Molao o moholo
1“Ena ke melao, le litaelo, le litemoso tseo Morena a laetseng hore le li rutoe, le tle le li phethe naheng eo le tla tšelela ho eona, hore e be ea lōna. 2Ha u tšaba Morena Molimo oa hao, 'me ka matsatsi 'ohle a bophelo ba hao, u bōlōka melao eohle ea hae, le litaelo tsa hae, tseo ke u laelang tsona, uena, le mora oa hao, le setlōhōlō sa hao, le tla phela halelele. 3Mamela he, uena Iseraele, 'me u hlokomele ho e phetha, e le hore u tle u atlehe, 'me u ngatafale haholo, ha u le naheng e phallang lebese le mahe a linotši, joalokaha Morena Molimo oa bo-ntat'ao, a ile a u tšepisa.
4“Mamela, Iseraele! Morena ke Molimo oa rōna, ke eena Morena a le mong feela. 5U tla rata Morena Molimo oa hao, ka pelo ea hao eohle, le ka moea oa hao oohle, le ka matla a hao 'ohle. 6Mantsoe ana ao ke u laelang 'ona hona kajeno a be ka pelong ea hao. 7U a rute bana ba hao ka hloko, u bue ka 'ona ha u lutse ka tlung ea hao, leha u tsamaea tseleng, leha u paqame, leha u tsoha. 8Mantsoe ana u a tlamelle letsohong la hao e le pontšo, a be joaloka sekōla phatleng ea hao. 9U a ngole likoseneng tsa mamati a hao, le holim'a likhoro tsa motse oa hao.
10“Ha Morena Molimo oa hao, a se a u fihlisitse naheng eo a ileng a e hlapanyetsa bo-ntat'ao Aborahama, le Isaka, le Jakobo, 'me a u neile metse ea teng e meholo, e metle, eo uena u sa kang ua e haha; 11le matlo a tletseng lintho tsohle tse molemo, tseo u sa kang ua li kenya ka ho 'ona; le mafulu ao u sa kang ua a cheka; le masimo a morara, le lifate tsa mohloaare, tseo u sa kang ua li lema, uena u tla ja, u khore. 12Joale u itlhokomele, esere ua lebala Morena ea u ntšitseng naheng ea Egepeta, moo u neng u le lekhoba teng.
13“U tšabe Morena Molimo oa hao, u sebeletse eena, u ikane ka lebitso la hae. 14U se ka ua latela melimo e meng, ea lichaba tse u pota-potileng, 15esere khalefo ea Molimo oa hao ea u tlōkōmela, a u timetsa lefatšeng, hobane Morena Molimo oa hao, ea phelang le uena, ke Molimo ea boulelang.
16“U se ke ua leka Morena Molimo oa hao, joalokaha u ile ua mo leka ha u le Masa. 17Melao ea Morena Molimo oa hao, le litemoso tsa hae, le litaelo tsa hae, tseo a u laetseng tsona, u li bōlōke ka hloko. 18Etsa ho lokileng le ho hotle mahlong a Morena, e le hore u tle u atlehe, u tsebe ho kena naheng e ntle, eo Morena a e hlapanyelitseng bo-nt'at'ao 'me u e rue. 19U tla leleka lira tsohle tsa hao kapele ho uena, joalokaha Morena a buile.
20“Ka nako e tlang, ha mora oa hao a u botsa, a re: ‘Litemoso tsee, le melao ee, le litaelo tsee, tseo Morena Molimo oa rōna, a u laetseng tsona, li bolela'ng?’ 21Uena u tle u re ho mora oa hao: ‘Re ne re le makhoba a Faro, naheng ea Egepeta. Morena a re ntša moo Egepeta ka letsoho la hae le matla. 22Moo re ntseng re bona, Morena o ile a etsetsa Faro, le ba ntlo ea hae, le Baegepeta lipontšo, le mehlolo e tšosang. 23Rōna o ile a re ntša moo, hore a re tlise koano ho re nea naha eo a ileng a e hlapanyetsa bo-ntat'a rōna. 24Morena o ile a re laela hore re phethe melao ena eohle, re tšabe Morena Molimo oa rōna, e le hore re tle re atlehe kamehla, re phele joalokaha re phela kajeno. 25E tla ba re etsa toka ha re ka hlokomela ho phetha melao ena eohle, kapele ho Morena Molimo oa rōna, joalokaha a re laetse.’ ”
