PHALLO 39

₁Ka masela a maputsoa, le a perese, le a mafubelu, ba loha liaparo tsa ho sebeletsa ka Sehalalelong. Ba etsetsa Arone liaparo tse halalelang, joalokaha Molimo a ne a laetse Moshe.

₂Ba etsa setipe ka lesela le nang le 'mala oa khauta, le ka le leputsoa, le le perese, le le lefubelu, le le entsoeng ka lene, le lōehileng. ₃Ba etsa masenke a khauta, ba a seha maqhoele, ba a rokella pakeng tsa lesela le leputsoa, le le perese, le le lefubelu, le le entsoeng ka lene; ea e-ba mosebetsi oa setsebi. ₄Setipe sena ba se etsetsa masela a mabeli a rokeletsoeng mahetleng, moo lintlha tse peli tsa sona li kopang teng. ₅Leqhama la setipe le ne le entsoe ka mokhoa o tšoanang le sona: ka lesela le nang le 'mala oa khauta, le ka le leputsoa, le le perese, le le lefubelu, le le entsoeng ka lene, le lōehileng, joalokaha Morena a ne a laetse Moshe.

₆Ba kutletsa majoe a bohlokoa a kareneleane, ba a kenya lishoeshoeng tsa khauta, ba a ngola mabitso a bara ba Iseraele, joalokaha ho etsoa setempe sa bopaki. ₇Ba a rokella holim'a masela a setipe a mahetleng. Majoe ao e ne e le khopotso ea bara ba Iseraele, joalokaha Morena a ne a laetse Moshe.

₈Ba etsa mokhabiso oa sefuba; oa etsoa ke setsebi, joaloka setipe; oa etsoa ka lesela le nang le 'mala oa khauta, le ka le leputsoa, le le perese, le le lefubelu, le le entsoeng ka lene, le lōehileng. ₉Mokhabiso ona oa sefuba o ne o e-na le mahlakore a mane, a menahantsoeng habeli, a bolelele ba seatla, le bophara ba seatla. ₁₀Ba rokella mela e mene ea majoe a bohlokoa. Moleng oa pele e ne e le lejoe la rubi, le la topase, le la karanete. ₁₁Moleng oa bobeli e ne e le lejoe la emeraleda, le la safire, le la daemane. ₁₂Moleng oa boraro e ne e le lejoe le turukose, le la akate, le la ametise. ₁₃Moleng oa bone e ne e le lejoe la berile, le la kareneleane, le la jasepere. Ba kenya majoe ao lishoeshoeng tseo tsa khauta. ₁₄Majoe ana a ne a le leshome le metso e 'meli, ho ea ka mabitso a bara ba Iseraele. Lejoe ka leng le ne le ngotsoe lebitso la o mong oa merabe e leshome le metso e 'meli ea bara ba Iseraele, joalokaha ho ngoloa setempe sa bopaki.

₁₅Holim'a mokhabiso oa sefuba ba ne ba entse liketane tse lōhiloeng joaloka thapo, e le mehala e entsoeng ka khauta e hloekileng. ₁₆Ba etsa lishoèshoè tse peli tsa khauta, le mefitšane e 'meli ea khauta, ba hokela mefitšane e 'meli eo lintlheng tse peli tsa mokhabiso oa sefuba. ₁₇Ba hokela mehala eo e 'meli ea khauta mefitšaneng e 'meli, e lintlheng tsa mokhabiso oa sefuba. ₁₈Lintlha tse peli tsa mehala ba li hokela lishoeshoe tseo tse peli, ba li tlamella maseleng a setipe a mahetleng, kapele ho setipe. ₁₉Ba etsa mefitšane e meng e 'meli ea khauta, ba e hokela lintlheng tse peli, tse katlase, tsa mokhabiso oa sefuba o tobaneng le setipe. ₂₀Ba boela ba etsa mefitšane e 'meli ea khauta, ba e hokela ho tloha katlase ho mehala e 'meli ea setipe e mahetleng, kapele ho moo mehala eo e kopanang le setipe teng, kaholim'a leqhama la setipe. ₂₁Ba tlama mefitšane ea mokhabiso oa sefuba ka mohala o moputsoa, ba o tlamella mefitšaneng ea setipe, hore mokhabiso oa sefuba o tle o lule holim'a leqhama, o se ke oa lokoloha setipeng, joalokaha Morena a ne a laetse Moshe.

