Khosi e tlōtla Moredekai
1Bosiung bona boo khosi ea hlobaela, ea ba ea laela hore e tlisetsoe buka eo ho ngotsoeng liketsahalo tse fetileng ho eona, 'me ea e balloa. 2Ha fumanoa bukeng eo ho ngotsoe hore Moredekai o kile a sebela khosi tsa morero oa bo-Bigitane le Tereshe oa ho bolaea khosi. Bana e ne e le mahaole a mabeli a khosi, e bile e le balebeli ba monyako, ba neng ba batla ho bolaea khosi Ahashuerushe.
3Eaba khosi e re: “Moredekai o kile a neoa tlōtla efe le hlompho efe ka ketso eo?”
Bahlanka ba khosi ba neng ba e sebeletsa, ba re: “Ha ho letho leo a kileng a le etsetsoa!”
4Khosi ea re: “Ke mang ea ka seotloaneng?”
Ka eona nako eo Hamane o ne a sa tsoa kena ka seotloaneng se kantle ho ntlo ea khosi, ho ea bua le khosi hore e fanyehe Moredekai sefateng seo ho fanyehoang batho ho sona, seo a mo lokiselitseng sona.
5Bahlanka ba khosi ba re ho eona: “Ke Hamane ea emeng ka seotloaneng.”
Khosi ea re: “E-reng a kene!”
6Eaba Hamane oa kena. Khosi ea re ho eena: “Ho etsoe joang ka motho eo khosi e thabelang ho mo tlōtla?”
Hamane a bua ka pelo, a re: “E ka ba mang eo khosi e ka thabelang ho mo tlōtla, haese 'na!”
7Hamane a araba khosi, a re: “Motho eo khosi e thabelang ho mo tlōtla, 8a tlisetsoe seaparo se aparoang ke khosi, a tlisetsoe le pere e palangoang ke khosi, le mofapahlooho o roaloang ke khosi. 9Seaparo seo, le pere eo li neoe e mong oa mahosana a tlōtlehang haholo a khosi, e le hore mahosana ao a tle a apese motho eo seaparo seo, 'me a mo tsamaise lebaleng la motse a palame pere. Mahosana ao a hōoe, a re: ‘Sena ke sona se tla etsoa ho motho eo khosi e thabelang ho mo tlōtla!’ ”
10Khosi ea re ho Hamane: “Potlaka he, u nke seaparo seo, le pere eo, 'me Moredekai oa Mojuda, ea lutseng monyakong oa ntlo ea khosi, u mo etse joalokaha u boletse, u phethe tsohle tseo u li boletseng.”
11Joale Hamane a nka seaparo seo, le pere eo, a apesa Moredekai seaparo, a mo palamisa pere, a mo tsamaisa lebaleng la motse, a hōoeletsa a le kapele ho eena, a re: “Sena ke sona se tla etsoa ho motho eo khosi e thabelang ho mo tlōtla!”
12Moredekai a boela monyakong oa khosi, empa Hamane eena a potlakela ha hae, a sulafaletsoe, a ikhurumelitse hlooho. 13Hamane a bolella Sereshe, mosali oa hae, le metsoalle ea hae eohle, tsohle tse mo hlahetseng.
Eaba metsoalle eo ea hae e bohlale, le Sereshe, mosali oa hae, ba re ho eena: “Haeba Moredekai, eo u seng u qalile ho theoha boemong ba hao kapele ho eena, e le oa lelōko la Bajuda, u ke ke ua hlola u mo hlōla, empa u tla fela u timele!” 14Eare ba sa ntsane ba buisana le eena, mahaole a khosi a fihla, a potlakisetsa Hamane moketeng oo Esetere a o lokisitseng.
