ESEKIELE 16

₁Lentsoe la Morena la boela la fihla ho 'na, la re: ₂“Uena ngoan'a motho, tsebisa Jerusalema manyala a eona, ₃u re: ‘Morena Molimo o bua tjena ho Jerusalema: Moo u hlahetseng teng, moo u tsoaletsoeng teng, ke naheng ea Kanana. Ntat'ao e ne e le Moamore, 'm'ao eena e le Mohete. ₄Tsa tsoalo ea hao li bile tjena: Mohla u neng u hlaha, kalana ea hao ha ea ka ea khaoloa; ha ua ka ua hlatsuoa ka metsi hore u hloeke; ha ua ka ua pikitloa ka letsoai, leha e le hona ho phutheloa ka masela. ₅Ha ho le ea mong ea kileng a u hauhela, a u etsetsa lintho tsena, kapa a u utloela bohlōkō. Mohl'a letsatsi la tsoalo ea hao ua na ua lahleloa har'a naha, hobane u ne u nyonyeha.

₆“ ‘Eare ha ke feta pel'a hao, ka u bona u le litšila ke mali a hao. Ka bua le uena u nts'u le mali joalo, ka re: “Phela!” E, ka rialo ho uena u nts'u le mali, ka re: “Phela!”

₇“ ‘Ka etsa hore u hōle joaloka semela sa naha; ua fela ua hōla, ua phethahala, ua fetoha moroetsana e motle-motle. Ua tsoa liola-molora, ua mela moriri, empa ua sala u nts'u tsotse, u le feela.

₈“ ‘Hamorao ha ke feta pel'a hao hape, ke u talima, ka bona hore u se u hōlile hoo u lokelang ho ferehoa. Eaba ke u apesa seaparo sa ka ho pata bofeela ba hao. Ka u hlapanyetsa, ka etsa selekane le uena, 'me ua ba oa ka, ho rialo Morena Molimo.

₉“ ‘Joale ka u hlatsoa ka metsi, ka u hlatsoisisa ho tlosa mali a ho uena, ka u tlotsa ka ole. ₁₀Ka u tentša mose o hōmiloeng, ka u roesa meqathatso ea letlalo la qibi. Ka u roesa moqhaka oa lene e ntle, ka u apesa seaparo sa sileka. ₁₁Ka u tlatlapetsa mekhabiso, ka u roesa lipetja matsohong, molaleng ka u roesa sekhama. ₁₂Ka u roesa lesale nkong, litsebeng ka u roesa masale a 'mofa, ka ba ka u roesa le mofapahlooho o motle. ₁₃Kahoo u n'u tlatlapetse mekhabiso ea khauta le ea silefera, liaparo tsa hao e le tsa lene e ntle le tsa sileka e hōmileng. Lijo tsa hao e ne e le tsa phofo e thumisehileng, le mahe a linotši le ole. Ua ba motle ka ho fetisisa, ua atleha, ua ba ua ba mofumahali. ₁₄Ka baka la botle ba hao, botumo ba hao ba tlala-tlala har'a balichaba, hobane mekhabiso eo ke neng ke u khabisitse ka eona e ile ea etsa hore botle ba hao bo phethehe, ho rialo Morena Molimo.

₁₅“ ‘Empa u ile ua tšepa botle ba hao, botumo ba hao ba u fetola seotsoa, ua etsa bohlola le bohle ba fetang ka tsela, ua ba oa bona. ₁₆Ua nka tse ling tsa liaparo tsa hao, ua khabisa libaka tsa hao tsa borapeli ka tsona, li le mebala-bala, 'me ua etsetsa bootsoa ba hao hona moo. Lintho tsa mofuta ona ha lia lokela ho etsahala, kapa ho ba teng. ₁₇Ua nka le mabenyane a matle a khauta le a silefera, ao ke neng ke u file 'ona, ua iketsetsa melingoana e metona ka 'ona, 'me ua feba le eona. ₁₈Ua nka liaparo tsa hao tse hōmiloeng, ua e apesa tsona, ua e nyehella ka ole ea ka le ka mokubetso oa ka. ₁₉Ua e nyehella le ka lijo tsa ka, tseo ke u fileng tsona hore u li je, e leng tsa phofo e thumisehileng, le mahe a linotši, le ole, hore e be mokubetso o monko o monate. Tsena ke tsona tse ileng tsa etsahala, ho rialo Morena Molimo.