₂₂Ba etsa seaparo se aparoang tlas'a setipe, se entsoeng ke selōhi, ka lesela le leputsoa feela. ₂₃Lesoba la ho se khetšemetsa hloohong le ne le le hare ho sona, joaloka la molala oa baki ea mohlabani. Ho potoloha lesoba leo ho ne ho entsoe lemeno le le phethang, hore lesoba le se ke la taboha. ₂₄Lemenong la seaparo ba etsa likharenate ka lesela le leputsoa, le le perese, le le lefubelu, le ka le entsoeng ka lene, le lōehileng. ₂₅Ba etsa mangenengene a khauta e hloekileng, ba hokella mangenengene ao pakeng tsa likharenate, holim'a lemeno la seaparo, ho potoloha; ₂₆ke hore ho entsoe lengenengene, ha nt'o etsoa kharenate, ho potoloha lemeno la seaparo sa ho sebeletsa, joalokaha Morena a ne a laetse Moshe.

₂₇Ba etsetsa Arone le bara ba hae liaparo tse fihlang maotong ka lesela la lene, le lōehileng; ₂₈le katiba ka lesela le joalo, le lituku tsa bokhabane ka lesela le joalo, le marikhoe ka lesela le joalo, le lōehileng. ₂₉Ba etsa le leqhama ka lesela la lene, le lōehileng, le ka lesela le leputsoa, le le perese, le le lefubelu, le entsoeng ke sehōmi, joalokaha Morena a ne a laetse Moshe.

₃₀Ba etsa moqhaka o halalelang ka khauta e hloekileng, 'me holim'a oona ba ngola joalokaha ho ngoloa setempe sa bopaki, ba re: mohalaleli oa morena. ₃₁Holim'a oona ba tlamella mohala o moputsoa, ba rokella moqhaka phatleng ea katiba, joalokaha Morena a ne a laetse Moshe.

₃₂Eaba mosebetsi oa Leaho la Tente ea Morena, oa phethoa. Bana ba Iseraele ba ne ba entse tsohle ho ea kamoo Morena a neng a laetse kateng. ₃₃Ba tlisetsa Moshe Leaho, le masela a le koahelang, le tsohle tsa lona, le lihokelo tsa lona, le lithupa tsa lona, le maballo a lona, le litšiea tsa lona, le litšehetso tsa tsona. ₃₄Ba tlisa le marulelo a matlalo a lipheleu a 'masa, le marulelo a matlalo a liqibi, le lesira le sireletsang areka. ₃₅Ba tlisa le areka ea selekane, le mefeng ea eona, le sekoahelo sa tefelo ea sebe; ₃₆le tafole, le lijana tsohle tsa eona, le bohobe bo halalelang; ₃₇le seluloana sa lebone sa khauta e hloekileng, mabone a sona a se a beiloe hantle; le tsohle tsa sona, le ole ea ho bonesa. ₃₈Ba tlisa le aletare ea khauta, le ole e tlotsang, le mokubetso o monko o monate, le lesira la monyako oa Tente; ₃₉le aletare ea lethose, le mokhabiso oa eona oa lethose o kang letlōoa, le mefeng ea eona, le tsohle tsa eona, le sekotlolo sa ho itlhatsoetsa, le seluloana sa sona. ₄₀Ba tlisa le masela a lepeletsoang seotloaneng, le litšiea tsa 'ona, le litšehetso tsa tsona; le lesira la monyako oa seotloana, le mehala ea sona, le limapo tsa sona, le tsohle tse sebelisoang Leahong, Tenteng ea Morena. ₄₁Ba tlisa liaparo tse lohiloeng, tsa ho sebeletsa Sehalalelong, e leng liaparo tse halalelang tsa moprista Arone; le liaparo tsa bara ba hae ha ba sebeletsa e le baprista.

₄₂Bana ba Iseraele ba ne ba entse mosebetsi oohle ho ea kamoo Morena a neng a laetse Moshe kateng. ₄₃Eaba Moshe o hlahloba mosebetsi kaofela, 'me a bona hore ba o phethile joalokaha Morena a ne a laetse. Moshe a ba hlohonolofatsa.