Bokhopo ba batho
1Ha batho ba qala ho ata lefatšeng, 'me ba tsoala barali, 2bara ba Molimo ba bona hore barali ba batho ba batle, 'me ba inkela basali kamoo ba ka khahloang kateng. 3Eaba Morena o re: “Moea oa ka o ke ke oa hlola ka ho motho kamehla eohle, hobane motho ke nama feela. Litšiu tsa hae e tla ba lilemo tse lekholo le mashome a mabeli.”
4Ka eona nako eo, le kamora' moo, liqhobane tsa e-ba teng lefatšeng, ha bara ba Molimo ba bōkana le barali ba batho, ba tsoala bana le bona. Bana bao ke tsona linatla tsa boholo-holo tse tumileng haholo.
Ho eletsoa ka tsa morallo oa metsi
5Joale Morena a bona hore bokhopo ba batho lefatšeng bo boholo haholo, le hore mehopolo ea lipelo tsa bona e tletse bobe kamehla. 6Morena a soaba ha a ile a etsa motho lefatšeng, pelo ea hae ea utloa bohlōkō. 7Eaba Morena o re: “Batho bao ke ba bōpileng ke tla ba felisa lefatšeng; batho, 'moho le liphoofolo, le lihahabi, le linonyana tse fofang, hobane kea itšoabela ha ke ile ka ba etsa.” 8Empa Nōoe eena a hauheloa ke Morena.
9Tsena ke litaba tsa Nōoe. Nōoe e ne e le motho ea lokileng, ea neng a hloka koli har'a ba mehla eo, 'me metsamao ea hae ea khahla Molimo.
10A tsoala bara ba bararo: Sema, le Kama, le Jafeta.
11Mahlong a Molimo lefatše le ne le bolile, le tletse lipolaeano. 12Molimo a bona hore lefatše le bolile, batho bohle ba itšilafalitse. 13Joale Molimo a re ho Nōoe: “Ke rerile ho felisa tsohle tse phelang lefatšeng, hobane lefatše le tletse lipolaeano ka baka la batho; ke tla ba timetsa 'moho le lefatše.
14“Iketsetse areka ka lifate tsa phaena, o e etse likamore, 'me o e bitiele ka bōka kantle le kahare. 15O tla e haha tjena: bolelele ba areka e be limethara tse lekholo le mashome a mararo a metso e meraro, bophara ba eona e be limethara tse mashome a mabeli a metso e 'meli, 'me bophahamo ba eona e be limethara tse leshome le metso e meraro. 16Areka eo o e etsetse fesetere e tla kenya leseli, 'me pakeng tsa eona le marulelo e be bolelele ba lisenthimethara tse mashome a mane a metso e mene; monyako oa areka o etsoe lehlakoreng la eona. Ho be le likamore tse katlase, tse hare, le tse kaholimo.
17“Ke tla tlisa morallo oa metsi ho koahela lefatše, ho timetsa tsohle tse phelang, tse tlas'a leholimo. Tsohle tse lefatšeng li tla timela. 18Empa uena ke tla etsa selekane le uena. U tla kena ka arekeng, uena le bara ba hao, le mosali oa hao, le lingoetsi tsa hao. 19U tla kena ka arekeng le liphoofolo tsohle tse phelang, tse peli mofuteng o mong le o mong, e be e tona le e tšehali, li tle li phele 'moho le uena. 20Linonyana ka mefuta ea tsona, le liphoofolo ka mefuta ea tsona, le lihahabi ka mefuta ea tsona, li kene le uena ka arekeng ka bobeli, li tle li phele. 21U bōkelle lijo tsohle tse tla jeoa, u li kenye ka arekeng, e tle e be lijo tsa hao le tsa liphoofolo.”
22Nōoe a etsa joalo; a etsa joalokaha Molimo a ne a mo laetse.
