etsa ketso ee? Ha ua thetsa batho, empa u thetsitse Molimo.”

₅Eare ha Ananiase a utloa mantsoe ana, a re fatše sihla! eaba oa shoa. Bohle ba utloileng ba tleloa ke tšabo. ₆Bahlankana ba ema, ba mo phutha, ba mo nkela kantle, ba mo epela.

₇Ha feta lihora tse ka bang tharo, mosali oa hae a kena, a sa tsebe se etsahetseng. ₈Petrose a re ho eena: “Ak'u mpolelle, na le fela le rekisitse tšimo hakaalo?”

Eena a re: “E, hakaalo.”

₉Petrose a re ho eena: “Ke ka baka la'ng le lumellaneng ho leka Moea oa Morena? Utloa liqi tsa ba tsoa epela monna oa hao li monyako; le uena ba tla u nkela kantle.”

₁₀Hang-hang mosali a oela maotong a hae, a shoa. Bahlankana ha ba kena ba fumana a shoele; ba mo nkela kantle, ba ea mo epela pel'a monna oa hae. ₁₁Kereke eohle le bohle ba utloileng tsena ba tšoha haholo.

₁₂Ka matsoho a baapostola ha etsoa mehlolo le limakatso tse ngata har'a sechaba. Balumeli bohle ba phuthehela lethuleng la Solomone ba le maikutlo a le mang. ₁₃Empa ha e le ho ba bang, ho ne ho se le ea mong ea betang pelo ho ikopanya le bona, leha sechaba se ne se ba rorisa. ₁₄Leha ho le joalo, ba lumelang ho Morena ba 'na ba eketseha, e le palo e kholo ea banna le basali. ₁₅Batho ba ne ba tlisa bakuli litseleng, ba ba beile libetheng, le liphateng, e le hore ha Petrose a feta, seriti sa hae bonyane se mpe se sire ba bang ba bona. ₁₆Le bongata bo tsoang metseng e kathōkō ho Jerusalema ba khōbōkana, ba tlisa bakuli le ba tšoenngoang ke meea e litšila, 'me bohle ba folisoa.

₁₇Moprista e Moholo le ba nang le eena, ba mokha oa Basaduke, ba ema lepaketla, ba tlala mohōnō, ₁₈ba tšoara baapostola, ba ba hlahlela chankaneng ea sechaba. ₁₉Empa bosiu lengeloi la Morena la bula menyako ea chankana, la ba ntša, la re: ₂₀“E-eang, le eme ka Tempeleng, 'me le bolelle sechaba litaba tsohle tsa bophelo bona.”

₂₁Ha ba utloile, ba kena ka Tempeleng e sa le hoseng, 'me ba ruta.

Ha Moprista e Moholo le ba nang le eena ba fihla, ba bitsa lekhotla le baholo bohle ba bana ba Iseraele, 'me ha rōmeloa chankaneng hore ho e'o latoa baapostola. ₂₂Empa bahlanka ha ba fihla, ba fumana ba le sieo ka chankaneng. Ha ba khutlile ba bolela, ₂₃ba re: “Re fumane chankana e ntse e koetsoe ka thata, le balebeli ba eme menyako, empa ha re bula ra fumana ho se motho kahare.” ₂₄Ha molaoli oa Tempele, le baprista ba baholo, ba utloa mantsoe ana, ba ipotsa hore na ntho ena ea baapostola e tla fella kae.

₂₅Eaba e mong o fihla a re ho bona: “Helang! Banna bao le neng le ba kentse chankaneng ba eme ka Tempeleng, ba ruta sechaba.” ₂₆Eaba molaoli o ea le bahlanka, 'me ba ba tlisa, feela e se ka likhōka, hobane ba ne ba tšaba sechaba, esere sa ba tlepetsa ka majoe.

₂₇Ha ba ba tlisitse, ba ba emisa ka khotla, 'me Moprista e Moholo a ba botsa, ₂₈a re: “Re le laetse ka thata hore le se ke la ruta ka lebitso lena, empa bonang, le tlatsitse thuto ea lōna Jerusalema, 'me le batla ho re jarisa molato oa ho bolaea motho eo!”

₂₉Eaba Petrose le baapostola baa araba, ba re: “Eka khona ho mameloe Molimo ho e-na le batho. ₃₀Molimo oa bo-ntat'a rōna o tsositse Jesu bafung, eo le 'molaileng ka ho mo thakhisa sefapanong. ₃₁Monna enoa Molimo o mo phahamisitse ka letsoho la hae le letona hore e be 'Musi le Mopholosi, ea tla nea Iseraele pako le tšoarelo ea libe. ₃₂Rōna le Moea o Halalelang, oo Molimo a o neileng ba mo mamelang, re lipaki tsa litaba tsena.”

₃₃Ha lekhotla le utloa, la hlabeha haholo, 'me la rera ho ba bolaea. ₃₄Empa Mofarisi e mong ea bitsoang Gamaleele, eo e neng e le moruti oa Molao, ea hlonepshoang ke sechaba sohle, a ema har'a lekhotla, a laela hore banna bao ba ntšetsoe kantle ho se hokae. ₃₅A nt'o re ho lekhotla: “Banna ba Iseraele, hlokomelang seo le hopotseng ho se etsa ho banna bana. ₃₆Pele ho matsatsi ana ho ile ha hlaha Theudase ea neng a re eena ka mang-mang. Palo ea banna ba mo latelang e ne e ka ba makholo a mane. A bolaoa, 'me bohle ba neng ba lumetse ho eena ba qhalana, ba fetoha lefeela. ₃₇Kamorao ho mona ha hlaha Judase, Mogalelea, mehleng ea ha ho ne ho baloa batho, 'me a khelosa batho, ba mo latela. Le eena monna eo a timela, 'me bohle ba neng ba lumetse ho eena ba qhalana. ₃₈Joale ke re ho lōna: Khaohanang le banna bana, le ba lese. Hobane, haeba morero ona kapa mosebetsi ona ke oa batho, o tla senyeha, ₃₉empa haeba ke oa Molimo, ha le ka ke la ba felisa, esere la fumanoa le le ba loantšang Molimo.” Eaba baa mo mamela.

₄₀Hoba ba bitse baapostola, ba ba shapa, ba ba laea hore ba se hlole ba bua ka lebitso la Jesu, ba nt'o ba lokolla.

₄₁Ha e le baapostola, ba tloha khotla ba nyakaletse, hobane ba fumanoe ba lokeloa ke ho tlontlolloa ka baka la lebitso la Jesu. ₄₂Ka tsatsi le leng le le leng ha baa ka ba phetsa ho ruta le ho khothatsa ka Jesu Kreste, ka Tempeleng, le ka malapeng ka bonngoe.