BARUKE 1

₁Ana ke mantsoe a buka ea Baruke, eo e leng mora a Neraia, mora oa mora oa Maseia, mora oa Sedekia, mora oa Hasadia, mora oa Hilekia, ao a a ngotseng a le Babilona, ₂selemong sa bohlano, ka la bosupa khoeling, nakong eo Bakaldea ba neng ba se ba hapile Jerusalema ka eona, 'me ba e chesitse ka mollo.

₃Baruke a bala mantsoe a buka ena pontšeng ea Jekonia, mora oa Jehoiakime, khosi ea Juda, le pontšeng ea sechaba sohle se neng se tlile ho mamela buka eo, ₄pontšeng ea marena le ba leloko la borena, pontšeng ea baholo le ea sechaba sohle, ho tloha ka e monyenyane ho isa ho e moholo, le pontšeng ea bohle ba neng ba ahile Babilona pel'a noka ea Sude.

₅Ha ba utloa tsena, ba bokolla, eaba ba itima lijo 'me ba rapela Morena. ₆Ba bokella chelete ka ho ea kamoo e mong le e mong a neng a e-na le matla kateng, ₇'me ba e romela Jerusalema ho moprista Jehoiakime, mora oa Hilekia, mora oa Shallume, ho baprista ba bang, le ho sechaba sohle se neng se phela le eena Jerusalema.

₈Baruke ke eena eo, ka la leshome khoeling ea Sivane, a ileng a lokolleloa lipitsa tse halalelang tsa Ntlo ea Morena tse neng li hapiloe Tempeleng, hore a li khutlisetse naheng ea Juda. E ne e le lipitsa tsa silefera tseo Sedekia, mora oa Josia, khosi ea Juda, a neng a li entse, ₉hoba Nebukadenesare, khosi ea Babilona, a tlose Jekonia Jerusalema, hammoho le mahosana, malala, marena le sechaba se tsoang naheng eohle, 'me a ba tlise Babilona.

₁₀Batho ba ngola, ba re: Re le romela chelete, ke eo; ka eona rekang lihlabo tsa licheso, le tsa ho lefella libe, 'moho le mokubetso; le lokise linyehelo, 'me le li neele aletareng ea Morena Molimo oa rona; ₁₁le be le rapelle bophelo ba Nebukadenesare, khosi ea Babilona, le ba Belshasare, mora oa hae, hore matsatsi a bona a be joaloka matsatsi a leholimo lefatšeng; ₁₂le hore Morena a re fe matla, a bonesetse mahlo a rona, re tle re phele tlas'a moriti oa Nebukadenesare, khosi ea Babilona, le oa Belshasare, mora oa hae, re ba sebeletse matsatsi a malelele, 'me re fumane mohau mahlong a bona. ₁₃Le teng le re rapelle le rona ho Morena Molimo oa rona, hobane re mo sitetsoe, 'me le ho fihlela kajeno bohale ba Morena le khalefo ea hae ha li e-s'o re hatohe. ₁₄Qetellong, balang buka ena, eo re le rometseng eona hore e balloe bohle ka Tlung ea Morena ka letsatsi la mokete oa Maphephe le ka matsatsi a phutheho.

₁₅Le tla re: “Ho loka ke ha Morena oa rona, athe ho apareloa ke lihlong, joaloka kajeno, ke ha rona, ke ha batho ba Juda le baahi ba Jerusalema, ₁₆ke ha likhosi tsa rona le mahosana a rona, baprista ba rona, baporofeta ba rona, le ha bo-ntat'a rona; ₁₇hobane re entse libe mahlong a Morena, ₁₈ra hana ho mo utloa, 'me ra se ke ra mamela lentsoe la Morena Molimo oa rona, le ho latela melao ea Morena eo a re beetseng eona. ₁₉Ho tloha letsatsing leo ka lona Morena a ntšitseng bo-ntat'a rona naheng ea Egepeta, ho fihlela tsatsing lena, re hanne ho utloa Morena Molimo oa rona, 'me re bile bohlasoa ka ho se mamele lentsoe la hae. ₂₀Ka hona litlokotsi, le lithohako tseo Morena a li boletseng ka mohlanka oa hae Moshe nakong eo ka eona a ileng a ntša bo-ntat'a rona naheng ea Egepeta, ho re fa lefatše le kollang lebese le mahe a linotši, li re khomaretse joalokaha ho nts'o le joalo le kajeno. ₂₁Ha rea ka ra mamela lentsoe la Morena Molimo oa rona, leha baporofeta bohle bao a ileng a re romella bona ba re rutile joalo. ₂₂Empa e mong le e mong oa rona o itsamaetse ka ho ea ka khopolo ea pelo ea hae e sa lokang, a sebeletsa melimo esele, 'me a etsa bobe mahlong a Morena Molimo oa rona.