TŠIMOLOHO 26

₁Tlala ea e-ba teng naheng eo, ntle ho tlala e kileng ea e-ba teng pele, mehleng ea Aborahama. Eaba Isaka o ea Gerare, ho Abimeleke khosi ea Bafilesita. ₂Morena a iponahatsa ho eena, a re: “U se ke ua theohela Egepeta; u mpe u e'o aha naheng eo ke tla u laela eona. ₃Jaka naheng eo, 'me ke tla ba le uena, ke u hlohonolofatse, hobane uena le litlōhōlō tsa hao ke tla le nea linaha tsena tsohle. Ke tla tiisa kano eo ke neng ke e hlapanyetse ntat'ao Aborahama. ₄Ke tla ngatafatsa litlōhōlō tsa hao joaloka linaleli tsa leholimo, 'me linaha tsena tsohle ke tla li nea litlōhōlō tsa hao. Lichaba tsohle tsa lefatše li tla hlohonolofala ka litlōhōlō tsa hao; ₅kaha Aborahama o ile a 'mamela, a bōlōka litsela tsa ka, le litaelo tsa ka, le litemoso tsa ka, le melao ea ka.”

₆Eaba Isaka o aha Gerare. ₇Ha batho ba sebaka seo ba 'motsa ka mosali oa hae, a re: “Ke khaitseli ea ka,” hobane o ne a tšaba ho re: “Ke mosali oa ka,” esere banna ba sebaka seo ba 'molaea ka baka la Rebeka, hobane Rebeka o ne a le motle haholo.

₈Ha Isaka a se a ahile moo litšiu tse teletsana, Abimeleke, khosi ea Bafilesita, a talima ka fesetere, 'me a bona Isaka a ntse a phatha-phathatsana le Rebeka, mosali oa hae. ₉Eaba Abimeleke o bitsa Isaka, o re: “Ha ke re eo ke mosali oa hao? Ke hobane'ng ha u ile ua re ke khaitseli ea hao?”

Isaka a mo araba, a re: “Ke hobane ke ile ka nahana hore mohlomong ka baka la hae ke tla tšoha ke bolaoa.”

₁₀Abimeleke a re ho eena: “Ke eng ee, eo u e entseng ho rōna? E mong oa batho bana a ka be a ile a kena likobong tsa mosali oa hao, 'me u ka be u entse hore re be molato.”

₁₁Joale Abimeleke a bolella batho ba hae, a re: “Mang kapa mang ea ka amang monna enoa, kapa mosali oa hae, o tla bolaoa.”

₁₂Isaka a lema naheng eo, 'me ka sona selemo seo a kotula halekholo. Morena a mo hlohonolofatsa, ₁₃'me ea e-ba morui, a 'na a tsoela pele ho atleha, ho fihlela e e-ba morui e moholo ka ho fetisisa. ₁₄A ba le mehlape ea linku le ea likhomo, le bahlanka ba bangata, hoo Bafilesita ba ileng ba mo hōnōhela. ₁₅Liliba tsohle tseo bahlanka ba ntat'ae ba neng ba ile ba li cheka mehleng ea ntat'ae Aborahama, Bafilesita ba ne ba ile ba li kata ka mobu.

₁₆Joale Abimeleke a re ho Isaka: “Tloha har'a rōna, hobane u matla ho re feta.”

₁₇Eaba Isaka o tloha moo, o ea hloma khohlong ea Gerare, 'me a aha teng. ₁₈Isaka a boela a cheka liliba tse ileng tsa chekoa mehleng ea ntat'ae Aborahama. Bafilesita ba ne ba ile ba li kata kamora' lefu la Aborahama, 'me a li rea mabitso ao ntat'ae a neng a li reile 'ona.

₁₉Bahlanka ba Isaka ba cheka ka khohlong, 'me ba fumana seliba sa metsi a tsapolang. ₂₀Balisana ba Gerare ba tsekisana le ba Isaka, ba re: “Metsi ana ke a rōna!” Eaba seliba seo o se rea lebitso la Eseke, hobane ba ne ba se tsekisane le eena. ₂₁Ba boela ba cheka seliba se seng, 'me le seo ba se tsekisana; sona a se rea lebitso la Sitena. ₂₂A falla moo, a cheka seliba se seng hape, empa sena ba se ke ba hlola ba se tsekisana, 'me sona a se rea lebitso la Rehobote, a re: “Joale Morena o re file sebaka, 'me re tla ngatafala naheng ena.”

₂₃Ho tloha moo a nyoloha, a ea Beeresheba. ₂₄Ka bona bosiu boo, Morena a iponahatsa ho eena, a re: “Ke 'na Molimo oa ntat'ao Aborahama. Se tšabe letho, hobane ke na le uena. Ke tla u hlohonolofatsa, ke ngatafatse litlōhōlō tsa hao, ka baka la Aborahama, mohlanka oa ka.”

₂₅Eaba o haha aletare moo, 'me a rapela Morena, a hloma tente ea hae moo. Hona moo bahlanka ba Isaka ba cheka seliba.

₂₆Abimeleke, a e-tsoa Gerare, a e-na le motsoalle oa hae Ahusate, le Pikole molaoli oa mabōtho a hae, a ea ho Isaka. ₂₇Isaka a re ho bona: “Ke ka baka la'ng le tlileng ho 'na, ha le ntlhoile tjee, le bile le ntelekile ha lōna?”

₂₈Ba mo araba, ba re: “Re bone hantle hore Morena o na le uena; eaba re re: Ha ho ke ho be le kano pakeng tsa rōna le uena, re etse selekane le uena. ₂₉U ke ke ua re etsa hampe, joalokaha le rōna re sa ka ra u etsa hampe. Ha ho letho leo re le entseng ho uena, haese botle feela, 'me re bile re u ntšitse ka khotso. Joale u ea hlohonolofalitsoeng ke Morena.”

₃₀A ba etsetsa mokete, 'me ba e-ja, ba e-noa. ₃₁Ba tsoha ka malungoa-lungoana, ba hlapanyetsana, 'me Isaka a ba lokolla, ba tloha ho eena ka khotso.

₃₂Ka lona letsatsi leo bahlanka ba Isaka ba tla ho eena, ba 'molella ka seliba seo ba se chekileng, 'me ba re ho eena: “Re fumane metsi.” ₃₃Seliba seo a se bitsa Sheba; ka baka leo, motse oo o bitsoa Beeresheba le kajeno.

₃₄Ha Esau a e-na le lilemo tse mashome a mane, a nyala Jehudite, morali oa Beeri oa Mohete, le Basemate, morali oa Elone oa Mohete. ₃₅Basali bana ba sulafaletsa Rebeka le Isaka bophelo.