Aborahama oa lekoa
1Hoba tsena li fete, Molimo a leka Aborahama, a re ho eena: “Aborahama!”
Eena a re: “Ke 'na enoa.”
2Molimo a re: “Joale nka mora oa hao ea mong feela, eo u mo ratang, Isaka, u ee naheng ea Moria, 'me ka eena u etse sehlabelo sa secheso, holim'a e 'ngoe ea lithaba, eo ke tla u supisa eona.”
3Aborahama a tsoha ka malungoalungoana, a qhaneha tonki ea hae, a nka ba babeli ba bahlanka ba hae, le mora oa hae, Isaka. A ratha patsi ea secheso, a nt'o tsamaea ho ea sebakeng seo Molimo a 'moleletseng sona. 4Ka letsatsi la boraro, ha Aborahama a phahamisa mahlo, a bonela sebaka seo hōle. 5Aborahama a re ho bahlanka ba hae: “Lōna salang mona le tonki. 'Na le moshanyana re tla ea mose mane, re e'o khumamela Molimo, ebe re khutlela ho lōna hape.”
6Eaba Aborahama o nka patsi ea secheso, o e jarisa mora oa hae Isaka; eena a nka mollo le thipa, ba tsamaea 'moho ba babeli. 7Isaka a bua le ntat'ae Aborahama, a re: “Ntate!”
Aborahama a re: “Ke 'na enoa, ngoan'a ka.”
Eaba o re: “Mollo le patsi ke tsena; joale konyana ea sehlabelo sa secheso e kae?”
8Aborahama a araba, a re: “Ngoan'a ka, Molimo tla bona, a ipatlele konyana ea sehlabelo sa secheso.” Eaba ba ntse ba tsamaea 'moho ba babeli.
9Ba fihla sebakeng seo Molimo a ileng a 'molella sona. Aborahama a haha aletare hona teng, a bea patsi hantle; eaba o tlama mor'a hae Isaka, o 'mea holim'a aletare, kaholim'a patsi. 10Joale Aborahama o otlolla letsoho la hae, a nka thipa ho hlaba mora oa hae. 11Empa lengeloi la Morena la hōoeletsa le le leholimong, la re: “Aborahama! Aborahama!”
Eaba o re: “Ke 'na enoa.”
12La re: “U se ke ua isa letsoho la hao ho moshanyana; u se ke ua mo etsa letho, hobane joale kea tseba hore u tšaba Molimo, ha u sa ka ua nkhanela ka mora oa hao ea mong feela.”
13Aborahama a phahamisa mahlo, 'me a talima, a bona pheleu kamora' hae, linaka tsa eona li tšoasitsoe sehlahleng. Aborahama a ea, a nka pheleu, 'me a etsa sehlabelo sa secheso ka eona, bakeng sa mora oa hae. 14Aborahama a rea sebaka seo lebitso la Morena o tla Bona, 'me le kajeno ho sa ntse ho thoe “Thabeng, Morena o tla bona.”
15Lengeloi la Morena la hōoeletsa Aborahama khetlo la bobeli, le ntse le le leholimong, 16'me la re: “Morena o re: ‘Ke ikanne ka bonna, hore kaha u entse ntho ena, u sa ka ua nkhanela ka mora oa hao ea mong feela, 17ruri ke tla u hlohonolofatsa haholo, litlōhōlō tsa hao ke li ngatafatse joaloka linaleli tsa leholimo, le joaloka lehlabathe le lebōpong la leoatle. Litlōhōlō tsa hao li tla hapa metse ea lira tsa tsona. 18Lichaba tsohle tsa lefatše li tla hlohonolofala ka litlōhōlō tsa hao, hobane u mametse lentsoe la ka.’ ”
19Joale Aborahama a khutlela ho bahlanka ba hae; ba tsamaea hammoho ho khutlela Beeresheba, 'me a aha teng.
20Aborahama a tsebisoa, ha thoe: “Bona, Mileka le eena o tsoaletse moen'a hao, Nakore, bana. 21Oa matsibolo ke Use, le Buse moen'a hae, le Kemuele, ntat'a Arame; 22le Kesede, le Haso, le Piledashe, le Jidalafa, le Bethuele. 23Bethuele a tsoala Rebeka, 'me ba robeli bana ke bao Mileka a ba tsoaletseng Nakore, moena oa Aborahama. 24Mosali oa hae oa lefielo, ea bitsoang Reuma, le eena a tsoala Teba, le Gahame, le Tahashe, le Maaka.”
