AMOSE 9

“Pshatla hlooho tsa litšiea,

likosene li sisinyehe,

mathule a pshatlehele

holim'a hlooho tsa bohle,

masalla 'ona

ke tla a bolaea ka sabole;

ha ho le ea mong ea tla baleha,

ha ho le ea mong ea tla phonyoha.

₂Leha ba ka phunyeletsa

ho ea fihla Qalong ea Bafu,

tsoho la ka le tla ba ntša hona moo.

Leha ba ka nyolohela holimo,

holimo maholimong,

le hona moo ke tla ba theola.

₃Leha ba ka ipata

tlhōrōng ea Karamele,

ke tla ba tsoma,

ke ba tšoare hona moo.

Leha ba ka ipatela 'na

ka mpeng ea leoatle,

ke tla laela khanyapa

e ba lōmele hona moo.

₄Leha lira tsa bona li ka ba thōpa,

ke tla laela hore ba bolaeloe moo,

ba bolaeloe hona moo ka sabole.

Ke rerile hore ke ba timetse,

e seng hore ke ba thusetse.”

₅Morena Molimo oa mabōtho

o ama lefatše,

a ame lefatše, ebe lea qhibiliha,

bohle ba phelang ho lona,

ebe baa lla.

Naha eohle

e tla kōkōmōha joaloka Nile,

e nt'o bohlela

joaloka noka ea Egepeta.

₆Eena eo leaho la hae

le leng maholimong,

methèo ea lona

o e hlomme holim'a lefatše;

eena ea bokellang metsi a leoatle,

a a bokelle,

a a tšollele holim'a lefatše;

lebitso la hae ke Morena.

₇“Na lōna Baiseraele,

ho 'na ha le ke Bakushe?”

“Na hase 'na ea ileng

a le ntša naheng ea Egepeta,

Bafilesita le bona

ka ba ntša Kafatore,

Baarame bona

ka ba ntša naheng ea Kire?

₈“Ruri Morena oa mabōtho

o talimile 'muso ona o khopo.

Ke tla o timetsa

holim'a lefatše lohle,

empa ntlo ea Juda

nke ke ka e timetsa kaofela,”

₉“'Na ke tla fela ke etse taelo,

ntlo ea Iseraele ke e hlōkōle,

ke e hlōkōle har'a lichaba tsohle,

ke e hlōkōle

sa koro e hlōkōloa ka sefe,

empa ho se thōllo le e 'ngoe

e oelang fatše.

₁₀Baetsalibe bohle ba sechaba sa ka

ba tla bolaoa, ba bolaoe ka sabole,

ho bolaoe le bohle-bohle ba reng:

‘Koluoa e ke ke be ea re khaoletsa,

e ke ke be ea re oela holimo.’ ”

₁₁“Mohlang oo

ke tla tsosa ntlo ea Davida,

ntlo e seng e oele.

Likheo tsa marako a eona

ke tla li thiba,

lithako tsa eona

le tsona ke li tsose,

ke e hahe,

e nchafale sa mohl'a monene;

₁₂e le hore ba tle ba rue

masalla a Edomo,

le balichaba bohle

ba bitsoang ka lebitso la ka,”

₁₃“Matsatsi aa tla,”

“ao ka 'ona ea kotulang a tla siuoa,

ea kotulang a siuoe ke ea lemang;

ea jalang le eena o tla siuoa,

a siuoe ke ea tlhōtlang morara.

Veine e ncha e tla kolla lithabeng,

e phalle e kopotsa maralleng 'ohle.

₁₄Ke tla khutlisa

chaba sa ka sa Iseraele,

ke khutlise

chaba sa ka bothōpuoeng;

se tla tsosa metse e s'e le masupi,

se e tsose, se phele ho eona.

Se tla lema lirapa tsa morara,

se li leme, se noe veine ea oona;

se tla lema lirapa,

se je tholoana tsa tsona.

₁₅Ke tla tsitsisa Baiseraele

naheng ea bona,

ke ba tsitsise,

ba se hlole ba tlosoa,

naheng eo ke ba abetseng eona,”