1Molao oa Moshe e bile seriti feela sa tse molemo tse tlang ho tla, e seng setšoantšo sa 'nete sa lintho tseo. Ka mahlabelo 'ona ao, a nyeheloang ka selemo le selemo ho-ea-ho-ile, Molao ha o ka ke oa etsa hore ba nyehelang ka 'ona ba phethehe. 2Ho seng joalo, batho ba ka be ba khaolitse ho nyehela ka mahlabelo ao, hobane barapeli, ha ba ne ba se ba kile ba hloekisoa hanngoe, ba ne ba ke ke ba hlola ba e-ba le letsoalo. 3Empa mahlabelo ao a hopotsa batho libe tsa bona ka selemo le selemo; 4etsoe mali a lipoho le a liphooko ha a ka ke a tlosa libe.
5Ka baka leo, ha Kreste a e-tla lefatšeng, a na a re:
“Sehlabelo le nyehelo ha u li batle,
feela u ntōkiselitse 'mele.
6Licheso le mahlabelo
ka baka la libe
ha li u khahlise.
7Eaba ke re:
Bona, ke 'na enoa,
eo ho ngotsoeng ka eena
bukeng ea Molao.
Ke tlile, Molimo,
ho phetha thato ea hao.”
8O qalile ka ho re: “Mahlabelo, le linyehelo, le licheso, le mahlabelo ka baka la libe, ha u li batle, ha li u khahlise,” leha li nyeheloa ho ea ka Molao. 9Eaba o re: “Bona, ke 'na enoa, ke tlile ho phetha thato ea hao.” Ka hona Molimo o felisa bosebeletsi ba pele, hore a hlome bo bocha. 10Ke ka thato eo re halalelitsoeng ka nyehelo ea 'mele oa Jesu Kreste, e entsoeng hanngoe feela.
11Ka matsatsi 'ohle moprista e mong le e mong o phetha tsa tšebeletso, 'me o nyehela hangata ka 'ona mahlabelo ana, ao ho hang a ke keng a tlosa libe. 12Empa Kreste, hoba a nyehele hanngoe ka sehlabelo ka baka la libe, a ea lula ka letsohong le letona la Molimo, ka mehla eohle, 13'me joale o lebeletse hore lira tsa hae li etsoe bonamelo ba maoto a hae. 14Ka ho inyehela hanngoe feela o ile a etsa hore bao a ba halalelitseng ba phethehe ka mehla eohle.
15Le Moea o Halalelang oa re pakela, hobane o qalile ka ho re:
16“Selekane seo ke tla se etsa le bona
ha matsatsi ao a fetile,
ho rialo Morena, ke sena:
Ke tla kenya molao oa ka
maikutlong a bona,
kahar'a lipelo tsa bona.”
17Hape oa re:
“Ha nka ke ka hlola
ke hopola libe tsa bona
le bokhopo ba bona.”
18Joale moo tšoarelo e seng e le teng, nyehelo e etsoang ka baka la libe ha e sa hlokahala.
Khothatso le keletso
19Bana beso, re na le tšepo e tiileng ea ho kena ka Sehalalelong ka mali a Jesu. 20Re na le tsela e ncha, e phelang, eo a re buletseng eona ka ho phunyeletsa lesira, e leng botho ba hae. 21Re na le Moprista ea Phahameng, ea okametseng ba ntlo ea Molimo. 22Kahoo a re atameleng ka lipelo tse tšepahalang, le ka tumelo e tletseng, re hloekisitsoe lipelo ho khutsisa matsoalo a rōna, re hlatsoitsoe 'mele ka metsi a hloekileng. 23A re tiisetseng ho bolela tšepo ea rōna re sa thekesele, hobane ea re tšepisitseng oa tšepahala. 24A re hlokomelaneng, 'me re khothaletsaneng leratong le mesebetsing e metle. 25Re se ke ra furalla liphutheho tsa rōna, joalokaha ba bang ba tloaetse. Empa re khothatsane, haholo-holo kaha lea bona hore Letsatsi la Morena le ntse le atamela.
26Ha re etsa libe ka boomo, empa re se re fumane tsebo ea 'nete, ha ho sa na sehlabelo se ka tlosang libe tseo; 27ho tla sala tebello e tšabehang ea kahlōlo, le khabō ea mollo e tla timetsa bahanyetsi. 28Ha motho a sa bōlōke Molao oa Moshe, o ne a bolaoa ka bopaki ba lipaki tse peli kapa tse tharo, ho se mohau. 29Ha le nahana, kotlo e tla ba boima hakaakang, e lokelang ea hataketseng Mora oa Molimo, ea tlontlolotseng mali a selekane ao a hloekisitsoeng ka 'ona, ea nyefotseng Moea oa Molimo o mohau! 30Etsoe re tseba ea itseng:
“Phetetso ke ea ka,
ke 'na ea tla lefeletsa.”
Hape o itse:
“Morena o tla ahlōla
sechaba sa hae.”
31Ke ntho e tšabehang ho oela liatleng tsa Molimo ea phelang.
32Hopolang litšiu tse fetileng, tseo eitseng hoba le qale ho bona leseli ka tsona, le ileng la tiisetsa ntoeng e boima, e bohlōkō. 33Ka nako e 'ngoe le ile la fetoloa se-bonoang-se-bonoa-ke-bohle ka ho hlapaoloa le ka ho hlorisoa; ka nako e 'ngoe la etsoa balekane ba ba etsoang tse joalo. 34Le ile la utloela batlamuoa bohlōkō; la lumela ho amohuoa maruo a lōna le thabile, le ntse le tseba hore le na le leruo le leng le molemo ho feta, le sa senyeheng.
35Joale le se ke la lahleheloa ke tšepo eo ea lōna, e nang le moputso o moholo. 36Le sa hloka mamello, e le hore, ka ho phetha thato ea Molimo, le tle le amohele seo le se tšepisitsoeng, 37hobane kamora' nakoana:
“Ea tšoanetseng ho tla o tla tla,
a ke ke a lieha.
38Ea lokileng o tla phela ka tumelo,
empa ha a ka ikhula,
ha a sa tla nkhahlisa.”
39Ha e le rōna, ha re ba ka ikhulang, 'me ra ea timelong, empa re ba lumelang, hore re tle re ee pholohong.
