Moetlo oa lilopotsiea
1“Ha le se le fihlile naheng eo Morena Molimo oa lōna, a le neang eona e le lefa, hore e be ea lōna, le se le ahile ho eona, 2u tla nka lilopotsiea tsa litholoana tsohle tse tsoang mobung oa naha eo Morena Molimo oa lōna, a le neang eona. U li kenye ka serōtōng, ebe u ea sebakeng seo Morena Molimo oa lōna, a tla se khetha hore a lule ho sona. 3U tla ea ho eo e leng moprista ka nako eo, u re ho eena: ‘Kajeno ke bolela ho Morena Molimo oa ka, hore ke fihlile naheng eo Morena a neng a hlapanyetse bo-ntat'a rōna hore o tla re nea eona.’
4“Moprista o tla nka serōtō matsohong a hao, a se bee fatše kapele ho aletare ea Morena Molimo oa hao. 5Joale uena u tla bua u le kapele ho Morena Molimo oa hao, u re: ‘Ntate e ne e le Moarame oa moleleri, a theohela Egepeta, a jaka teng le batho ba 'maloana. Empa ha a se a le moo ea e-ba sechaba se seholo, se matla, se sengata. 6Baegepeta ba re tšoara hampe, ba re hlorisa, ba re sebelisa ka thata. 7Eaba re llela Morena Molimo oa bo-ntat'a rōna, 'me Morena a utloa sello sa rōna, a bona matšoenyeho a rōna, le mosebetsi oa rōna o boima, le khatello ea rōna. 8Morena a re ntša naheng ea Egepeta ka matla a hae a maholo, le ka letsoho le otlolohileng, le ka litšōso tse kholo, le ka lipontšo, le ka mehlolo. 9A re tlisa sebakeng sena, a re nea naha ena, e leng naha e phallang lebese le mahe a linotši. 10Joale bona, ke tlisitse lilopotsiea tse tsoang mobung oo u 'neileng oona, Morena.’ U tla li bea fatše, kapele ho Morena Molimo oa hao, u mo khumamele. 11Uena, le ba lelapa la hao, le Molevi, le mojaki ea teng har'a lōna, le tla ithabisa ka tsena tsohle tse molemo, tseo Morena Molimo oa hao, a u neileng tsona.
12“Ka selemo sa boraro, e leng selemo sa ho ntša karolo e le 'ngoe ho tse leshome, ha u qetile ho ntša likarolo tseo tsohle tsa tse leshome tsa kotulo ea hao, u li nee Molevi, le mojaki, le khutsana, le mohlolohali, hore le bona ba tle ba je, ba khōre, ba le sechabeng sa heno. 13U tla bua u le kapele ho Morena Molimo oa hao, u re: ‘Ke ntšitse lintho tse halalelang ka tlung, ke bile ke li neile Molevi, le mojaki, le khutsana, le mohlolohali, ho ea ka molao oohle oa hao, oo u ntaetseng oona. Ha kea kheloha melao ea hao, 'me ha kea e lebala. 14Ha kea ja letho la tsona ha ke ntse ke le bofifing; kapa ka tlosa letho la tsona ha ke ntse ke le sesila; kapa ka nyehella bafu ka tsona. Ke mametse lentsoe la Morena Molimo oa ka. Ke entse tsohle ho ea kamoo u ntaetseng kateng. 15Talima tlase, u le leahong la hao le halalelang, le leholimong, u hlohonolofatse Iseraele, sechaba sa hao, le mobu oo u re neileng oona, e leng naha e phallang lebese le mahe a linotši, joalokaha u ne u hlapanyetse bo-ntat'a rōna.’
Sechaba se halalelang sa Morena
16“Ka letsatsi lena, Morena Molimo oa hao, o u laela hore u phethe melao ena, le litaelo tsena. Ka baka leo, u tla li bōlōka, u li phethe ka pelo ea hao eohle, le ka moea oa hao oohle. 17Kajeno u ikanetse hore Morena e tla ba Molimo oa hao, le hore u tla tsamaea litseleng tsa hae, u bōlōke litaelo tsa hae, le melao ea hae, le litemoso tsa hae, 'me u mamele lentsoe la hae. 18Kajeno Morena o le amohetse hore le be sechaba seo e leng sa hae, joalokaha a le tšepisitse; le hore le bōlōke melao eohle ea hae. 19Ka thoriso, le ka botumo, le ka hlompho, o tla le phahamisetsa kaholimo ho lichaba tsohle tseo a li bōpileng, e le hore le tle le be sechaba se halalelang sa Morena Molimo oa hao, joalokaha a tšepisitse.”
