Bana le batsoali ba bona
1Lōna bana, mamelang batsoali ba lōna ka baka la Morena, hobane hona ke tšoanelo ea lōna. 2“Hlompha ntat'ao le 'm'ao.” Ona ke molao oa pele o nang le tšepiso e reng: 3“U tla atleha, 'me u phele halelele lefatšeng.”
4Le lōna bo-ntat'a bana, le se ke la khentša bana ba lōna, empa le ba hōlisetse Morena ka ho ba khalemela le ho ba ruta hantle.
Makhoba le beng ba 'ona
5Lōna makhoba, mamelang beng ba lōna ba lefatše ka tšabo, le ka thōthōmelo, le ka botšepehi, joaloka hoja le sebeletsa Kreste. 6Hona le se ke la ho etsa feela ha ba le teng, joaloka ba ratang ho khahlisa batho, empa joaloka makhoba a Kreste a etsang thato ea Molimo ka pelo eohle. 7Le ba sebeletse ka moea o motle, joaloka hoja le sebeletsa Morena, e seng batho. 8Tsebang hore motho ka mong o tla fumana moputso ho Morena, ka baka la tsohle tse lokileng tseo a li etsang, le haeba motho eo e le lekhoba kapa molokolohi.
9Le lōna beng ba makhoba, le a etse joalo, le sa a sokele. Tsebang hore lōna le 'ona le na le Morena a le mong maholimong, ea sa eeng ka tšobotsi.
Toantšo ea bokhopo
10Ke qetella ka ho re: Imatlafatseng ka matla a maholo a Morena. 11Hlomelang ka lihlomo tsohle tsa Molimo, hore le tle le tsebe ho qhela maraba a Diabolosi. 12Ha re loane le motho oa nama le mali, empa re loana le meea e busang, le e laolang, le e renang holim'a lefatše lena la lefifi, e leng meea e khopo, e sebakeng. 13Ka baka leo, nkang lihlomo tsohle tsa Molimo, e le hore, mohla ho leng hobe, le tle le tsebe ho ema senna ho isa qetellong. 14Kahoo e-bang malala-a-laotsoe, 'nete e be leqhama la lōna, ho loka ho sireletse lifuba tsa lōna, 15mafōlōfōlō a ho bolela molaetsa o molemo oa khotso, e be meqathatso ea lōna. 16Haholo-holo tšoarang thebe ea tumelo eo ka eona le ka tsebang ho tima malakabe a metsu eohle e tukang ea E Mobe. 17Roalang katiba ea tšepe ea pholoho, le tšoare sabole ea Moea, e leng lentsoe la Molimo. 18Lithapelong le likōpong tsohle, le 'ne le rapele ka Moea ka nako tsohle. Le falimehele ho rapella balumeli bohle ka tiisetso.
19Le 'na le nthapelle hore ke neoe ho bolela molaetsa o molemo, ke phatlalatse sephiri sa oona ka sebete. 20Leha ke le litlamong, ke ntse ke le leqosa la oona. Nthapelleng hore ke tle ke bue ka molaetsa ona ka sebete, joalokaha ke tlamehile.
Litumeliso tsa ho qetela
21Joale, hore le tle le tsebe tsa ka, tseo ke li etsang, Tikikose ngoan'eso ea ratehang, mosebeletsi ea tšepahalang oa Morena, o tla le bolella tsona. 22Ke mo rōmetse hona hoo ho lōna, hore le tle le tsebe tsa rōna, 'me a khothatse lipelo tsa lōna.
23Khotso, le lerato, le tumelo, tse tsoang ho Molimo Ntate le ho Morena Jesu Kreste, li ke li be le bana babo rōna bohle. 24Mohau o ke o be le bohle ba ratang Morena oa rōna Jesu Kreste ka lerato le sa feleng.
