LIPOLELO 14

₁“Lōna le bana ba Morena Molimo oa lōna. Le se ke la iphatsa, kapa la ipeola liphatleng ha le llela bafu. ₂Le sechaba se halalelang sa Morena Molimo oa lōna. Morena o le khethile har'a lichaba tsohle tse teng lefatšeng, hore le be sechaba sa hae.

₃“Le se ke la ja letho le manyala. ₄Tsena ke liphoofolo tseo le ka li jang: khomo, le nku, le poli, ₅khama, le tšèphe, le letsa, le poli-ea-thaba, le hloaele, le tholo, le phuthi. ₆Har'a liphoofolo tsohle, tse nang le tlhako e arohaneng, e nang le likhōlana tse peli, e thuisang, tsena le ka li ja. ₇Ha e le tse thuisang feela, kapa tse nang le likhōlana feela empa li sa thuise, tsona le se ke la li ja. Tsena ke kamele, le 'mutla, le pela. Kahobane lia thuisa, empa ha li na likhōlana, ho lōna ha lia hloeka. ₈Le hoja kolobe e e-na le likhōlana, empa ha e thuise, ka baka leo, ho lōna ha ea hloeka. Le se ke la ja nama ea eona, le sefifi sa eona le se ke la se ama.

₉“Ho liphoofolo tsohle tse phelang metsing, tsena le ka li ja: tsohle tse nang le mapheo le mahehebu le ka li ja. ₁₀Empa tsohle tse se nang mapheo le mahehebu le se ke la li ja, hobane ho lōna ha lia hloeka.

₁₁“Nonyana e 'ngoe le e 'ngoe e hloekileng le ka e ja. ₁₂Empa tsena ke tseo le sa lokeleng ho li ja: ntsu, le seoli, le letlaka, ₁₃le seotsanyana, le phakoe, le bo-'mankholi ka mefuta ea bona, ₁₄le makhoaba ka mefuta ea 'ona, ₁₅le mpshe, le khōhō-ea-lira, le letata, le liphakoe ka mefuta ea tsona, ₁₆le sephōōkoana, le sephōōkō, le makhohlo, ₁₇le 'mamolangoane, le lenong, le seinoli, ₁₈le mokotatsie, le likokolofitoe ka mefuta ea tsona, le mohololi, le 'mankhane.

₁₉“Ntho e 'ngoe le e 'ngoe e nang le mapheo, e hahabang, ho lōna ha ea hloeka, 'me e ke ke ea jeoa. ₂₀Nonyana e 'ngoe le e 'ngoe e hloekileng, le ka e ja.

₂₁“Le se ke la ja nama ea ntho efe le efe e ichoeletseng feela. Le ka e fa bajaki ba metseng ea lōna, la e rekisetsa molichaba, hobane lōna le sechaba se halalelang ho Morena Molimo oa lōna.

“Le se ke la pheha potsanyane ka lebese la 'm'a eona.”

₂₂“Ka selemo se seng le se seng, u tla fana ka karolo e le 'ngoe ho tse leshome, tsa kotulo eohle e tsoang tšimong ea hao. ₂₃Karolo ena e tsoang ho tse leshome tsa koro ea lōna, le tsa veine ea lōna e ncha, le tsa ole ea lōna, le tsa matsibolo a lōna a mehlape ea likhomo le ea linku, le tla e jella kapele ho Morena Molimo oa lōna, sebakeng seo a tla se khetha hore a lule ho sona. Le etse joalo hore le tle le ithute ho tšaba Morena Molimo oa lōna, kamehla. ₂₄Ha Morena Molimo oa lōna, a se a le hlohonolofalitse, 'me eba leeto le le lelele haholo ho lōna, hoo le sitoang ho isa likarolo tsa lōna tse tsoang ho tse leshome, hobane sebaka seo Morena Molimo oa lōna, a se khethileng hore o tla lula ho sona, se le hōle haholo le lōna; ₂₅likhomo tseo tsa lōna le li rekise chelete, 'me chelete eo le e phuthe, le e fuparele, le ee sebakeng seo Morena Molimo oa lōna, a se khethileng. ₂₆Chelete eo le e sebelise ho reka tsohle tseo le li ratang; e ka ba lipholo, kapa linku, kapa veine, kapa joala, kapa tsohle tseo le li batlang. Tsena le li jelle kapele ho Morena Molimo oa lōna, le thabe hammoho le malapa a lōna.

₂₇“Le se ke la furalla Molevi ea motseng oa lōna, hobane eena ha a na kabelo, kapa lefa joaloka lōna.

₂₈“Qetellong ea lilemo tse tharo le tlise karolo tsohle tsa likarolo tse leshome, tsa kotulo ea lōna ea selemo seo, le li bōkelle kahar'a motse oa lōna. ₂₉Joale ho tla tla Molevi, hobane eena ha a na lefa joaloka lōna; ho tle le mojaki, le khutsana, le mohlolohali, e leng ba ahileng kahar'a metse ea lōna; ba je, ba khōre, e le hore Morena Molimo oa lōna, a tle a le hlohonolofatse mosebetsing oohle oo le o etsang.”