LIPOLELO 28

₁“Haeba u mamela lentsoe la Morena Molimo oa hao ka hloko, u hlokomela ho phetha melao eohle ea hae, eo ke u laelang eona kajeno, Morena Molimo oa hao o tla u phahamisa ho feta lichaba tsohle tsa lefatše. ₂Mahlohonolo ana 'ohle e tla ba a hao, a u aparele, hobane u tla be u mamela lentsoe la Morena Molimo oa hao:

₇“Morena o tla etsa hore lira tsa hao, tse u tsohetseng matla, li hlōloe u ntse u li bona. Ha li u futuhela li tla tla li tsamaea ka tsela e le 'ngoe, empa ha li u baleha li tla phasaphasa ka tsela tse ngata.

₈“Morena o tla hlohonolofatsa lisiu tsa hao, le tsohle tseo u li etsang; a u hlohonolofatse naheng eo Morena Molimo oa hao a u neang eona.

₉“Morena o tla u etsa sechaba se halalelang sa hae, joalokaha a u hlapanyelitse, haeba u bōlōka melao ea Morena Molimo oa hao, 'me u tsamaea litseleng tsa hae. ₁₀Lichaba tsohle tsa lefatše li tla elelloa hore u bitsoa ka lebitso la Morena, 'me li tla u tšaba. ₁₁Morena o tla u atlehisa haholo ka ho atisa bana ba hao, le manamane a likhomo tsa hao, le litholoana tsa masimo a hao, naheng eo Morena a e hlapanyelitseng bo-ntat'ao hore o tla u nea eona.

₁₂“Morena o tla u bulela letlōle la hae, e leng leholimo, a nesetse naha ea hao pula ka nako ea eona, a hlohonolofatse le mesebetsi eohle eo u e etsang. U tla alimana ka tsa hao ho lichaba tse ngata, empa uena u ke ke ua alima letho ho tsona. ₁₃Morena o tla u etsa hlooho, e seng mohatla. U tla ba kaholimo, u ke ke ua ba katlase, haeba u mamela melao ea Morena Molimo oa hao, eo ke u laelang eona kajeno, hore u e hlokomele, 'me u e phethe. ₁₄U se ke ua kheloha lentsoe leha le le leng la mantsoe ao ke u laelang 'ona kajeno. U se ke ua khelohela ka ho le letona kapa ka ho le letšehali, ua latela melimo e meng, ua e sebeletsa.

₁₅“Empa haeba u sa mamele lentsoe la Morena Molimo oa hao, u sa hlokomele ho phetha melao eohle ea hae, le litaelo tsohle tsa hae, tseo ke u laelang tsona kajeno, lithōhako tsena tsohle li tla ba holim'a hao, li u khomarele.

₂₀“Morena o tla u rōmela bomalimabe, le pherekano, le ho hloka katleho mesebetsing eohle eo u e etsang, ho fihlela u timela, u e-shoa hang-hang, ka baka la liketso tsa hao tse khopo, tseo u mphuraletseng ka tsona.

₂₁“Morena o tla etsa hore lefu la seoa le u khomarele, ho fihlela a u timetsa naheng eo u eang ho eona ho e hapa. ₂₂Morena o tla u otla ka lefuba, le ka feberu, le ka mokhohlane, le ka mocheso o kang oa mollo, le ka komello, le ka moea o batang, le ka hlobo. Tsena le tla u salama ho fihlela u e-shoa. ₂₃Leholimo le u okametseng le ke ke la nesa pula, mobu oo u tsamaeang holim'a oona o tla ba sengangata joaloka tšepe. ₂₄Bakeng sa pula, Morena o tla tlisetsa naha ea heno lerōle; le tla theohela ho uena le e-tsoa leholimong, ho fihlela u timela.

₂₅“Morena o tla etsa hore u hlōloe ke lira tsa hao. Ha u li futuhela u tla ea u tsamaea ka tsela e le 'ngoe, empa ha u li baleha u tla phasaphasa ka tsela tse ngata. U tla ba 'mutl'a-lintjeng ho mebuso eohle ea lefatše. ₂₆Setōpō sa hao se tla jeoa ke matlaka, le libatana tsa naha, 'me ha ho motho ea tla li tšosa.

₂₇“Morena o tla u otla ka mathōpa joaloka Baegepeta, le ka lihlahala, le ka lekhoèkhoè, le ka lekhōphō, 'me tsena li ke ke tsa phekoloa. ₂₈Morena o tla u otla ka bohlanya, le ka bofofu, le ka pherekano. ₂₉U tla phōphōletsa e le motšeare, joalokaha sefofu se phōphōletsa lefifing, 'me ha ho letho leo u tla atleha ho lona. U tla hatelloa, u amohuoe tsa hao kamehla, empa ha ho ea tla u namolela.

