ESAEA 12

“Oho, Morena, ke tla u boka,

le hoja u ne u nkhalefetse;

khalefo ea hao e khaolitse,

uena u fela u ntšelisitse.

₂Molimo ke mopholosi oa ka,

ke tla mo tšepa,

'me ke se ke ka tšaba;

Morena ke matla a ka,

ke pina ea ka,

Morena o fetohile

mopholosi oa ka.”

₃Le tla ikhella metsi le thabile,

le a khe lilibeng tsa pholoho.

₄Mohl'a tsatsi leo, le tla re:

“Lebohang Morena, le mo rapele,

phatlalatsang mesebetsi ea hae

har'a lichaba,

le bolele hore bitso la hae le leholo.

₅Binelang Morena,

hobane o entse tse tlōtlehang,

tsena le li tsebise lefatše lohle.

₆Hōoeletsang haholo,

le lilietse ka thabo,

le bine lōna baahi ba Sione.

Ea Halalelang oa Iseraele

o moholo har'a lōna.”