PHALLO 25

₁Morena a bua ho Moshe, a re: ₂“Bua le bana ba Iseraele, u re ba 'ntšetse limpho. Le amohele limpho tsa ka ho motho ka mong ea ithaopang. ₃Ke tsena limpho tseo le tla li amohela ho bona: khauta, le silefera, le lethose; ₄masela a maputsoa, le a perese, le a mafubelu, le a entsoeng ka lesela la lene, le ka boea ba lipoli; ₅matlalo a lipheleu a mafubelu ke 'masa, le matlalo a liqibi, le lithupa tsa sefate sa mositsane; ₆le ole ea ho bonesa, le linōko tsa ole ea ho tlotsa, le mokubetso o monko o monate; ₇le majoe a kareneleane, le mahakoe a rokelloang setipeng, le mokhabisong oa sefuba.

₈“Joale ba nketsetse Sehalalelo, ke tle ke ahe har'a bona. ₉Le se etse ho latela tsohle tseo ke tla u bontša tsona setšoantšong, e leng setšoantšo sa leaho, le setšoantšo sa thepa eohle ea lona.

₁₀“Ba etse areka ka lithupa tsa sefate sa mositsane; bolelele ba eona e be lisenthimethara tse lekholo le leshome, bophara ba eona e be lisenthimethara tse mashome a tšeletseng a metso e tšeletseng, 'me bophahamo ba eona e be lisenthimethara tse mashome a tšeletseng a metso e tšeletseng. ₁₁U manehe khauta e hloekileng holim'a areka eo; u e manehe kantle le kahare, 'me holim'a eona u etse moqhaka oa khauta o e potolohang. ₁₂U tle u e etsetse mehele e mene ea khauta, u e khoese maotong a eona a mane; mehele e 'meli e be ka lehlakoreng la pele, le e meng e 'meli ka lehlakoreng la bobeli. ₁₃Ka lithupa tsa sefate sa mositsane u etse mefeng e jarang, u e manehe khauta. ₁₄Mefeng eo u tla e khoesa meheleng e mahlakoreng a areka, ho tle ho jaroe areka ka eona. ₁₅Mefeng e jarang e tla kenngoa meheleng ea areka, 'me e se ke ea ba ea ntšoa meheleng eo. ₁₆Ka arekeng u tla kenya matlapa a ngotsoeng Molao, ao ke tla u nea 'ona.

₁₇“U tla etsa sekoahelo sa tefelo ea sebe ka khauta e hloekileng; bolelele ba sona e be lisenthimethara tse lekholo le leshome, bophara ba sona e be lisenthimethara tse mashome a tšeletseng a metso e tšeletseng. ₁₈U tla etsa likerubime tse peli tsa khauta; u li etse ka khauta e thutsoeng, 'me li be ntlheng tse peli tsa sekoahelo sa tefelo ea sebe. ₁₉Kerubime ea pele e be ka ntlheng ena ea sekoahelo, kerubime ea bobeli e be ka ntlheng eane ea sona. Lintlheng tse peli tsa sekoahelo sa tefelo ea sebe, u etse likerubime. ₂₀Mapheo a likerubime a otlolohele holimo, a khurumetse sekoahelo sa tefelo ea sebe, 'me lifahleho tsa tsona li talimane; lifahleho tsa likerubime li talime malebana le sekoahelo sa tefelo ea sebe. ₂₁U tla bea sekoahelo sa tefelo ea sebe holim'a areka, 'me kahare ho areka u tla kenya matlapa a ngotsoeng Molao, ao ke tla u nea 'ona. ₂₂Ke tla kopana le uena hona moo, ke bue le uena ke le holim'a sekoahelo sa tefelo ea sebe, pakeng tsa likerubime tse peli, tse holim'a areka ea selekane. Ke tla u nea melao eohle ea bana ba Iseraele.

₂₃“U tla etsa tafole ka lithupa tsa sefate sa mositsane; bolelele ba eona e be lisenthimethara tse mashome a robeli a metso e robeli, bophara ba eona e be lisenthimethara tse mashome a mane a metso e mene, 'me baphahamo ba eona e be lisenthimethara tse mashome a tšeletseng a metso e tšeletseng. ₂₄U tla e maneha khauta e hloekileng, u e etsetse moqhaka oa khauta o e potolohang. ₂₅U tla e etsetsa molimako o bophara ba seatla, o e potolohang, le moqhaka oa khauta o pota-potang molimako oo oa eona. ₂₆U tla e etsetsa mehele e mene ea khauta, 'me u hōkele mehele eo lihukung tse 'ne tsa maoto a eona a mane. ₂₇Haufi le molimako ho tla ba le mehele e tla khoesa mefeng e jarang tafole. ₂₈Ka lithupa tsa sefate sa mositsane u tla etsa mefeng, u e manehe khauta, 'me ke eona e tla jara tafole. ₂₉U tla e etsetsa mafiso, le mafisoana, le mepotjoana, le linoelo tse sebelisoang ha ho nyeheloa. Tsena li etsoe ka khatua e hloekileng. ₃₀U tla bea bohobe bo halalelang tafoleng kamehla.

₃₁“U tla etsa seluloana sa lebone ka khauta e hloekileng. Seluloana seo sa lebone u se etse ka khauta e thutsoeng. Malulo a sona, le lenono la sona, le likhakeletso tsa sona, le lipalesa tsa sona, le lithunthung tsa sona, li thulelloe ho sona. ₃₂Lenono la seluloana le tla ba le makala a tšeletseng: a mararo a be ka lehlakoreng la pele, a mang a mararo a be ka lehlakoreng la bobeli. ₃₃Lekaleng le leng ho be le likhakeletso tse tharo, tse kang tsa sefate sa perekisi, se nang le lipalesa le lithunthung; lekaleng le leng hape ho be le likhakeletso tse tharo, tse kang tsa sefate sa perekisi, se nang le lipalesa le lithunthung. Ho be joalo makaleng a tšeletseng, a tlohang lenonong la seluloana. ₃₄Seluloaneng ho be le likhakeletso tse 'ne, tse kang tsa sefate sa perekisi, se nang le lipalesa le lithunthung. ₃₅Ho be le palesa tlas'a manono a mabeli a sona, le palesa e 'ngoe hape tlas'a manono a mabeli a sona; le palesa e 'ngoe hape-hape tlas'a manono a mabeli a sona. Ho be joalo makaleng a tšeletseng, a tlohang lenonong la seluloana. ₃₆Lipalesa le manono a tsona li thulelloe le seluloana, e be ntho e le 'ngoe e entsoeng ka khauta e hloekileng, e thutsoeng.

₃₇“U tla se etsetsa mabone a supileng, lebone ka leng le beoe ka mokhoa oa hore le bonese sebaka se kapele ho lona. ₃₈Matlao a sona, le lithōtōbōlō tsa sona, e be tsa khauta e hloekileng. ₃₉Seluloana sena, le thepa eohle ea sona, li etsoe ka khauta e hloekileng, e lekanang le likilo tse mashome a mararo a metso e mene ka boima. ₄₀Hlokomela, u li etse ho latela setšoantšo seo u se bontšitsoeng ha u le thabeng.