₃₀“U tla nyala mosali, empa o tla robaloa ke monna e mong. U tla haha matlo, empa u ke ke ua phela ka ho 'ona. U tla lema lirapa tsa morara, empa u ke ke ua ja litholoana tsa tsona. ₃₁Pholo ea hao e tla hlajoa u ntse u e bona, empa u ke ke ua ja nama ea eona. U tla amohuoa tonki ea hao ka mahahapa, 'me e ke ke ea hlola e khutlisetsoa ho uena. Nku ea hao e tla neoa lira tsa hao, empa ha ho ea tla u namolela. ₃₂Bara ba hao le barali ba hao ba tla neoa sechaba se seng, moo u ntseng u bona; u tla ba hlōlōheloa ka linako tsohle, empa u se na matla a ho etsa letho. ₃₃Litholoana tsa naha ea heno, le matla 'ohle a hao, tsena li tla jeoa ke sechaba seo u sa se tsebeng, empa uena u tla hatelloa, u robokeloe kamehla. ₃₄Tseo mahlo a hao a tla li bona li tla u hlantša. ₃₅Morena o tla u otla ka mathōpa a tla u tsoa mangoeleng le litlhafung, a ke keng a phekoloa. A tla u bereha ho tloha bohatong ba leoto, ho ea fihla har'a hlooho.

₃₆“Uena, hammoho le khosi ea hao, eo u tla e bea teroneng, Morena o tla u isa sechabeng seo uena le bo-ntat'ao le sa kang la se tseba, 'me hona teng u tla sebeletsa melimo e meng ea lehong, le ea majoe. ₃₇Har'a lichaba tsohle, tseo Morena a tla u isa ho tsona, u tla ba setsoto, u be pale, u be mohlolo.

₃₈“U tla jala peō e ngata tšimong, empa u tla kotula hanyenyane, hobane litsie li tla e ja. ₃₉U tla lema lirapa tsa morara, u o hlaolele, empa u ke ke ua noa veine ea oona, kapa ua o kotula, hobane o tla jeoa ka sebōkō. ₄₀U tla ba le lifate tsa mohloaare hohle naheng ea heno, empa u ke ke ua itlotsa ka ole, hobane litholoana tsa mohloaare oa hao li tla hlōhlōreha. ₄₁U tla tsoala bara le barali, empa e ke ke ea e-ba ba hao, hobane ba tla ea bothōpuoeng. ₄₂Lifate tsohle tsa hao, le litholoana tsa naha ea heno, li tla jeoa ke litsie.

₄₃“Mojaki ea jakileng ha heno o tla u phahamela haholo-holo, empa uena u tla theohela tlase-tlase. ₄₄O tla u alima tsa hae, empa uena u tla hloka seo u ka mo alimang sona. Eena e tla ba hlooho, empa uena u tla ba mohatla.

₄₅“Lithōhako tsena tsohle li tla ba holim'a hao, li u salame, li u tšoare, ho fihlela u timela, hobane u tla be u sa ka ua mamela lentsoe la Morena Molimo oa hao; u sa ka ua bōlōka melao ea hae, le litaelo tsa hae, tseo a u laetseng tsona. ₄₆Lithōhako tsena li tla ba holim'a hao e le pontšo le mohlolo, li be le holim'a litlōhōlō tsa hao kamehla eohle, ₄₇hobane u tla be u sa ka ua sebeletsa Morena Molimo oa hao ka nyakallo, le ka pelo e thabileng, ka baka la ho raha ha hao ke monono. ₄₈Ka baka leo, u tla sebeletsa lira tsa hao, tseo Morena Molimo oa hao a tla u rōmella tsona, u lapile, u nyoriloe, u hlōbōtse, u hloka lintho tsohle. Li tla bea joko ea tšepe molaleng oa hao, ho fihlela li u timetsa.

₄₉“Morena o tla u tlisetsa sechaba se tsoang hōle, pheletsong ea lefatše, se e-tla joaloka ntsu ha e fofa; sechaba seo u sa tsebeng puo ea sona; ₅₀sechaba se lifahleho li tšabehang, se sa tl'o khathalla maqheku, kapa sa qenehela ba bacha. ₅₁Se tla ja tsoala ea liphoofolo tsa hao, le litholoana tsa naha ea heno, ho fihlela se le timetsa. Ha se na ho u siela koro, kapa veine, kapa ole, kapa manamane a likhomo tsa hao, kapa tsoala ea mehlape ea hao, ho fihlela se u timetsa. ₅₂Se tla thibella likhoro tsa metse ea heno, ho fihlela marako a hao, a phahameng, a liqhobosheane, ao u a tšepang, a heleha naheng eohle ea heno. Se tla thibella likhoro tsohle tsa heno, naheng eo Morena Molimo oa hao a u neileng eona.

