Taelo ea ho tsosa Tempele
1Ka letsatsi la pele la khoeli ea botšelela, ka selemo sa bobeli sa puso ea khosi Dariuse, lentsoe la Morena la fihla ka moporofeta Hagai ho Serubabele, mora oa Shealetiele, 'musisi oa Juda; le ho Joshua, mora oa Jehosadake, Moprista e Moholo, la re:
2Morena oa mabōtho o bua tjena: “Sechaba sena se re: ‘'Nako ea ho tsosa Tempele ea Morena ha e e-s'o fihle!’ ”
3Eaba Morena o bua ka molomo oa moporofeta Hagai, o re: 4“Na ee ke eona nako ea hore lōna le lule matlung a khabisitsoeng, ha Tempele ee eona e ntse e le lithako?”
5Ka baka leo, Morena oa mabōtho o re: “Itekoleng he! 6Le jetse haholo, empa la kotula hanyenyane; lea ja, empa ha le khōre; lea noa, empa ha le kholoe; lea apara, empa ha le futhumale; le ea amohelang moputso, moputso oo ha o mo thuse ka letho.”
7Morena oa mabōtho o re: “Itekoleng he! 8Hloellang lithabeng, le rèmè lifate, le tl'o tsosa Tempele e tla nkhotsofatsa, 'me kahoo ke tlotlisoe,” ho rialo Morena.
9“Le ne le lebeletse chai e ngata, empa bonang! le kotutse hanyenyane feela. Kotulo eo le e tlisitseng hae, ke ile ka e senya. Ke ka lebaka la'ng ke entseng joalo?” ho rialo Morena oa mabōtho. “Ke entse joalo ka baka la Tempele ea ka, e ntseng e le lithako, athe e mong le e mong oa lōna eena o thahasella ntlo eo e leng ea hae. 10Ke ka baka leo leholimo le sa le nesetsang pula, le lefatše le sa le melisetsang lijo. 11Ke omelelitse naha, le lithaba, le masimo a koro, le a morara, le a mohloaare, le tsohle tse melisoang ke mobu; ka bolaisa batho le liphoofolo lenyora, le mesebetsi eohle ea matsoho a batho ka e nyōpisa.”
Sechaba se mamela taelo ea Morena
12Eaba Serubabele, mora oa Shealetiele, le Joshua, mora oa Jehosadake, Moprista e Moholo, le masalla 'ohle a sechaba, ba mamela lentsoe la Morena Molimo oa bona, le molaetsa oa moporofeta Hagai, hobane a ne a rōnngoe ke Morena Molimo oa bona. Sechaba sa tšaba Morena haholo.
13Joale Hagai, leqōsa la Morena, a phatlalletsa sechaba molaetsa oa Morena, a re: “Ke na le lōna,” ho rialo Morena. 14Morena a susumetsa Serubabele, mora oa Shealetiele, 'musisi oa Juda; a susumetsa le Joshua, mora oa Jehosadake, Moprista e Moholo, le masalla 'ohle a sechaba. Eaba baa tla, ba qala ho haha Tempele ea Morena oa mabōtho, Molimo oa bona. 15Tsena li etsahetse ka la mashome a mabeli a metso e mene la khoeli ea botšelela, ka selemo sa bobeli sa puso ea khosi Dariuse.
