1“Le se ke la etsetsa Morena Molimo oa lōna, sehlabelo ka khomo, kapa ka nku e nang le sepha, kapa ka eng le eng e nang le sepha, hobane tse joalo ke manyala ho Morena Molimo oa lōna.
2“Haeba har'a lōna, le har'a metse ea lōna, eo Morena Molimo oa lōna, a le neang eona, ho ka fumanoa monna kapa mosali ea etsang bobe mahlong a Morena Molimo oa lōna, ka ho roba selekane sa hae, 3'me eo a iketse ho ea sebeletsa melimo e meng, a e khumamela, kapa a khumamela letsatsi, kapa khoeli, kapa linaleli life kapa life, e leng tseo ke sa le laelang tsona; 4ha lōna le bolelloa, 'me le utloa taba ena, le e batlisise ka hloko. Haeba e le 'nete, 'me manyala a joalo a entsoe naheng ea Iseraele, 5monna eo, kapa mosali eo ea entseng ntho eo e manyala, a ntšetsoe kantle ho motse, le mo tlepetse ka majoe, a be a shoe. 6Ka bopaki ba lipaki tse peli, kapa tse tharo, eo ea lokelang ho shoa a bolaoe, empa ka bopaki ba paki e le 'ngoe, a ke ke a bolaoa. 7Lipaki e be tsona tse qalang ho mo tlepetsa ka majoe, ho ntan'o latela sechaba. Le tlose bobe bona har'a lōna.
8“Haeba taba e ahlōloang e u imela, e ka ba taba ea polao, kapa ea tsekisano, kapa ea ho ntšana likotsi, kapa taba efe le efe ea ho se utloane kahar'a metse ea lōna, u tsamaee, u ee sebakeng seo Morena Molimo oa lōna, a tla se khetha. 9Ha u fihla ho baprista, e leng Balevi, le ho moahlōli ea teng ka nako eo, u botse, 'me bona ba tla u bolella kamoo nyeoe e ka ahlōloang kateng. 10Uena u tle u latele kahlōlo eo ba tla u bolella eona, ba le sebakeng seo Morena a tla se khetha, 'me uena u hlokomele ho etsa kamoo ba tla u laela kateng. 11Ho ea ka Molao oo ba tla u bolella oona, le ho ea ka kahlōlo eo ba tla u bolella eona, uena u etse joalo. U se ke ua ba ua kheloha kahlōlo eo ba tla u bolella eona. 12Motho ea ikhōhōmōsang, ea sa mameleng moprista ea sebeletsang kapele ho Morena, kapa ea sa mameleng moahlōli, ea joalo o tla bolaoa. Le tla tlosa bobe joale sechabeng sa Iseraele. 13Sechaba sohle se tla utloa taba ena, se tšabe, 'me se se ke sa hlola se ikhōhōmōsa.”
Melao e busang likhosi
14“Ha le fihla naheng eo Morena Molimo oa lōna, a le neang eona, e se e le ea lōna, le se le ahile ho eona, 'me le re: ‘Re tla ikhethela khosi joaloka lichaba tsohle tse re pota-potileng;’ 15le tla fela le ikhethele khosi eo Morena Molimo oa lōna, a tla e khetha. Le tla ikhethela khosi har'a bana babo lōna, le se ke la ikhethela molichaba eo e seng ngoan'abo lōna. 16Feela khosi eo e se ke ea ba le lipere tse ngata, esere ea etsa hore sechaba se khutlele Egepeta ho ea reka lipere, hobane Morena o itse ho lōna: ‘Le ke ke la hlola le khutlela ka tsela ena.’ 17Khosi eo e se ke ea nyala basali ba bangata, esere ea kheloha. E se ke ea ipokellela silefera le khauta.
18“Ha khosi eo e se e lutse holim'a terone ea 'muso oa eona, e tle e ingolle Molao ona o bukeng e bolokiloeng ke baprista ba Balevi. 19Molao oo o be ho khosi, e o bale ka matsatsi 'ohle a ho phela ha eona, e le hore e tle e ithute ho tšaba Morena Molimo oa lōna, le ho bōlōka lipolelo tsohle tsa Molao, le litaelo tsena, le ho li phetha. 20Khosi e se ke ea ikhōmōsetsa bana babo eona, e se ke ea kheloha Molao, e le hore e tle e phele halelele 'musong oa eona, eona le bana ba eona, har'a sechaba sa Iseraele.”
