Molimo o tla otla Kushe
1Jo! Naha ea kokoanyana
tse bōbōlang,
naha e mose ho linōka tsa Kushe,
2e rōmela maqosa a e-tla ka leoatle,
ka kepe tsa lehlaka
tse sesang metsing!
E-eang baromuoa
ba tsebang ho potlaka,
e-eang chabeng sa batho
ba balelele, ba sōtseng,
chaba se tšajoang hōle le haufi,
chaba se matla, se hatakelang,
seo naha ea sona
e tletsa-tletseng linōka.
3Lōna baahi bohle ba lefatše,
lōna ba ahileng lefatšeng,
talimang ha mokhèlè
o phahamisoa lithabeng,
mamelang ha lenaka le lla.
4Morena o itse ho 'na:
“Ke tla talima
ke le leahong la ka,
ke khutsitse,
sa ha tsatsi le chesa haholo,
sa phoka e lalang ha ho kotuloa.”
5Etlare ho e-s'o kotuloe,
thunthung li se li ponne,
ha tholoana tsa morara
li qala ho bōpeha,
a khaole mahlōmela
ka thipa ea ho faola,
a khaole makala
a qalang ho thathalla.
6Bohle ba tla tlohelloa matlaka
har'a lithaba,
ba tlohelloe
le tsona batana tsa naha;
hlabula matlaka
a tla ja linama tsa bona,
mariha batana tsa naha
li ba harole.
7Ka nako eo Moren'a mabōtho
o tla tlisetsoa limpho
ke ba balelele, ba sōtseng,
ba chaba se tšajoang hōle le haufi,
chaba se matla, se hatakelang,
seo naha ea sona
e tletsa-tletseng linōka;
mpho li tlisoe Thabeng ea Sione,
moo ho khumameloang
Morena mabōtho.
