HABAKUKE 1

₂Oho, Morena, ke tla kōpa thuso

ho fihlela neng,

empa uena u sa 'mamele?

Ke ipiletse ho uena,

ke re: “Likhōka!”

empa uena u sa mpholose?

₃U etsetsa'ng

hore ke bone mahlomola,

ke bone tšenyeho,

le likhōka ke li bone?

Kahohle ke lintoa

le litsekisano feela.

₄Ka lebaka lena,

molao o nyehlisitsoe,

toka le eona ha e phethahatsoe.

Ba lokileng

ba qhekanyetsoa ke ba khopo,

ka hona kahlōlo li etsoa

li sokamisitsoe.

₅“Talima lichaba, u ke u lebelle;

ak'u makale, u be u hlolloe.

Ke etsa ho hong

mehleng ena ea hao,

ke etsa hoo

u neng u ke ke ua ho lumela

leha u ne u ka ba ua ho bolelloa.

₆Bona he,

joale ke tsosa Bakalatiea,

chaba sane se bohale, se lehala,

se thalatsang kahohle le lefatše,

ho ikhapela metse

eo e seng ea sona.

₇Ke sechaba se tšabehang,

chaba se sehlōhō;

melao ea sona,

le eona tlōtla ea sona,

ke tse iketselitsoeng

ke sona ka bosona.

₈Pere tsa sona

li lebelo ho feta mangau,

li bohale

ho feta liphiri ka phirimana;

bapalami ba li khemisa,

ba li khemisa lekharakhara,

bapalami ha ba tsoe mona le mona,

ba fōfa sa letlaka le ubella sefifi.

₉Bohle ba futuha

ba kalatisaka likhōka,

mabōtho a bona a fiela sa moea,

a fiela sa moea oa lehoatata;

bathōpuoa ba bona ba bangata,

ba bangata sa lehlabathe la leoatle.

₁₀Likhosi baa li soma,

babusi baa ba teōla;

liqhobosheane tsohle

tsona baa li tella,

ba haha metero ea mobu,

ba hape metse.

₁₁Ba fefōla sa moea o fōka,

o ba o feta,

ba fefōla joalo, ebe baa ikela;

banna bana ke banna ba sehlōhō,

matla ke 'ona molimo oa bona.”

₁₂Oho, Morena, u bile teng

pele le ho tlholeho!

U Molimo oa ka,

u Ea Halalelang oa ka!

U Molimo oa ka,

Molimo ea sa shoeng.

Oho, Morena,

u ba khethetse ho phetha kahlōlo.

Oho, Lefika la ka,

u ba reretse ho re khalema.

₁₃Mahlo a hao

a halalela ka ho fetisa,

a halalela hoo

a ke ke a talima bokhopo.

Liphoso le tsona

ha u k'u li mamella.

Joale ho ea ka'ng

ha u mamella balotsana?

U khutselitse'ng

ha ba khopo ba timetsa batho,

ba ba fetang ka ho loka?

₁₄U tšoantšitse batho

le tsa leoatle litlhapi,

le libōpuoa tse lèlèmèlang

li se na 'musi.

₁₅Tsohle li tšoasoa ka lilope,

li tšoasoa ke sera,

se be se li tšoase

ka letlōoa la sona,

se nt'o li hula

ka seketsoana sa sona,

se etse litlatse tsa nyakallo

ha se tšoasitse.

₁₆Kahoo se etsetsa

letlōoa la sona mahlabelo,

liketsoana le tsona

li chesetsoe mokubetso,

hoba ke ka tsena

se phelang ka boiketlo,

le lijo tsa sona

ke limènyèmènyè.

₁₇Na sera se tla 'ne

se tsomule sabole,

se 'ne se harinye lichaba

ho se mohau?