Sehalalelo sa lefatše le sa leholimo
1Selekane sa pele se ne se e-na le melao ea tšebeletso, le tempele eo e leng ea lefatše. 2Ho ile ha hlongoa Tente, eo karolo ea eona ea pele e neng e bitsoa Sehalalelo. Ka ho sona ho ne ho e-na le seluloana sa mabone, tafole, le bohobe bo halalelang. 3Kamora' lesira la bobeli ho ne ho e-na le karolo ea bobeli ea Tente, e neng e bitsoa Sehalalelo se halalelang ka ho fetisisa. 4Ka ho sona ho ne ho e-na le aletare ea khauta, moo ho neng ho chesetsoa mokubetso teng, le areka ea selekane e apesitsoeng ka khauta, moo ho kentsoeng pitsa ea khauta e tšetseng manna, le lere la Arone le neng le ile la e-ba le lithunthung, le matlapa a mabeli ao ho ngotsoeng mantsoe a selekane ho 'ona. 5Holim'a areka eo ho ne ho e-na le likerubime tse tlōtlehang. Mapheo a tsona a ne a khurumelitse sebaka sa tefelo ea libe. Empa ena hase nako ea ho lokolisa tsena tsohle.
6Ho ea ka litlhophiso tseo, baprista ba kena kamehla karolong ea pele ea Tente ho phetha tsa bosebeletsi ba bona. 7Empa karolong ea bobeli ea Tente ho kena Moprista e Moholo feela, le teng hanngoe ka selemo. O kena a nkile mali oa a nyehelang ka 'ona ho Molimo ka baka la libe tsa hae le tsa batho, tseo ba li entseng ka ho hloka tsebo. 8Ka hona Moea o Halalelang o bontša hore tsela e kenang Sehalalelong se halalelang ka ho fetisisa ha e e-s'o buloe, ha karolo ea pele ea Tente e sa ntsane e le teng. 9Hona ke setšoantšo se supang mehla ea joale: Tenteng eo, ho nyeheloa ka limpho le ka mahlabelo a ke keng a etsa hore ea rapelang a hloekisoe pelo. 10Ke tse amanang le lijo, le lino, le ho itlhatsoa ha mefuta-futa, e leng meetlo ea botho feela, e neng e tla sebetsa ho fihlela Molimo a lokisa lintho bocha.
11Joale Kreste o tlile e le Moprista e Moholo oa tse molemo tse tlang ho tla. Tente eo a sebeletsang ho eona e kholo, 'me e phethehile ho feta ea pele. Ha ea etsoa ke motho, e leng ho re hase ea lefatše lena. 12O kene hanngoe feela Sehalalelong se halalelang ka ho fetisisa, a sa nka mali a liphooko kapa a manamane, empa a nkile mali a hae ka sebele, 'me a re fumanela topollo e sa feleng. 13Haesita mali a liphooko le a lipoho, le molora oa sethojana o fōkoang, tsena li halaletsa batho ba silafetseng ka ho ba hloekisa 'meleng, 14na mali a Kreste ea inyehetseng ho Molimo ka moea oa hae o sa feleng, a se na sekoli, ekaba 'ona a hloekisa hakaakang lipelo tsa rōna mesebetsing e isang timelong, e le hore re tle re sebeletse Molimo ea phelang?
15Ka baka lena, Kreste ke 'moelanyi oa Molimo le batho ka selekane se secha. Ka lefu la hae o lefeletse litšito tseo batho ba neng ba li etse tlas'a selekane sa pele, e le hore ba bitsitsoeng ke Molimo ba tle ba tsebe ho ja lefa le sa feleng, leo ba le tšepisitsoeng.
16Moo ho entsoeng lengolo le abang lefa, eka khona lefu la moetsi oa lona le pakoe. 17Lipallo tsa lengolo le joalo li phethahatsoa feela kamora' lefu; athe ha moetsi oa lona a sa phela, ha le na thuso. 18Kahoo le sona selekane sa pele se theiloe ka mali. 19Moshe o ile a balla sechaba sohle litaelo tsohle ka ho ea ka Molao, a nt'o nka mali a manamane le a liphooko, le metsi, le boea bo bofubelu, le lehlaku la hisopa, a fōka buka ea Molao le batho bohle, 20a re: “Hona ke mali a selekane seo Molimo a le laetseng sona.” 21Eaba o fōka le Tente ka mali, le lintho tsohle tse sebelisoang tšebeletsong. 22Ho ea ka Molao e batla e le tsohle tse hloekisoang ka mali, 'me libe li ke ke tsa tšoareloa ha mali a sa tšolohe.
Sehlabelo sa Kreste se tlosa libe
23Ha e le mona lintho tsena, tse tšoantšang tse maholimong, li hloekisoa ka mokhoa ona, eka khona tsena tsa maholimo tsona li hloekisoe ka mahlabelo a fetang ao. 24Kreste ha aa ka a kena ka Sehalalelong se entsoeng ke batho, e leng setšoantšo feela sa Sehalalelo sa 'nete, empa o kene leholimong la sebele, moo joale a tlang ho hlaha kapele ho Molimo sebakeng sa rōna. 25Moprista e Moholo o kena ka Sehalalelong ka selemo le selemo, a nkile mali ao e seng a hae, empa Kreste ha aa ka a inyehela ka makhetlo a mangata. 26Hoja ho ne ho le joalo, e ne eka khona a hlōkōfatsoe hangata ho tloha tlholehong ea lefatše. Empa o bonahalitsoe hanngoe feela mehleng ena ea qetello, ho felisa sebe ka ho iketsa sehlabelo. 27Batho ba abetsoe ho shoa hanngoe, ba nt'o ahlōloa. 28Ka mokhoa o joalo le Kreste o ile a inyehela hanngoe, ho tlosa libe tsa ba bangata. Mohla a tlang khetlo la bobeli, sebe se se se felisitsoe, o tla iponahatsa ho ba mo lebeletseng hore a ba pholose.
