Molimo o etsa selekane le Aborame
1Hoba tsena li fete, lentsoe la Morena la bua ho Aborame ponong, la re:
“Se tšabe, Aborame!
Ke thebe ea hao;
moputso oa hao
o tla ba moholo haholo.”
2Empa Aborame a re: “Oho, Morena Molimo, u tla 'nea'ng, ha e le moo ke tla shoa ke se na ngoana, 'me mojalefa oa ntlo ea ka e le Eleesere oa Modamaseka?” 3Aborame a boela a re: “Bona, ha ua mpha ngoana, 'me mohlanka ea tsoaletsoeng lapeng la ka e tla ba mojalefa oa ka.”
4Eaba Morena o bua ho eena, o re: “Che, eo e ke ke ea e-ba mojalefa oa hao; mojalefa oa hao e tla ba mora ea tsoang lethekeng la hao.” 5A mo nkela kantle, 'me a re ho eena: “Talima leholimong, 'me u bale linaleli, haeba u ka tseba ho li bala;” 'me a re: “Litlōhōlō tsa hao li tla ba kaalo.”
6Aborame a lumela ho Morena, 'me Morena a 'malla hoo e le ho loka.
7Eaba o re ho eena: “Ke 'na Morena ea u ntšitseng Ure e naheng ea Bakalatiea, ho tla u nea naha ena hore e be ea hao.”
8Aborame a re: “Oho, Morena Molimo, ke tla tseba joang hore ke tla e rua?”
9Eaba Morena o re ho eena: “Ntlisetse khomo ea sethole e lemo li tharo, le pōli e tšehali e lemo li tharo, le pheleu e lemo li tharo, le leebana-khoroana, le lelinyane la leeba.”
10A mo tlisetsa tsena kaofela, a li khèkhètha, a bea mokhèkhètho ka mong o bapile le oa habo oona, empa linonyana tsona a se ke a li khèkhètha. 11Manong a ubella lififi tsena, empa Aborame a a leleka.
12Ha letsatsi le e-ea malikelong, Aborame a fihleloa ke sephume sa boroko, 'me lefifi le tšabehang la mo aparela. 13Eaba Morena o re ho Aborame: “Tseba hore litlōhōlō tsa hao e tla ba bajaki naheng ea balichaba; li tla etsoa makhoba teng, 'me li tla hatelloa ka lilemo tse makholo a mane. 14Empa ke tla ahlola sechaba se tla li etsa makhoba, 'me hamorao li tla tloha teng li e-na le maruo a mangata. 15Ha e le uena u tla ikela ho bo-ntat'ao ka khotso, 'me u tla shoa hoba u phele halelele ka boiketlo. 16Molōko oa bone o tla khutlela mona, hobane bokhopo ba Baamore ha bo e-s'o phethehe.”
17Ha letsatsi le se le liketse, 'me ho se ho fifetse haholo, ha hlaha sebōpi se kubellang mosi, le khanare ea mollo; tsena tsa feta pakeng tsa mekhèkhètho eo. 18Ka lona tsatsi leo Molimo a etsa selekane le Aborame, a re: “Litlōhōlō tsa hao ke tla li nea naha ena, ho tloha nōkaneng ea Egepeta ho isa Nōkeng e Kholo, e leng ea Euferatese; 19le naha ea Bakene, le ea Bakenase, le ea Bakadamone, 20le ea Bahete, le ea Baperise, le ea Barefaime, 21le ea Baamore, le ea Bakanana, le ea Bagirigashe le ea Bajebuse.”
