TŠIMOLOHO 45

₁Josefa a sitoa ho itiisa ha a le kapele ho bohle ba neng ba eme pel'a hae, 'me a phahamisa lentsoe, a re: “Ntšetsang batho bohle kantle!” Ho ne ho se motho pel'a hae, ha Josefa a itsebisa bana babo. ₂Eaba o bokolla, hoo Baegepeta ba bileng ba utloa, le ba lelapa la Faro ba ba ba utloela taba eo.

₃Josefa a re ho bana babo: “Ke 'na Josefa; na ntate o sa phela?” Empa bana babo ba sitoa ho mo arabela, hobane ba ne ba tšohile ha ba bona hore oa phela.

₄Kahoo Josefa a re ho bana babo: “Atamelang ho 'na hle!” Eaba baa atamela, 'me a re ho bona: “Ke 'na Josefa, ngoan'abo lōna, eo le neng le mo rekise Egepeta. ₅Le se ke la itšoabela, leha e le ho ikhalefela, kahobane le nthekisitse mona. Molimo o ntlisitse mona pele ho lōna, hore bophelo bo tle bo bōlōkehe. ₆Tlala e se e aparetse naha ka lilemo tsena tse peli, empa ho sa na le lilemo tse hlano, tseo ka tsona ho sa tl'o lengoa le ho kotuloa. ₇Molimo o nthōmetse mona pele ho lōna, hore le be le litlōhōlō naheng ena, le ho le baballa, hore le tle le pholohe le le bangata.

₈“Hase lōna le nthōmetseng mona, empa ke Molimo. O nkentse moeletsi oa Faro, le morena oa lelapa lohle la hae, le 'musi oa naha eohle ea Egepeta. ₉Potlakang, le nyolohele ho ntate, le re ho eena: ‘Mora oa hao Josefa o re Molimo o nkentse 'musi oa Egepeta eohle; theohela ho 'na, u se ke ua lieha. ₁₀U tla jaka seterekeng sa Goshene, u tl'u be haufi le 'na, uena le bara ba hao, le litlōhōlō tsa hao, le mehlape ea hao ea linku le ea likhomo, le tsohle tseo u nang le tsona. ₁₁Ke tla u baballa teng, hobane ho sa tla lilemo tse hlano tsa tlala, esere mohlomong uena, le ba lelapa la hao, le tsohle tseo u nang le tsona, la futsaneha.’

₁₂“Joale lea mpona, le mahlo a moen'a ka Benjamine aa bona hore ke molomo oa ka o buang le lōna. ₁₃Tsebisang ntate hlompho eohle eo ke nang le eona mona Egepeta, le tsohle tseo le li boneng. Potlakang, le theolele ntate koano.”

₁₄Eaba o kopa moen'a hae Benjamine ka molala, oa lla; le meokho ea Benjamine ea tšolohela molaleng oa ngoan'abo. ₁₅A aka bana babo kaofela, a lla. Kamora' tseo bana babo ba qoqa le eena.

₁₆Ha ho boleloa tlung ea Faro, ho thoe: “Bana babo Josefa ba fihlile,” Faro a thaba, le bahlanka ba hae ba thaba. ₁₇Eaba Faro o re ho Josefa: “E-re ho bana beno: ‘Etsang tjena: bofang lipelesa tsa lōna, le khutlele naheng ea Kanana. ₁₈Le late ntat'a lōna le ba malapa a lōna, le tle ho 'na, 'me ke tla le nea moo naha ea Egepeta e nonneng teng, le je mafureng a naha.’

₁₉“Ba laele hape, u re: ‘Etsang tjena: Nkang makoloi mona Egepeta, le e'o lata bana ba lōna le basali ba lōna; le nke le ntat'a lōna, le tle koano. ₂₀Se lleleng thepa ea lōna e salang, hobane tse molemo tsa naha eohle ea Egepeta ke tsa lōna.’ ”

₂₁Bara ba Iseraele ba etsa joalo. Josefa a ba nea makoloi ho ea ka taelo ea Faro, a ba nea le mofao. ₂₂Bohle a ba nea liaparo tse ncha, empa Benjamine eena a mo nea silefera e ka etsang boima ba likilo tse tharo le halofo, le mefuta e mehlano ea liaparo tse ncha. ₂₃Ho ntat'ae a rōmela tsena: litonki tse leshome, tse bofileng lintho tsa bohlokoa tsa Egepeta; le litonki tse leshome, tse tšehali, tse bofileng koro, le bohobe, le mofao oa ntat'ae. ₂₄Joale a re bana babo ba tsamaee, 'me ba tsamaea. A re ho bona: “Le se ka la qabana ha le le tseleng.”

₂₅Ba nyoloha Egepeta, ba ea fihla naheng ea Kanana, ho ntat'a bona Jakobo. ₂₆Ba 'molella, ba re: “Josefa o ntse a phela, ke eena 'musi oa naha eohle ea Egepeta.” Jakobo a sitoa ho bua, hobane o ne a sa kholoe. ₂₇Empa eitse ha ba 'molella lipolelo tsohle tseo Josefa a li buileng ho bona, le ha a bona makoloi a rōmetsoeng ke Josefa ho tla mo lata, a tsoha molota.

₂₈Eaba Iseraele o re: “Ho lekane; mora oa ka Josefa o ntse a phela. Ke tla ea, ke e'o 'mona ke e-s'o shoe.”