Lebōllo ke letšoao la selekane
1Ha Aborame a e-na le lilemo tse mashome a robong a metso e robong, Morena a iponahatsa ho eena, a re:
“Ke 'na Molimo ea matla 'ohle;
nkhahlise ka metsamao ea hao,
'me u hloke koli.
2Ke tla etsa selekane
pakeng tsa rōna le uena,
'me litlōhōlō tsa hao
li tla ngatafala haholo.”
3Eaba Aborame o itihela fatše ka sefahleho, 'me Molimo a bua le eena, a re:
4“Selekane sa rōna le uena ke sena:
u tla ba ntat'a letšoele la lichaba.
5Ha u sa tla hlola u bitsoa Aborame;
lebitso la hao e tla ba Aborahama,
hobane ke tla u etsa
ntat'a lichaba tse ngata.
6“Ke tla u fa bana ba bangata haholo; ho uena ho tla tsoa lichaba, 'me u tla tsoala likhosi. 7Ke tla tiisa selekane sa ka le uena, le litlōhōlō tsa hao, ka ho hlahlamana ha melōko ea tsona, e be selekane se sa feleng; ke be Molimo oa hao le oa litlōhōlō tsa hao. 8Naha eo u jakileng ho eona, naha eohle ea Kanana, ke tla u nea eona le litlōhōlō tsa hao, e be leruo la mehla eohle, 'me ke tla ba Molimo oa tsona.”
9Molimo a boela a re ho Aborahama: “Uena u tla bōlōka selekane sa ka; uena le litlōhōlō tsa hao ka melōko ea tsona. 10Ke sena selekane se pakeng tsa rōna le uena le litlōhōlō tsa hao, seo le tla se bōlōka; bohle ba batona ba lōna ba tla bolotsoa. 11Le tla bolotsoa ka ho poma leeko, 'me hona e tla ba letšoao la selekane se pakeng tsa rōna le uena. 12Ngoana e mong le e mong oa hao e motona o tla bōlōtsoa ha a e-na le matsatsi a robeli; e mong le e mong e motona melōkong eohle ea hao, le ea tsoaletsoeng tlung ea hao, le ea rekiloeng ka chelete ho molichaba ea sa tsoalaneng le uena. 13E, ho tla bolotsoa ngoana ea tsoaletsoeng tlung ea hao, le ea rekiloeng ka chelete ea hao. Selekane sa ka se tla ba nameng ea hao, e be selekane sa mehla eohle. 14Motho oa leqai, ea sa bolotsoang ka ho pongoa leeko, o tla khaoloa sechabeng sa habo, hobane o sentse selekane sa ka.”
15Molimo a boela a re ho Aborahama: “Mosali oa hao Sarai, u se hlole u 'mitsa Sarai; lebitso la hae e tla ba Sara. 16Ke tla mo hlohonolofatsa, ke be ke u fe mora ka eena. Ke tla mo hlohonolofatsa; e tla ba 'm'a lichaba, 'me likhosi tsa lichaba li tla tsoa ho eena.”
17Aborahama a itihela fatše ka sefahleho, a tšeha, 'me a re ka pelong: “Na monna ea lilemo li lekholo a ka tsoala ngoana? Kapa na Sara a ka hlola a eba le ngoana a le lilemo li mashome a robong?” 18Eaba Aborahama o re ho Molimo: “Ishemaele a ke a u phelele!”
19Molimo a re: “Ruri, Sara mosali oa hao, o tla u tsoalla mora, 'me u tla mo rea lebitso la Isaka. Ke tla etsa selekane sa rōna le eena e le selekane sa mehla eohle, sa hae le sa litlōhōlō tsa hae. 20Ha e le tabeng ea Ishemaele, ke u mametse: bona, ke tla mo hlohonolofatsa, ke mo fe bana ba bangata, ke ba atise haholo. O tla tsoala mahosana a leshome le metso e 'meli, 'me ka tla mo etsa sechaba se seholo. 21Empa ke tla tiisa selekane sa ka le Isaka, eo Sara a tla u tsoalla eena isao, ka eona nako ena.” 22Hoba Molimo a qete ho bua le Aborahama, a nyoloha, a tloha ho eena.
23Joale Aborahama a nka mora oa hae Ishemaele, le bana bohle ba lelapa la hae, le bohle ba rekiloeng ka chelete ea hae, bohle ba batona ba ntlo ea Aborahama, a ba bōlōtsa ka lona letsatsi leo ka ho ba pōma leeko, joalokaha Molimo a ne a mo laetse. 24Aborahama o ne a e-na le lilemo tse mashome a robong a metso e robong ha a bōlla, 25'me mora oa hae Ishemaele eena a bōlla ha a e-na le lilemo tse leshome le metso e meraro. 26Ka lona letsatsi leo Aborahama le mora oa hae Ishemaele ba bōlōtsoa; 27le banna bohle ba lelapa la hae, le ba tsoaletsoeng tlung ea hae, le ba rekiloeng ka chelete ho balichaba, le bona ba bōlōtsoa le eena.
