LIPOLELO 15

₁“Qetellong ea selemo se seng le se seng sa bosupa le tla leballana melato. ₂Mokhoa oa ho leballana melato ke ona: Motho ka mong, eo ho nkiloeng molato ho eena, o tla leballa mohahabo seo a mo alimileng sona; ha a na ho susutlella mohahabo, kapa ngoan'abo, hore a lefe, hobane selemo sa Morena, sa ho leballana melato, se phatlalalitsoe. ₃Molichaba eena u ka mo susutlella hore a lefe, empa eng kapa eng ea hao, e ho ngoan'eno, u tla mo leballa eona.

₄“Kaha Morena Molimo oa lōna, o tla le hlohonolofatsa naheng eo a tla le nea eona hore e be lefa la lōna, har'a lōna ha ho na ho ba le ea hlokang; ₅haeba feela le mamela lentsoe la Morena Molimo oa lōna, ka hloko, le hlokomela ho phetha melao ena eohle eo ke le laelang eona kajeno. ₆Morena Molimo oa lōna, o tla le hlohonolofatsa joalokaha a buile ho lōna. Le tla alimana ka tsa lōna ho lichaba tse ngata, empa lōna le ke ke la alima letho ho tsona. Le tla busa lichaba tse ngata, empa tsona li ke ke tsa le busa.

₇“Haeba har'a lōna ho e-na le ea hlokang, e le e mong oa bana babo lōna, ea motseng ofe kapa ofe oa metse e naheng eo Morena Molimo oa lōna, a tla le nea eona, le se ke la thatafatsa lipelo tsa lōna, 'me le se ke la tima ngoan'abo lōna ea hlokang. ₈Le mo fe ka letsoho le batsi, le mo alime ho lekana seo a se hlokang, ho ea kamoo a haelloang kateng. ₉Itlhokomeleng, esere ka lipelong tsa lōna la ba le mehopolo e mebe, la re: ‘Selemo sa bosupa, e leng selemo sa ho leballana melato, se atametse;’ ebe ngoan'abo lōna ea hlokang le mo talima ka leihlo le lebe, ha le mo nee letho. Joale o tla lla ka lōna ho Morena, 'me e tla ba le entse sebe. ₁₀Ruri eka khona le mo fe, 'me ha le mo fa lipelo tsa lōna li se ke tsa khanana, hobane ka baka la ketso ena, Morena Molimo oa lōna, o tla le hlohonolofatsa mesebetsing eohle ea lōna, le ho tsohle tseo le li etsang. ₁₁Bahloki ba ke ke ba fela kahar'a naha ea lōna; ka baka leo, kea le laela, ke re: ‘Ho ngoan'abo lōna, le ho mofutsana, le ho ea hlokang, ea naheng ea heno, u fane ka letsoho le batsi.’ ”

₁₂“Ha u rekisetsoa ngoan'eno, e ka ba monna oa Moheberu, kapa mosali oa Moheberu, o tla u sebeletsa ka lilemo tse tšeletseng. Ka selemo sa bosupa u tla mo lokolla. ₁₃Ha u mo lokolla, a se ke a tsamaea a itlhōphere. ₁₄U mo fe haholo ho tse tsoang mohlapeng oa hao, le ho tse tsoang seotlong sa hao, le ho tse tsoang setlhotlelong sa hao. Joalokaha Morena Molimo oa hao, a u hlohonolofalitse, le uena u mo fe joalo. ₁₅U hopole hore le uena u ne u le lekhoba naheng ea Egepeta, 'me Morena Molimo oa hao, a u lopolla. Ke ka baka lena ke u laelang tjena kajeno.

₁₆“Empa haeba lekhoba leo le ka re ho uena: ‘Ha ke rate ho khaohana le uena,’ e le hobane le u rata, le rata le lelapa la hao; le hobane u le phelisa hantle; ₁₇u tla nka elese, u phunye tsebe ea lona e manamisitsoe lemating. Joale lekhoba leo e tla ba la hao kamehla eohle. Le lekhoba la hao la mosali u le etse joalo.

₁₈“Ho se ke ha e-ba thata ho lōkōlla lekhoba la hao, hobane mosebetsi oo le u etselitseng oona ka lilemo tse tšeletseng, o lekanoa ke moputso oa bahlanka ba babeli ba hiriloeng, 'me Morena Molimo oa hao, o tla u hlohonolofatsa ho tsohle tseo u li etsang.”

₁₉“Matsibolo 'ohle a matona, a mehlape ea lōna ea likhomo le ea linku, u tla a khethela Morena Molimo oa hao. U se ke ua sebelisa matsibolo a mohlape oa hao oa likhomo. U se ke ua kuta matsibolo a mohlape oa hao oa linku. ₂₀Ka selemo se seng le se seng, u tla ja matsibolo ana u le kapele ho Morena Molimo oa hao; uena, 'moho le ba lelapa la hao, u a jelle sebakeng seo Morena Molimo oa hao, a tla se khetha. ₂₁Haeba matsibolo a e-na le sepha sa ho hlotsa, kapa sa ho foufala, kapa a e-na le sepha sefe kapa sefe, u se ke ua etsetsa Morena Molimo oa hao sehlabelo ka 'ona. ₂₂U a jelle kahar'a motse oa heno. Ba hloekileng le ba sesila ba je nama ea 'ona ka ho tšoana, joalokaha ba e-ja nama ea tšèphè, kapa nama ea khama. ₂₃Feela bobete ba 'ona bona u se ke ua bo ja. U bo qhalle fatše joalokaha u qhala metsi.”