TŠIMOLOHO 46

₁Eaba Iseraele oa falla, o nka tsohle tseo a nang le tsona, 'me ha a fihla Beeresheba, a etsetsa Molimo oa ntat'ae Isaka mahlabelo.

₂Molimo a bua le Iseraele ka pono, bosiu, a re: “Jakobo! Jakobo!”

Eena a re: “Ke 'na enoa!”

₃Molimo a re: “Ke 'na Molimo, Molimo oa ntat'ao. U se ke ua tšaba ho theohela Egepeta, hobane ke moo ke tla u etsa sechaba se seholo. ₄'Na ke tla theoha le uena ho ea Egepeta; ke u tiisetsa hore ke tla boela ke u khutlisa, 'me Josefa o tla koala mahlo a hao mohla u shoang.”

₅Joale Jakobo a tloha Beeresheba, 'me bara ba Iseraele ba palamisa Jakobo ntat'a bona, le bana ba bona, le basali ba bona makoloing ao Faro a neng a a rōmetse ho mo lata. ₆Ba khanna mehlape ea bona, ba nka le thepa eo ba e sebelitseng ha ba le naheng ea Kanana, ba ea fihla Egepeta, e le Jakobo le bohle ba lelōko la hae: ₇Bara ba hae, le bara ba bara ba hae; barali ba hae, le barali ba bara ba hae. Lelōko la hae lohle a tla le lona Egepeta.

₈Ana ke mabitso a bara ba Iseraele ba tlileng Egepeta, e leng Jakobo le bara ba hae. Ke Rubene, letsibolo la Jakobo; ₉le bara ba Rubene: Hanoke, le Palō, le Heserone, le Karimi.

₁₀Bara ba Simeone: Jemuele, le Jamine, le Ohade, le Jakine, le Sohara, le Shaule, mora oa mosali oa hae oa Mokanana.

₁₁Bara ba Levi: Gereshone, le Kohate, le Merari.

₁₂Bara ba Juda: Ere, le Onane, le Shela, le Perese, le Sera. Ere le Onane ba ile ba shoela naheng ea Kanana. Bara ba Perese e ne e le Heserone le Hamule.

₁₃Bara ba Isakare: Tola, le Pua, le Jobo, le Shimerone.

₁₄Bara ba Sebulone: Serede, le Elone, le Jahaleele.

₁₅Bana ke bara ba Lea, bao a ba tsoaletseng Jakobo ha ba le Padane-Arame, hammoho le morali oa hae Dina. Bara le barali ba hae bohle ba bile mashome a mararo a metso e meraro.

₁₆Bara ba Gade: Sifeone, le Hagi, le Shuni, le Esebone, le Eri, le Arode, le Arele.

₁₇Bara ba Ashere: Jimena, le Jishefa, le Jishefi, le Beria, le khaitseli ea bona Sera.

Bara ba Beria: Hebere le Malekiele.

₁₈Bana ke bara ba Silepa, eo Labane a neng a mo nee morali oa hae Lea. Silepa a tsoalla Jakobo bana ba leshome le metso e tšeletseng.

₁₉Bara ba Ragele, mosali oa Jakobo, ke Josefa le Benjamine. ₂₀Bara ba Josefa, bao Asenate, morali oa Potifera, moprista oa One, a neng a mo tsoalle bona naheng ea Egepeta, ke Manase le Efraime.

₂₁Bara ba Benjamine ke Bela, le Bekere, le Ashebele, le Gera, le Naamane, le Ehi, le Roshe, le Mupime, le Hupime, le Arada.

₂₂Bana ke bara bao Ragele a ba tsoaletseng Jakobo. Kaofela ha bona ke batho ba leshome le metso e mene.

₂₃Mora oa Dane ke Hushime.

₂₄Bara ba Nafthali ke Jaheseele, le Guni, le Jesere, le Shileme.

₂₅Bana ke bara ba Bileha, eo Labane a neng a mo nee morali oa hae Ragele. Bileha a tsoalla Jakobo bana. Kaofela ha bona ke batho ba supileng.

₂₆Batho bohle ba ileng ba ea Egepeta le Jakobo, ba lelōko la hae, ho sa baloe basali ba bara ba hae, e bile batho ba mashome a tšeletseng a metso e tšeletseng.

₂₇Bara ba Josefa, ba tsoaletsoeng Egepeta, ba ne ba le babeli; ba lelapa la Jakobo ba ileng ba tla Egepeta e bile batho ba mashome a supileng.

₂₈Jakobo a rōma Juda ho mo etella pele, ho ea tsebisa Josefa hore a ee Goshene, 'me ba fihla seterekeng sa Goshene. ₂₉Josefa a pana kariki ea hae, a nyolohela Goshene ho ea teana le ntat'ae. Hang ha ba kopana, a mo kopa molaleng, a llela ho eena halelele.

₃₀Iseraele a re ho Josefa: “Joale nka shoa, hobane ke bona sefahleho sa hao u sa phela.”

₃₁Josefa a re ho bana babo, le ho ba lelapa la ntat'ae: “Ke tla nyoloha, ke e'o tsebisa Faro, ke re ho eena: ‘Ntate le bana beso, le ba lelapa la hae, ba tsoang naheng ea Kanana, ba tlile ho 'na. ₃₂Banna bao ke balisa ba mehlape, hobane haesale ba ruile liphoofolo, 'me ba tlile le mehlape ea bona ea linku le ea likhomo, le tsohle tseo ba nang le tsona.’ ₃₃Ha Faro a le bitsa, 'me a le botsa, a re: ‘Mosebetsi oa lōna ke ofe?’ ₃₄le tle le re: ‘Haesale bahlanka ba hao e le balisa, ho tloha bocheng ba bona, ho fihlela kajeno, rōna le bontat'a rōna,’ e le hore le tle le jake seterekeng sa Goshene, hobane Baegepeta ba khesa balisana bohle.”