Thapelo ea Moredekai
1Moredekai a rapela Morena, a ntse a ikhopotsa mesebetsi eohle ea Morena, a re: 2“Morena, oho Morena, uena Khosi e busang tsohle, libopuoa tsohle li matleng a hao; 'me ha ho ea ka u thibelang ha u rata ho pholosa Iseraele. 3Ke uena ea entseng leholimo le lefatše, le lintho tsohle tse hlollang tse tlas'a letsatsi. 4Ke uena Morena oa tsohle, 'me ha ho ea ka lebisanang thebe le uena, Morena. 5Uena u tseba tsohle! Ua tseba, Morena, hore hase ka boikakaso kapa ka boikhantšo leha e le ka ho rata thoriso, ha ke ile ka hana ho obama ka pele ho moikhohomosi Hamane. 6Ke habonolo ke neng nka mo aka bohatong ba maoto, ho pholosa Iseraele. 7Empa seo ke se entseng, ke se entse ka ho se rate ho tlotlisa motho ho feta Molimo. Ha ho eo ke tla mo khumamela haese uena, Morena; 'me ho hana ho etsa joalo hase boikhantšo.
8“Joale, Morena Molimo, uena Khosi, Molimo oa Aborahama, ak'u hauhele sechaba sa hao; hobane lira li ikemiselitse ho re ripitla, li lakatsa ho timetsa seabo seo e bileng sa hao haesale. 9Se re khese, rona re leng leruo la hao, rona bao u itopolletseng bona ka ho ba ntša naheng ea Egepeta. 10Ak'u mamele thapelo ea ka. U re rekolohele, rona re leng batho ba hao; u fetole sello sa rona thabo; e le hore re tle re phele, 'me re roke Lebitso la hao. U se ke ua lumella hore ho ripitloe bao melomo ea bona e u rorisang.”
11Baiseraele kaofela ba ne ba rapela ka matla le ka mantsoe a phefa, kaha lefu le ne le ba tonetse mahlo.
Thapelo ea Esetere
12Mofumahali Esetere, eka motho ea lekhatheng la ho shoa, le eena a tšabela ho Morena. 13A hlobola seaparo sa hae sa bofumahali, eaba o apara liaparo tsa hlonamo le bofifi; 'me bakeng sa lisente tsa bohlokoa, a itlotsa hlooho ka molora le lithole. A hlokofatsa 'mele oa hae hampe, 'me tšobotsi eo a neng a thabela ho e khabisa, a e apesa ka moriri o lohakaneng oa hae. 14Joale a rapela Morena Molimo oa Iseraele, a re:
“Oho Morena oa ka, Khosi ea rona, ke uena feela; nthuse 'na ke leng inotši, ke se na ea ka nthusang haese uena; 15hobane ke tla bea bophelo ba ka kotsing. 16Ho tloha tlhahong ea ka ke utloile lelokong la heso hore uena, Morena, u ne u hloaee Iseraele har'a lichaba tsohle, le bo-ntat'a rona ka har'a baholo-holo bohle ba bona, ho ba lefa la hao ka ho sa eeng kae, ua ba ua ba etsetsa tsohle tseo u ileng ua ba tšepisa tsona.
17“Hajoale re u sitetsoe, 'me u re neetse matsohong a lira tsa rona, 18hobane re ile ra tlotlisa melimo ea tsona. U na le toka, Morena! 19Joale, lira ha lia ba khotso ha re phela bokhobeng bo tšabehang, empa li entse kutloano le melimo ea tsona ea bohata, 20ho hlakola qeto eo u e entseng, le ho ripitla lefa la hao, le ho khutsisa melomo ea ba u rorisang, le ho felisa tlotla ea Ntlo ea hao le ea aletare ea hao; 21e le hore balichaba ba fumane monyetla ho roka melimo ea bona ea bosaoana, le ho babatsa ka ho sa eeng kae khosi ea nama le mali.
22“Morena, u se ke ua tlohella ntho tse sa pheleng lere la hao la borena, 'me lira li se ke tsa re tlepa litšeho ka timelo ea rona; empa seo li re reretseng sona se ke se li oele holimo, 'me u etse mohlala ka monna ea re rerileng e le eena ka sebele. 23Se re lebale, oho Morena, iponahatse nakong ena ea mathata a rona! Ha e le 'na, u mphe sebete, uena Khosi ea melimo eohle le Morena oa mebuso eohle. 24Ak'u kenye puo e kheleke ka molomong oa ka ha ke hlaha ka pele ho tau, 'me u fetole pelo ea eona hore e hloee ea re loantšang, 'me e mo timetse eena le ba khemang le eena. 25U re pholose ka letsoho la hao, 'me u nthuse 'na ke leng inotši, ke e-na le uena feela, Morena.
26“U na le tsebo ea tsohle, 'me ua tseba hore ha ke rate tlhompho e tsoang ho ba se nang Molao, 'me ke nyonya liphate tsa ba sa bollang leha e le tsa molichaba ofe kapa ofe. 27U tseba tsietsi ea ka: ke nyonya pontšo ea boemo ba ka, moqhaka oo ke o roalang, matsatsing ao ka 'ona ke hlahang ka pele ho batho; ke o nyonya joaloka lesela la ba ileng khoeling, 'me ha kea o roala matsatsing a phomolo. 28Lekhabunyane la hao ha le e-s'o ka le jella tafoleng ea Hamane, leha e le ho ea meketeng ea lijo ea khosi, kapa ho noa veine e nyehetsoeng melimo. 29Haesale lekhabunyane la hao le tlisoa mona ho fihlela kajeno, ha lea ka la e-ba le thabo ea 'nete, haese ka uena, Morena, Molimo oa Aborahama.
30“Oho Molimo, uena ea fetang bohle ka matla, ak'u mamele sello sa ba lahlileng tšepo, u re ntše liatleng tsa ba khopo, 'me u mpholose tšabong ea ka!”
