PHALLO 30

₁“U tla etsa aletare, moo ho tla chesetsoa mokubetso teng; u tla e etsa ka lithupa tsa sefate sa mositsane. ₂Bolelele ba eona e be lisenthimethara tse mashome a mane a metso e mehlano, le bophara ba eona e be lisenthimethara tse mashome a mane a metso e mehlano; e be le mahlakore a mane a lekanang. Bophahamo ba eona e be lisenthimethara tse mashome a robong. Manaka a eona a etsoe ka thupa e le 'ngoe le aletare. ₃U tla e maneha khauta e hloekileng kaholimo le ka mahlakoreng ho e potoloha, le manakeng a eona; ebe u e etsetsa moqhaka oa khauta o e potolohang. ₄U e etsetse mefitšane e 'meli ea khauta tlas'a moqhaka oa eona; u e etse holim'a lihuku tsa eona tse peli, le holim'a mahlakore a eona a mabeli. E tla ba moo ho khoesoang mefeng, hore aletare e tle e jaroe ka eona. ₅U tla etsa mefeng eo ka lithupa tsa sefate sa mositsane, u e manehe khauta. ₆U tla bea aletare kapele ho lesira le siretseng areka ea selekane, kapele ho sekoahelo sa tefelo ea sebe se holim'a areka eo, moo ke tla kopana le uena teng.

₇“Arone o tla chesetsa mokubetso o nkhang hamonate holim'a aletare; a o chese hoseng ho hong le ho hong ha a lokisa mabone. ₈Mantsiboea ha Arone a hotetsa mabone, o tla 'ne a chesetsa Morena mokubetso ona, 'me hona ho etsoe kamehla, ho ea fihla melōkong eohle e tlang. ₉U se ke ua chesetsa mokubetso osele ho eona, leha e le sehlabelo sa secheso, kapa nyehelo ea lijo; le nyehelo ea lino e se ke ea tšèloa holim'a aletare eo. ₁₀Hang ka selemo, Arone o tla etsa sehlabelo sa tefelo ea sebe. Holim'a manaka a aletare o tla tšèla mali a tse hlabetsoeng tefelo ea sebe. Tšebeletso ena ea tefelo ea sebe e tla etsoa hang ka selemo, ho ea fihla melōkong eohle e tlang, hobane ho Morena aletare ena e halalela ka ho fetisisa.”

₁₁Eaba Morena o bua ho Moshe, o re: ₁₂“Ha u bala bana ba Iseraele hore ba tle ba ngolisoe, motho ka mong oa bona a ntšetse Morena seabo se lopollang bophelo ba hae, hore a se ke a oeloa ke seoa ha ba ntse ba ngolisoa. ₁₃Ba tla fana ka hona: bohle ba fetelang sehlopheng sa ba seng ba ngolisitsoe, ba tla ntša silefera e etsang boima ba likeramo tse hlano le halofo motho ka mong, ho ea kamoo e baloang kateng Sehalalelong. Ligera tse mashome a mabeli ke likeramo tse leshome le motso o mong; joale likeramo tse hlano le halofo e tla ba seabo se ntšetsoang Morena. ₁₄E mong le e mong ea kenang sehlopheng sa ba ngolisitsoeng, ho tloha ka ea lilemo tse mashome a mabeli, ho ea holimo, o tla fana ka seabo ho Morena. ₁₅Ha le ntšetsa Morena seabo se lopollang bophelo ba lōna, morui a se ke a ntša ho feta likeramo tse hlano le halofo, le mofutsana a se ke a ntša katlase ho likeramo tse hlano le halofo. ₁₆U tla bōkella chelete ena ea topollo ea bophelo, e ntšoang ke bana ba Iseraele, 'me u e sebelise mererong ea Tente ea Morena; e tla ba eo Morena a tla hopola bana ba Iseraele ka eona, 'me a lopolle bophelo ba lōna.”