₅₃“Tsietsing ena ea ho thibelloa, eo lira li tla u etsetsa eona, u tla ja bana ba hao, e leng nama ea bara ba hao, le ea barali ba hao, bao u ba neiloeng ke Morena Molimo oa hao. ₅₄Monna ea bonolo, ea bokotsoang haeno, o tla sheba ngoan'abo, le mosali oa hae eo a mo ratang haholo, le bana ba hae ba sa setseng, ka leihlo le lebe. ₅₅A ke ke a fa ofe kapa ofe oa bona, nama ea bana ba hae, bao a tla ba ja, hobane ha a sa saletsoe ke letho ka baka la thibella ena, le tsietsi ena eo lira li tla u etsetsa eona likhorong tsohle tsa metse ea heno. ₅₆Mosali ea bonojoana, ea bokotsoang haeno, ea neng a ke ke a leka le ho hata fatše ka baka la bonolo ba hae, le ho bokotsoa, o tla sheba monna oa hae, eo a mo ratang haholo, le mora oa hae, le morali oa hae, ka leihlo le lebe. ₅₇Kobo ea ngoana oa hae oa lesea, e tsoang pakeng tsa linoka tsa hae, o tla e ja ka lekunutu; a je esita le bana bao a ba tsoetseng, hobane a hloka tsohle ka baka la thibella ena, le tsietsi ena, eo lira tsa hao li tla u etsetsa eona likhorong tsohle tsa metse ea heno.

₅₈“Haeba u sa hlokomele ho phetha mantsoe 'ohle a molao ona, a ngotsoeng bukeng ena, le ho tšaba lebitso lena le tlōtlehang, le tšabehang, la Morena Molimo oa hao, ₅₉Morena o tla u otla ka mafu a seoa a makatsang, uena le litlōhōlō tsa hao; e be mafu a seoa a maholo, a sa foleng, le maloetse a bohlōkō, a sa foleng. ₆₀Hape o tla u tlisetsa mafu 'ohle a Egepeta, ao u neng u a tšaba, 'me a tla u khomarela; ₆₁hape-hape le maloetse 'ohle, le lioa tsohle tse sa ngoloang Bukeng ea Molao ona. Morena o tla u tlisetsa tsona, ho fihlela u timela. ₆₂Le tla sala le le 'maloana ka palo, le hoja le ne le le letšoele le lekaalo ka linaleli tsa leholimo, hobane ha ua ka ua mamela lentsoe la Morena Molimo oa hao.

₆₃“Joalokaha Morena a ne a thabele ho le atlehisa, le ho le ngatafatsa, ka mokhoa o joalo Morena o tla thabela ho le timetsa, 'me le tla tlosoa lefatšeng leo le eang ho lona hore e be la lōna. ₆₄Morena o tla le qhalakanya har'a lichaba tsohle, ho tloha pheletsong e 'ngoe ea lefatše, ho isa pheletsong e 'ngoe ea lefatše, 'me hona moo le tla sebeletsa melimo e meng, eo lōna le bo-ntat'a lōna le sa kang la e tseba, e leng ea lehong le ea lejoe. ₆₅Har'a lichaba tseo le ke ke la fumana boiketlo, le maoto a lōna a tla hloka moo a ka hatang teng. Morena o tla etsa hore lipelo tsa lōna li tšoenyehe, mahlo a lōna a fifale, meea ea lōna e hlomohe. ₆₆Le tla phela ka matsoalo, le be le tšabo motšeare le bosiu, le se ke la phela ka boiketlo. ₆₇Hoseng le tla re: ‘Hoja e ne e le ka phirimana!’ Ka phirimana le re: ‘Hoja e ne e le hoseng!’ e le ka baka la tšabo eo lipelo tsa lōna li tla tšaba ka eona, le ka baka la tseo le tla li bona ka mahlo a lōna. ₆₈Morena o tla le khutlisetsa Egepeta hape ka likepe, ka tsela eo ke ileng ka bua ka eona ho lōna, ka re: ‘Le ke ke la hlola le e bona hape.’ Teng le tla ithekisa ho lira tsa lōna, hore le be makhoba le makhabunyane, empa ha ho ea tla le reka.”