1Morena a re ho Moshe: “Bona, ke u etsa hore u be joaloka Molimo ho Faro, 'me moholoane oa hao Arone e tla ba moporofeta oa hao. 2U tla bua tsohle tseo ke u laelang tsona. Moholoane oa hao Arone o tla bolella Faro, hore a lokolle bana ba Iseraele, ba tsoe naheng ea hae. 3Feela 'na ke tla thatafatsa pelo ea Faro, ke etse mehlolo le limakatso tsa ka tse ngata naheng ea Egepeta, 4empa Faro a ke ke a le mamela. Ke tla otla Egepeta ka letsoho la ka, ka likahlolo tse boima, ke ntše mabōtho a ka, sechaba sa ka, bana ba Iseraele, naheng ea Egepeta. 5Baegepeta ba tla tseba hore ke Morena, ha ke otlolla letshoho la ka ke ba otla, 'me ke ntša bana ba Iseraele har'a bona.”
6Moshe le Arone ba etsa kamoo Morena a ba laetseng kateng. Ba fela ba etsa joalo. 7Ha ba bua le Faro, Moshe o ne a e-na le lilemo tse mashome a robeli, Arone a e-na le lilemo tse mashome a robeli a metso e meraro.
Molamu oa Arone
8Joale Morena a bua ho Moshe le ho Arone, a re; 9“Ha Faro a bua le lōna, a re: ‘Ipakeng ka ho etsa mohlolo,’ uena u tla re ho Arone: ‘Nka molamu oa hao, u o akhele kapele ho Faro, o tle o fetohe nōha.’ ”
10Eaba Moshe le Arone ba ea ho Faro, 'me ba etsa kamoo Morena a ba laetseng kateng. Arone a akhela molamu oa hae kapele ho Faro, le kapele ho bahlanka ba hae, 'me oa fetoha nōha. 11Joale Faro le eena a bitsa banna ba bohlale le lingaka, 'me ka malepa a tsona lingaka tsa Egepeta le tsona tsa etsa joalo. 12Tsa akhela melamu ea tsona fatše ka bomong, 'me ea fetoha linōha, empa molamu oa Arone oa metsa melamu ea lingaka. 13Feela pelo ea Faro ea 'na ea thatafala, a se ke a ba mamela, joalokaha Morena a ne a ile a bolela.
Seoa sa pele: Metsi a fetoha mali
14Joale Morena a re ho Moshe: “Pelo ea Faro e thatafetse, o hana ho lokolla sechaba hore se tsamaee. 15Hosasane u tle u ee ho Faro. Bona, o tla be a e-ea nōkeng; uena u tle u eme lebōpong la nōka, o teane le eena, ka letsohong la hao u nke molamu o ileng oa fetoha nōha. 16U tle u re ho eena: ‘Morena Molimo oa Baheberu, o nthōmile ho uena, o re: Lokolla sechaba sa ka, se tle se e'o ntšebeletsa lehoatateng. Empa bona, ho fihlela joale ha u e-s'o ka u mamela.’ 17Morena o bua tjena: ‘Ka sena u tla tseba hore ke 'na Morena. Bona, ka molamu o ka letsohong la ka ke tla otla holim'a metsi a ka nōkeng, 'me a tla fetoha mali. 18Litlhapi tse ka nōkeng li tla shoa; nōka e tla nkha phu! 'me Baegepeta ba tla nyonya ho noa metsi a tsoang nōkeng.’ ”
19Eaba Morena o re ho Moshe: “E-re ho Arone: ‘Nka molamu oa hao, u otlolle letsoho la hao holim'a metsi a Egepeta, le holim'a linōka tsa bona, le holim'a linōkana tsa bona; le holim'a matša a bona, le holim'a metsi a bona 'ohle a bokellaneng, hore a tle a fetohe mali.’ Ho tla ba le mali naheng eohle ea Egepeta, esita le meruleng le meritšoaneng.”
20Moshe le Arone ba etsa joalokaha Morena a ba laetse. Arone a phahamisa molamu, a otla metsi a ka nōkeng Faro a ntse a talimile, le bahlanka ba hae ba ntse ba talimile, 'me metsi 'ohle a ka nōkeng a fetoha mali. 21Litlhapi tse ka nōkeng tsa e-shoa, nōka ea nkha phu! 'me Baegepeta ba nyonya ho noa metsi a tsoang nōkeng. Mali a ba hohle naheng ea Egepeta.
22Ka malepa a tsona lingaka tsa Egepeta le tsona tsa etsa joalo, 'me pelo ea Faro ea 'na ea thatafala, a se ke a mamela joalokaha Morena a ne a ile a bolela. 23Faro a khutla, a boela tlung ea hae, 'me a se ke a natsa taba ena. 24Baegepeta bohle ba cheka metsi a ho noa kathōko ho nōka, hobane ba ne ba sitoa ho noa metsi a tsoang ka nōkeng. 25Ha feta matsatsi a supileng kamora' hoba Morena a otle nōka.
