ESEKIELE 39

₁“Uena ngoan'a motho, porofetela Gogo, u re: ‘Morena Molimo o bua tjena: Bona, kea u loantša uena Gogo, u leng khosana e kholo ea Mesheke le Tubale. ₂Ke tla u khutlisa, ke u hulanye, ke u nyolle hōle lebōea, u e'o futuhela lithaba tsa Iseraele. ₃Ke tla phaila seqha se letsohong la hao le letšehali, se oe, ke lihe metsu e letsohong la hao le letona. ₄Uena Gogo le mabōtho a hao, le lichaba tse emeng le uena, le tla bolaeloa holim'a lithaba tsa Iseraele, litōpō tsa lōna li jeoe ke linonyana tse jang lififi, le ke libatana tsa naha. ₅Le tla bolaeloa har'a naha, hobane ke buile joalo, ho rialo Morena Molimo. ₆Ke tla rōmella mollo naheng ea Magogo le ho bohle ba ahileng mabōpong a leoatle, ba phelang ka khotso, 'me ba tla tseba hore ke 'na Morena.

₇“ ‘Ke tla etsa hore lebitso la ka le halalelang le tsejoe har'a sechaba sa ka sa Iseraele. Ha nka ke ka hlola ke lumela hore lebitso la ka le halalelang le silafatsoe, 'me balichaba ba tla tseba hore 'na ke Morena ea halalelang oa Iseraele. ₈Bonang, letsatsi lea tla! Le tla fela le tle! ho rialo Morena Molimo. Ke lona letsatsi leo ke buileng ka lona.

₉“ ‘Baahi ba metse ea Iseraele ba tla tsoa, ba bese mollo ka libetsa tsa bona: lithèbè le lithejana, liqha le metsu, likoto le marumo. Ba tla qeta lilemo tse supileng ba ntse ba besa mollo ka tsona. ₁₀Kahoo ba ke ke ba hlola ba roalla patsi naheng, kapa ba rèma lifate merung, hobane ba tla besa mollo ka libetsa tsa bona. Ba tla tlatlapa ba ileng ba ba tlatlapa, ba hape tsa ba ileng ba hapa tsa bona, ho rialo Morena Molimo.

₁₁“ ‘Ka lona letsatsi leo, ke tla fa Gogo setša sa mabitla naheng ea Iseraele, khohlong ea ba etelang nq'a bochabela ho leoatle. Setša sena se tla thiba tsela ea baeti, hobane Gogo le matšoele a hae ba tla epeloa hona teng. Kahoo sebaka seo se tla bitsoa Hamone-Gogo.

₁₂“ ‘Ka khoeli tse supileng Baiseraele ba tla 'ne ba ba epele, e le hore ba hloekise naha. ₁₃Batho bohle ba naha eo ba tla thusa ho ba epela, 'me hona e be tlōtla ho bona, letsatsing leo ke tlang ho tlotlisoa ka lona, ho rialo Morena Molimo.

₁₄“ ‘Etlare ha ho fetile likhoeli tse supileng ho khethoe banna ba tla potoloha le naha eohle, ho batla litōpō tse rapaletseng har'a naha, ba li epele, e le hore naha e tle e hloeke. ₁₅Ha ba ntse ba tsamaea har'a naha joalo, 'me e mong a bona lesapo la motho, o tla hloma mokolokotoane hona moo, ho fihlela ba chekang mabitla ba le epela ka khohlong ea Hamone-Gogo. ₁₆Lebitso la motse le lona e tla ba Hamone. Ba tla hloekisa naha joalo.’

₁₇“Uena ngoan'a motho, Morena Molimo o bua tjena: Bitsa linonyana ka mefuta ea tsona, le libatana tsohle tsa naha, u re: ‘Phuthehang kaofela, le e-tsoa hohle, le tle koano sehlabelong sa ka, seo ke le etsetsang sona, sehlabelo se seholo se holim'a lithaba tsa Iseraele, e le hore le tle le je nama le noe le mali. ₁₈Le tla ja nama ea bahale, le noe mali a mahosana a lefatše, joalokaha eka ke a lipheleu, le a likonyana, le a lipoli, le a lipohoana tseo kaofela ha tsona e leng tse nontšitsoeng tsa Bashane. ₁₉Sehlabelong seo ke le etselitseng sona le tla ja mafura ho fihlela a le tena, le noe le mali ho fihlela a le taha. ₂₀Tafoleng ea ka le tla ja, le khōre nama ea lipere le ea bapalami ba tsona, le ea bahale le ea bahlabani ka mefuta ea bona, ho rialo Morena Molimo.’

₂₁“Ke tla bonahatsa tlōtla ea ka har'a balichaba, 'me balichaba bohle ba tla bona likahlōlo tsa ka, ba bone le letsoho leo ke ba otlileng ka lona. ₂₂Ka mokhoa o joalo, ho tloha mohl'a tsatsi leo, ba ntlo ea Iseraele ba tla tseba hore ke 'na Morena Molimo oa bona. ₂₃Balichaba ba tla tseba hore ba ntlo ea Iseraele ba ile ba isoa bothōpuoeng ka baka la bokhopo ba bona, hobane ba ile ba ntšiteloa. Ka baka leo, ke ile ka ba patela sefahleho sa ka, ka neelana ka bona matsohong a lira tsa bona, 'me bohle ba ile ba bolaoa ka sabole. ₂₄Ke ile ka ba otla ho ea ka litšila tsa bona le litlōlo tsa bona, 'me ka ba patela sefahleho sa ka.

₂₅“Ka baka leo, Morena Molimo o bua tjena: Joale ke tla khutlisa ba ntlo ea Jakobo bothōpuoeng, ke hauhele bohle ba ntlo ea Iseraele, 'me ke boulele lebitso la ka la halalelang. ₂₆Ha ba se ba phela ka khotso naheng ea bona, ho se ea ba tšosang, ba tla lebala lihlong tsa bona, le litšito tsohle tseo ba ileng ba ntšiteloa ka tsona. ₂₇Ha ke se ke ba khutlisitse lichabeng, ke ba ntšitse linaheng tsa lira tsa bona, ke tla ikhalaletsa ka bona moo lichaba tse ngata li ntseng li bona. ₂₈Ke moo ba tla tseba hore ke 'na Morena Molimo oa bona, ea ileng a ba isa bothōpuoeng, har'a balichaba, a ba a ba khutlisetsa naheng ea habo bona, ho se le ea mong ea setseng moo. ₂₉Nke ke ka hlola ke ba patela sefahleho sa ka, hobane ke theoletse Moea oa ka holim'a ba ntlo ea Iseraele, ho rialo Morena Molimo.”