Taelo ea khosi e pholosang Bajuda
1Ho latelang ke kopi ea lengolo lena:
“Khosi e Kholo Ahashuerushe o lumelisa babusi ba litikoloho tse lekholo le mashome a mabeli a metso e supileng, ho tloha India ho ea fihla Ethiopia, le babusuoa bohle ba tšepahalang 'musong oa hae.
2“Batho ba bangata, ha kamehla ba tšoaroa hantle, ka mosa o moholohali oa bathusi ba bona, ke moo ba ikhohomosang haholo ho feta. 3Ha ba batle feela ho hlahisa babusuoa ba rona kotsi, empa, ka ho tlala boikakaso, ba loha merero ho loantša bathusi ba bona. 4Ha ba hlakole feela teboho har'a batho, empa ba ile le khongoana holimo ke boitlatlarietso ba bao ho seng ntho eo ba e tsebang ka molemo, ba nahana hore ba tla phonyoha tokeng, e hloileng bokhopo, ea Molimo eo kamehla a bonang tsohle.
5“Hape, ho etsahala hangata hore batho ba bangata ba tšoereng marapo a puso, ba etsoe batšoaeli tšollong ea mali a se nang molato, 'me ba be le boikarabello likoluoeng tse ke keng tsa phekoloa, ka tlhohleletso ea metsoalle e neiloeng ho laola litaba tsa sechaba. 6Metsoalle eo, ka maqheka a mashano a tsoaloang ke bokhopo ba eona, e ile ea khelosa babusi ba neng ba rerile tse ntle feela 'me tse lokileng.
7“Se fihletsoeng ka bokhopo ba boitšoaro bo bobe, ke batho ba laolang ka ntle ho toka, se ka bonoa e seng feela libukeng tsa khale tseo rona re neelaneng ka tsona, empa esita le hona phuputsong ea litaba tse haufi-ufi le rona.
8“Re tla hlokomela hore, ka nako e tlang, mefere-fere e be sieo 'me khotso e be teng 'musong oa rona, bakeng sa batho bohle, 9ka ho fetola tse hlokang ho fetoloa, le ka ho ahlola ka mokhoa o se nang leeme litabeng tse tlisoang ho rona.
10“Le tseba hore Hamane, mora oa Hamadata, motho oa Masedonia le molichaba ea se nang mali a Moperesiea ho hang, leha e le mohau o kang oa rona, o ile a amoheloa e le moeti oa rona. 11Joale a thabela setsoalle seo re se bontšang sechaba se seng le se seng, hoo a bileng a bitsoa ntat'a rona, 'me a obameloa ke bohle e le motho oa bobeli teroneng ea borena.
12“Empa ka ho hlōla ho tšoara boikhohomoso ba hae, a kena mosebetsing oa ho re amoha 'muso, esita le bona bophelo ba rona. 13Ka bolotsana bo matsoelintsoeke le thetso, a kopa hore ho felisoe Moredekai, mopholosi oa rona, le mothusi oa rona oa kamehla, le Esetere, molekane oa rona pusong, ea ke keng a suptjoa koli, 'moho le sechaba sohle sa habo bona. 14A nahana hore ka mokhoa ona, o tla re fumana re sa sireletsoa, ebe o neelana ka 'muso oa Baperesiea ho Bamasedonia. 15Empa rona re fumana hore Bajuda, bao ho neng ho neelanoa ka bona hore ba ripitloe ke motho enoa ea neng a rohakehile hararo, hase batho ba etsang bobe, empa ba busoa ke melao e lokileng haholo. 16Ke bana ba Ea holimo-limo, Molimo ea matla-'ohle, ea phelang, ea 'nileng a re baballela 'muso ona e le o atlehileng, joalokaha a ne a etsetsa bo-ntat'a rona.
17“Ka baka lena, le tla be le nepa ha le sa phethe taelo e ka mangolong a romeletsoeng ke Hamane, mora oa Hamadatha; 18hobane mong'a 'ona o fanyehiloe khorong ea Susa, 'moho le ba ntlo ea hae kaofela. Molimo ea busang tsohle o potlakile ho mo lihela kotlo e mo lokelang.
19“Ka baka lena, manamisang kopi ea lengolo lena hohle libakeng tse pepeneneng; 'me le lese Bajuda ba phele ka ho ea ka meetlo ea bona. 20Le ba tlatse, hore ka letsatsi la leshome le metso e meraro, ka khoeli ea leshome le metso e 'meli e leng Adare, ba tsebe ho itoanela ho ba ba hlaselang nakong e beetsoeng ho ba felisa. 21Molimo ea busang tsohle o entse hore letsatsi lena e be la thabo, sechabeng sa hae se khethehileng, ho e-na le ho ba letsatsi la ho ripitloa ha bona.
22“Ha e le lona, le tle le ketekele letsatsi lena le leholo ka mokhoa o mahlonoko, e le letsatsi le tsebisahalang har'a mekete ea lona ea khopotso; 23e le hore, hona joale le kamoso, e be letsatsi le bolelang pholoho ea rona le ea Baperesiea ba tšepahalang; empa ho ba nang le morero o mobe ka rona, e be khopotso ea timelo. 24Motse ofe le ofe, le naha efe le efe ka kakaretso, e hanang ho phethahatsa litaelo tsena e tla timetsoa ka lerumo le ka mollo ho se mohau, hoo batho ba tla sitoa ho feta har'a eona, 'me le tsona linyamatsane le linonyana li tla e hloea ho isa kae.