₁₇Joale Morena a bua ho Moshe, a re: ₁₈“U tla etsa sekotlolo sa lethose, sa ho itlhatsoetsa, le seluloana sa sona e be sa lethose; e be sekotlolo seo ho tla itlhatsoetsoa ho sona. U tla se bea pakeng tsa Tente ea Morena le aletare, 'me u tšèle metsi ka ho sona. ₁₉Arone le bara ba hae ba tla hatlella ka ho sona, ba hlatsoetse le maoto a bona ka ho sona. ₂₀Ha ba kena ka Tenteng ea Morena, ba hlape ka metsi ana, hore ba se ke ba e-shoa. Leha ba atamela aletareng ho ea sebeletsa, ba etsetsa Morena sehlabelo sa secheso, ₂₁ba hatlele, ba hlatsoe le maoto a bona, hore ba se ke ba e-shoa. Molao ona e tla ba oa mehla eohle, ho Arone le ho litlōhōlō tsa hae, ho isa melōkong eohle e tlang.”

₂₂Morena a bua ho Moshe, a re: ₂₃“Uena u inkele linōko tse monate ka ho fetisisa: 'mira o metsi, oo boima ba oona e leng likilo tse tšeletseng; le sinamone e nkhang hamonate, eo boima ba eona e leng halofo ea boima ba 'mira oo, ke hore likilo tse tharo; le lehlaka le monko o monate, leo boima ba lona e leng likilo tse tharo; ₂₄le kasia eo boima ba eona e leng likilo tse tšeletseng, tse lekantsoeng ka tekanyo e sebelisoang ka Sehalalelong; le lilethara tse 'ne tsa ole ea sefate sa mohloaare. ₂₅Ka tsena u etse ole e halalelang ea ho tlotsa, e tsoakiloeng ke setsebi. E tla ba eona ole e halalelang, e tlotsang. ₂₆Ka eona u tla tlotsa Tente ea Morena, le areka ea selekane; ₂₇le tafole, le lijana tsohle tsa eona, le seluloana sa lebone, le tsohle tsa sona; le aletare ea mokubetso, ₂₈le aletare ea secheso, le tsohle tse sebelisoang ho eona; le sekotlolo sa ho itlhatsoetsa, le seluloana sa sona. ₂₉U li halaletse, li tle li halalele ka ho fetisisa, 'me eng kapa eng e tla li ama, le eona e tla halalela.

₃₀“U tlotse Arone le bara ba hae, 'me u ba halaletse hore e tle e be baprista ba ka. ₃₁U tle u bue le bana ba Iseraele, u re: ‘Ena e tla ba ole ea ka e halalelang, ea ho tlotsa; melōko eohle ea lōna e etse joalo. ₃₂E se ke ea ba ea tšèloa 'meleng oa motho, 'me le se ke la ba la iketsetsa e tšoanang le eona ka metsoaka. Ea halalela, 'me le ho lōna e halalele. ₃₃Motho ea ka etsang e joaloka eona, kapa a e nea motho eo e seng moprista, o tla khaoloa sechabeng sa habo.’ ”

₃₄Morena a re ho Moshe: “Inkele linōko tsena tse monko o monate ka litekanyo tse lekanang: setoraka, le likhetla tse monko o monate, le kalabanumu e monko o monate, le mokubetso o hloekileng. ₃₅Ka tsona u tle u etse mokubetso o tsoakiloeng joaloka setlolo se tsoakiloeng ke setsebi sa litlolo; o nōkiloeng ka letsoai le hloekileng, o halalelang. ₃₆O mong oa oona u o sile, o thumisehe; u o bee kapele ho matlapa a ngotsoeng Molao, ka Tenteng ea Morena, moo ke kopanang le uena teng. Ho lōna mokubetso oo o tla halalela ka ho fetisisa. ₃₇Mokubetso oo le o etsang ka metsoako ena, le se ke la iketsetsa o tšoanang le oona ka motsoako, hobane oa halalela ho Morena. ₃₈Motho ea ka etsang o kang oona, hore a utloe monko oa oona o monate, o tla khaoloa sechabeng sa habo.”