ESEKIELE 34

₁Lentsoe la Morena la fihla ho 'na, la re: ₂“Uena ngoan'a motho, porofetela balisa ba Iseraele; ba porofetele, u re ho bona: ‘Morena Molimo o bua tjena ho balisa: Ho malimabe balisa ba Iseraele ba iphepang ba le bang! Na balisa ha ba tšoanele ho fepa mohlape? ₃Lōna le ja mafureng, le apara tsa boea, le hlaba tse nonneng, empa ha le fepe mohlape. ₄Ha le matlafatse tse tsetang, tse kulang ha le li phekole, tse robehileng ha le li tlamise, tse khelohileng ha le li phuthe, tsa malahleha ha le li batle, empa le li khanna ka thata, lea li hlekefetsa. ₅Ka baka la ho hloka molisa li qhalane, 'me li jeoa ke libatana tsohle tsa naha. ₆Linku tsa ka li solla kahohle lithabeng le maralleng; mohlape oa ka o qhalane kahohle lefatšeng, 'me ha ho ea o batlang, leha e le ho o batlisisa.

₇“ ‘Ka baka leo, lōna balisa, mamelang lentsoe la Morena! ₈Kea hlapanya, ho rialo Morena. Linku tsa ka li fetohile lelobelo, 'me li jeoa ke libatana tsohle tsa naha, ka baka la ho hloka molisa. Balisa ha baa ka ba batla mohlape oa ka, empa ba ile ba iphepa ba le bang, ba se ke ba fepa mohlape oa ka. ₉Ka baka leo, lōna balisa, mamelang lentsoe la Morena: ₁₀Morena Molimo o bua tjena: Ke tla loantša balisa, mohlape oa ka ke o batle ho bona, ke be ke ba tlose boliseng ba oona, e le hore ba tle ba se hlole ba iphepa ba le bang. Ke tla ntša mohlape oa ka hanong la bona, ba se hlole ba iphepa ka oona.’ ”

₁₁Morena Molimo o bua tjena: “ 'Na ka sèbele ke tla batla linku tsa ka, ke li batlisise. ₁₂Joalokaha molisa a batla linku tsa hae ha a fumana li qhalane, le 'na ke tla batla linku tsa ka joalo. Ke tla li phutha hohle moo li qhalanetseng teng mohl'a maru a koahetseng, ho le lefifi. ₁₃Ke tla li ntša har'a lichaba, ke li phuthe linaheng lisele, ke li khutlisetse ha habo tsona. Ke tla li alosetsa lithabeng tsa Iseraele, le likhohlong, le metseng eohle ea naha eo. ₁₄Ke tla li katla makhulong a matala, li fule maloting a Iseraele. Li tla bōtha metebong e metle, li fule makhulong a nonneng, lithabeng tsa Iseraele. ₁₅'Na ka sebele ke tla fepa mohlape oa ka, ke o bōthise, ho rialo Morena Molimo.

₁₆“Ke tla batla tse lahlehileng, ke phuthe tse khelohileng, ke tlamise tse robehileng, ke matlafatse tse tsetang. Ha e le tse nonneng, tse matla, tsona ke tla li bolaea. Ke tla alosa mohlape oa ka ka toka.

₁₇“Ha e le lōna mohlape oa ka, ho rialo Morena Molimo, ke tla le ahlōla, ke khethe nku e lokileng ho e sa lokang, le lipheleu ho liphooko. ₁₈Na ha hoa lekana hore le fule makhulong a matala? Na le tšoanela ho 'na le hatakela ka maoto makhulo a setseng? Na ha hoa lekana hore le noe metsi a hloekileng? Na le tšoanela ho luka ka maoto metsi a setseng? ₁₉Ebe mohlape oa ka o tla fula joang boo le bo hataketseng ka maoto a lōna, 'me o noe metsi ao le a lukileng ka maoto a lōna?”

₂₀Ka baka leo, Morena Molimo o bua tjena ho bona: “Bonang, 'na ka sebele ke tla le ahlōla, ke khethe nku e nonneng ho e otileng. ₂₁Linku tsohle tse tsetang le ile la li thesela ka lehlakore le ka lehetla, la ba la li koeba ka linaka tsa lōna, ho fihlela le li qhalanyetsa kantle ho makhulo. ₂₂Kahoo ke tla pholosa mohlape oa ka, o se hlole o lobeloa, ke ahlōle, ke khethe nku ho nku. ₂₃Ke tla li nea molisa a le mong, e leng mohlanka oa ka Davida; o tla li alosa, a li fepe, e be molisa oa tsona. ₂₄'Na Morena ke tla ba Molimo oa tsona, 'me mohlanka oa ka Davida, e be khosana ea tsona. 'Na Morena ke buile joalo. ₂₅Ke tla etsa selekane sa khotso le linku tsa ka, ke felise libatana kahar'a naha, linku tsa ka li iphelele ka khotso lehoatateng, li ipōthele merung.

₂₆“Ke tla li hlohonolofatsa, ke hlohonolofatse le libaka tse pota-potileng leralla la ka. Ke tla nesa lipula ka nako ea tsona, e be lipula tsa mahlohonolo. ₂₇Lifate tsa naha li tla beha litholoana, le masimo a melise lijalo. Sechaba sa ka se tla itulela ka khotso kahar'a naha; kahoo se tla tseba hore ke 'na Morena, mohla ke robang joko e melaleng ea sona, ke se namolela matsohong a ba se entseng makhoba. ₂₈Sechaba sa ka se ke ke sa hlola se fetoha lelobelo la balichaba, le libatana tsa naha li ke ke tsa se harola. Se tla itulela ka khotso ho se motho ea se tšosang. ₂₉Ke tla se melisetsa lijalo tsa bohlokoa; se ke ke sa hlola se bolaoa ke tlala naheng eo ea sona, 'me ha se sa tla jara sekhobo sa balichaba. ₃₀Kahoo se tla tseba hore 'na Morena Molimo oa sona, ke na le sona; se tsebe le hore sona, e leng ba ntlo ea Iseraele, ke sechaba sa ka, ho rialo Morena Molimo.

₃₁“Lōna mohlape oa ka, linku tsa makhulo a ka, le sechaba sa ka, 'na ke Molimo oa lōna, ho rialo Morena Molimo.”