BARUKE 5

₁Jerusalema, hlobola seaparo

sa lillo le mahlomola,

apara botle ba tlotla ea Molimo

ka bosafeleng,

₂u ipope ka kobo ea ho loka

ho tsoang ho Molimo,

hloohong u roale moqhaka oa tlotla

ea Oa bosafeleng;

₃hobane Molimo o tla bontša

khanya ea hao

lichabeng tsohle tse tlas'a letsatsi,

₄'me o tla u rea lebitso le sa tl'o fela,

e leng: “Khotso-ka-toka”

le “Tlotla-ka-borapeli”.

₅Tsoha, uena Jerusalema,

ema qhooeng,

talima nq'a Bochabela,

u bone bana ba hao ba khobokaneng,

ba e-tsoa Bophirima le Bochabela,

ka taelo ea Ea halalelang,

ba thabile hobane Molimo

o ba hopotse.

₆Ba tlohile ho uena ka maoto,

ba khannoa ke lira;

joale Molimo o ba khutlisa

ba jeroe ka tlotla,

joaloka marena teroneng.

₇Molimo o laetse hore ho heletsoe

thaba e 'ngoe le e 'ngoe e phahameng

le maralla a sa fetoheng,

'me ho katoe likhutlo

ho batalatsa lefatše,

hore Iseraele a tle a tsamaee

ho se kotsi,

tlas'a tlotla ea Molimo.

₈Meru le lifate tsohle tse monko

o monate,

li tla haeletsa Iseraele ka moriti,

ka taelo ea Molimo;

₉hobane Molimo o tla tataisa Iseraele

ka thabo leseling la tlotla ea hae,

a mo felehetse ka mohau

le ka ho loka ha hae.