₂₀“ ‘Ua nka le bara le barali ba hao, bao u ntsoaletseng bona, ua etsetsa melingoana ena sehlabelo ka bona hore e ba je. Na u il'a bona bootsoa boo ba hao o sa lekana, ₂₁hoo u bileng ua bolaea bana ba ka, 'me ka bona ua etsetsa melingoana eo secheso? ₂₂Ha u ntse u etsa manyala ana a hao le bootsoa bona ba hao, ha ua ka ua hopola matsatsi a bocha ba hao, ha u ne u tsotse, u le feela, u le litšila ke mali a hao.

₂₃“ ‘U malimabe! U malimabe hakaakang! ho rialo Morena Molimo. Hoba u etse bobe bona bohle ba hao, ₂₄u ile ua ikhahela libaka tsa borapeli mabaleng 'ohle. ₂₅Mateanong 'ohle a litsela u ile ua haha libaka tsa borapeli, ua tlontlolla botle ba hao, ua ipeketlèla bohle ba fetang ka tsela, ua totisa bootsoa ba hao. ₂₆U bile u entse bootsoa le Baegepeta ba ahisaneng le uena, ba tletseng litakatso tsa nama, ua totisa bootsoa bona ba hao, 'me ua nkhalefisa.

₂₇“ ‘Joale ke otlolletse letsoho la ka holim'a hao, ka fokotsa seo ke neng ke u abetse sona, ka neelana ka uena matsohong a ba u hloileng, e leng barali ba Bafilesita, bao mekhoa ea hao ea bootsoa e neng e ba hlabisa lihlong.

₂₈“ ‘Kahobane u ne u sa khotsofale, le Baasiria u entse bootsoa le bona. E, u bile seotsoa sa bona, empa le bona ha baa ka ba u khotsofatsa. ₂₉Hape-hape u entse bootsoa bo bongata ho ea fihla naheng ea Bakalatiea, e leng naha ea bahoebi, empa le bona ha baa ka ba u khotsofatsa.

₃₀“ ‘U chacheha hakaakang ha u etsa lintho tsee, u etsisa seotsoa se hlokang lihlong! ho rialo Morena Molimo. ₃₁Ha u ne u haha libaka tsa borapeli mateanong a litsela, le mabaleng 'ohle, u ne u sa ke seotsoa, hobane u ne u sa batle chelete.

₃₂“ ‘U mosali oa sefèbè, ea fèbang le banna ba bang, ho e-na le ho rata monna oa hao! ₃₃Mosali oa seotsoa o neoa chelete, empa uena u fana ka limpho ho baratuoa bohle ba hao, u ba reka hore ba tle ho uena ba e-tsoa hohle, ho tla fèba le uena. ₃₄Bootsoa ba hao bo fapane le ba basali ba bang ba liotsoa, hobane ha ho monna ea u salamang hore u etse bootsoa le eena. Uena ha u fumane moputso oa bootsoa, empa ke uena ea fanang ka moputso: Ka baka leo, u fapane le liotsoa tse ling.

₃₅“ ‘Ka baka leo, uena seotsoa tooe! utloa lentsoe la Morena. ₃₆Morena Molimo o bua tjena: Erekaha u hafakile lichelete tsa hao, ua pepesa bofeela ba hao, ha u ne u etsa bootsoa le baratuoa ba hao, le melingoana ea hao e manyala, eo u e etselitseng sehlabelo ka bara ba hao; ₃₇ka baka leo, ke tla phutha baratuoa ba hao bohle, bao u neng u ithabisa le bona; bohle bao u neng u ba rata, le bohle bao u neng u ba hloile. Ke tla ba bokella, ba u etsetse sakana-la-nkópe, ke ba pepesetse bofeela ba hao, hore ba u bonele. ₃₈Ke tla u ahlōla ka kahlōlo ea basali ba lifèbè le ba babolai. Ka baka la khalefo ea ka le bohale ba ka, ke tla iphetetsa ho uena, ke u ahlōlele lefu. ₃₉Ke tla neelana ka uena matsohong a baratuoa bao ba hao, ba heletse libaka tseo u etsetsang bootsoa ho tsona, le libaka tsa hao tsa borapeli. Ba tla u hlobolisa liaparo tsa hao, ba nke le mabenyane a hao, ba u siee u tsotse, u le feela. ₄₀Ba tla hlohleletsa mokhōpi hore o u tlepetse ka majoe, o u etse litsekana ka lisabole tsa oona. ₄₁Baratuoa bao ba tla chesa matlo a hao, ba u ahlōlele moo basali ba bangata ba ntseng ba talimile. Ke tla felisa bootsoa ba hao, 'me ha u sa tla hlola u nea baratuoa ba hao chelete. ₄₂Bohale ba ka ho uena bo tla kokobela, le khalefo ea ka e khaotse, ke khutse, ke se hlole ke u halefela hape.

