Ho tsoaloa ha Ishemaele
1Sarai, mosali oa Aborame, o ne a sa ka a mo tsoalla bana, empa o ne a e-na le lekhoba la mosali eo e leng Moegepeta, le bitsoang Hagare. 2Sarai a re ho Aborame: “Morena o ntlhokisitse thari; ka baka lena e-ea, u kene likobong tsa lekhoba lena la mosali, mohlomong ke tla ba le bana ka lona.”
Aborame a lumela kōpo ea Sarai. 3Kamora' hoba Aborame a phele lilemo tse leshome naheng ea Kanana, Sarai, mohats'a hae, a nka Hagare, lekhoba la hae la mosali eo e leng Moegepeta, a le nea Aborame ho ba mosali oa hae. 4Aborame a kena likobong tsa Hagare, 'me Hagare ea e-ba moimana; joale a qala ho nyelisa mong'a hae. 5Sarai a re ho Aborame: “Nyeliso ena ke e etsetsoa ka baka la hao! Ke 'na ea u neileng lekhoba lena ho ba mosali oa hao, empa haesale le hlokomela hore le ithoetse, lea 'nyelisa. A e ke e be Morena ea ahlolang pakeng tsa rōna le uena!”
6Aborame a re ho Sarai: “Lekhoba leo la mosali le matsohong a hao; etsa kamoo u ratang kateng ka lona.” Sarai a le hlorisa haholo, hoo le bileng la baleha.
7Lengeloi la Morena la fumana Hagare pel'a seliba se har'a lehoatata, se tseleng e eang Shure, 8'me la re: “Hagare, lekhoba la Sarai, u tsoa kae, u ea kae?”
Hagare a arabela, a re: “Ke baleha mong'a ka, Sarai.”
9Empa lengeloi la Morena la re: “Khutlela ho mong'a hao, 'me u ikokobetse tlas'a hae.” 10Lengeloi la Morena la boela la re ho eena: “Ke tla ngatafatsa litlōhōlō tsa hao haholo, hoo li ke keng tsa baloa ka baka la bongata.”
11Hape lengeloi la Morena la re ho eena:
“Bona, u moimana,
'me u tla tsoala mora.
U tla mo rea lebitso la Ishemaele,
hobane Morena o utloile
matšoenyeho a hao.
12E tla ba monna ea kang tonki
ea naha ka bohlaha,
o tla loantša bohle,
'me bohle ba tla mo loantša;
o tla aha ka bochabela
ho bana babo bohle,
a ba loantše.”
13Hagare a re lebitso la Morena ea neng a bua le eena ke “Molimo ea Bonang”, hobane o ne a re: “Na ke 'nete ke hlile ke bone Molimo, 'me ke ntse ke phela kamora' pono eo ea ka?” 14Ka lebaka lena seliba sena sa bitsoa Seliba sa Lakai-Roi. Se pakeng tsa Kadeshe le Berede.
15Hagare a tsoalla Aborame mora, 'me Aborame a rea mora eo a mo tsoaletsoeng ke Hagare lebitso la Ishemaele. 16Aborame o ne a e-na le lilemo tse mashome a robeli a metso e tšeletseng, ha Hagare a mo tsoalla mora, Ishemaele.
