1Joale a re tloheleng thuto eo ho qaloang ka eona ea Kreste, re fetele pele ho tse phethehileng, tsa batho ba baholo. Re se ke ra boela ra khutlela mothèong: E leng ho furalla mesebetsi e isang timelong, ho lumela ho Molimo, 2ho rutoa tsa likolobetso, pèo ea matsoho, tsoho ea bafu le kahlōlo e sa feleng. 3Ha Molimo a re lumella, re tla etsa joalo.
4Ba kileng ba bontšoa leseli, ba latsoa nèo ea leholimo, ba abeloa Moea o Halalelang, 5ba latsoa lentsoe le monate la Molimo, le matla a lefatše le tlang ho tla, 6ho ke ke ha etsahala hore bao, ha ba ka koeneha, ba boele ba nchafatsoe ka pako. Ke ba boetseng ba thakhisa Mora oa Molimo ka bobona, 'me ba mo etsa sekhobo.
7Tšimo e montseng pula e atisang ho e nela, e melisetsang ba e lemang tse molemo, e hlohonofatsoa ke Molimo. 8Empa e melisang meutloa le tšehlo ha e na thuso, e se e atametse thōhako, 'me e tla qetella e chesitsoe.
9Baratuoa, leha re bua joalo, re kholisehile hore lōna le boemong bo botle ba ho pholosoa. 10Molimo ha a hloke toka hoo a ka lebalang mosebetsi oa lōna, le lerato leo le le bontšitseng ho eena ka ho sebeletsa balumeli, bao le sa ntseng le ba sebeletsa le joale. 11Re lakatsa ha e mong le e mong oa lōna a ka bontša mafōlōfōlō 'ona ao, a etsang hore tšepo ea lōna e phethehe ho fihlela qetellong. 12Le se ke la tepella, le mpe le etsise bao, bao ka tumelo le mamello, ba jang lefa la tseo ba li tšepisitsoeng.
Tšepiso e tiileng ea Molimo
13Molimo, kaha ho se e mong e moholo ho mo feta hore a hlapanye ka eena, o ile a ikana ka boeena mohla a etsetsang Aborahama tšepiso, 14a re: “Ruri ke tla u hlohonolofatsa haholo, le litlōhōlō tsa hao ke li ngatafatse.” 15Aborahama o ile a tiisetsa, 'me ka hona a fumana seo a se tšepisitsoeng.
16Etsoe batho ba hlapanya ka e moholo ho ba feta, 'me likhang tsohle tsa bona li felisoa ka ho ikana. 17Ke moo Molimo a tiisitseng ka kano, kaha a ne a rata ho bontša kahohle-hohle majalefa a litšepiso hore morero oa hae ha o fetohe. 18E bile hore ka ketso tseo tse peli, tse ke keng tsa fetoha, tseo ka tsona Molimo a ke keng a thetsa, rōna ba tšabetseng ho eena re khothale ka matla, ho itšoarella tšepong eo re e neiloeng. 19Tšepo eo re na le eona joaloka sengaparela sa moea, se tiileng e le kannete. Tšepo eo e kenella kahare ho lesira, 20moo Jesu, moetellipele oa rōna, a keneng teng e le Moprista e Moholo ka ho sa feleng joaloka Meleki-Sedeke.