₄₃“ ‘Erekaha u sa ka ua hopola matsatsi a bocha ba hao, ua 'na ua nkhalefisa ka ho etsa lintho tsena, bona mona he, le 'na ke tla iphetetsa ka baka la tsena tseo u li entseng, ho rialo Morena Molimo. Na ha ua ka ua eketsa bootsoa holim'a manyala ohle ao u a entseng?

₄₄“ ‘Motho ka mong ea sebelisang maele, ha a bua ka uena Jerusalema, o tla sebelisa maele a reng: “Ngoan'a tali o tsejoa ka mereto.” ₄₅U fela u le morali oa 'm'ao kannete, eena ea neng a nyonya monna oa hae le bana ba hae. U tšoana hantle le bana beno, ba neng ba nyonya banna ba bona le bana ba bona. 'M'a lōna e ne e le Mohete, ntat'a lōna eena e le Moamore. ₄₆Moholoane oa hao ke Samaria, eena ea phelang le barali ba hae ka lebōea ho uena. Moena oa hao ke Sodoma, eena ea phelang le barali ba hae ka boroa ho uena. ₄₇Empa uena ha ua ka ua tsamaea mehlaleng ea bona, leha e le ho etsa liketso tsa bona tse manyala; feela e ne eka ke ntho e nyenyane ho uena ha mekhoa ea hao eohle e bolile ho feta ea bona. ₄₈Ruri kea hlapanya, ho rialo Morena Molimo, moena oa hao Sodoma, esita le barali ba hae, ha baa ka ba etsa seo uena le barali ba hao le se entseng.

₄₉“ ‘Bona mona he; sena e bile sona sebe sa moena oa hao Sodoma: Eena le barali ba hae ba ne ba ikhōhōmōsa, ba pesotse limpa, ba phela ka boiketlo, ba sa thuse bafumanehi kapa bahloki. ₅₀Ba ne ba ikakasa, ba etsa manyala mahlong a ka; kahoo ka ba felisa joalokaha le uena u bone. ₅₁Samaria ha ea etsa le halofo ea libe tseo u li entseng, empa uena u entse manyala a mangata ho feta a Samaria, ua etsa hore manyala a bana beno a talimehe e se letho ha a bapisoa le ao u a entseng. ₅₂Jara sekhobo sa libe tsa hao, hobane u entse hore e ke bana beno ba lokile ho u feta. Libe tsa hao li nyonyeha ho feta tsa bona, hoo ekang ba lokile ho u feta. Ka baka leo, soaba, u hlajoe ke lihlong, hobane u entse hore e ke ba lokile ho u feta.

₅₃“ ‘Ke tla boela ke atlehisa Sodoma le barali ba hae, le Samaria le barali ba hae; le uena Jerusalema, ke tla u atlehisa, ₅₄e le hore u tle u jare sekhobo sa libe tsa hao, u hlajoe ke lihlong, ka baka la tsohle tseo u li entseng ha u ne u ba tšelisa. ₅₅Ha e le bana beno, e leng Sodoma le barali ba hae, le Samaria le barali ba hae, ba tla boela ba e-ba seo ba neng ba le sona pele; le uena le barali ba hao le tla boela le e-ba seo le kileng la ba sona pele. ₅₆Ha u ne u sa ntsane u ikhōhōmōsa, u ne u sa rate le ho bitsa lebitso la ngoan'eno Sodoma, ₅₇bokhopo ba hao bo e-s'o pepesoe. Empa joale u tšoana le Sodoma hantle, u fetohile sesomo ho Baarame le ho Bafilesita, esita le ho ba ahisaneng le uena, ba u hloileng. ₅₈U tla otleloa bokhopo ba hao, le liketso tsa hao tse manyala, ho rialo Morena.

₅₉“ ‘Morena Molimo o bua tjena: Ke tla u etsa kamoo u entseng kateng, hobane u nyelisitse kano ea ka ka ho senya selekane. ₆₀Leha ho le joalo ke tla hopola selekane seo, seo ke se entseng le uena mehleng ea bocha ba hao, 'me ke tla etsa selekane sa kamehla eohle le uena. ₆₁Joale u tla hopola litsela tsa hao, u hlajoe ke lihlong ha u amohela bana beno, ba baholo le ba banyenyane. Ke u nea bona e le barali ba hao, empa e seng ka baka la selekane seo ke se entseng le uena. ₆₂Ke tla etsa selekane le uena, 'me u tla tseba hore ke 'na Morena. ₆₃Ke tla u tšoarela libe tsohle tseo u li entseng, empa u tla 'ne u li hopole, u hlajoe ke lihlong hoo u ke keng ua ahlamisa molomo oa hao, ho rialo Morena Molimo.’ ”