Molimo o tla sireletsa Jerusalema
1Ho malimabe ba eang Egepeta
ho kōpa thuso,
ba tšepileng lipere
le boieane ba kariki tsa ntoa,
le bapalami ba lipere
hobane e le linatla,
empa ba sa natse
Ea Halalelang oa Iseraele,
ba sa ipiletse ho Morena
ho batla thuso.
2Empa Morena o bohlale,
o tla tlisa koluoa,
a ke ke a fetohela
seo a ileng a se bolela;
malapa a ba khopo
o tla a tsohela matla,
le bathusi ba ba etsang bokhopo
a ba tsohele matla.
3Baegepeta ke batho ba nama,
hase Molimo,
pere tsa bona ke tsa nama,
hase tsa moea.
Ha Morena o otlolla tsoho la hae,
ea thusetsang oa khōthōmetseha,
ea thusetsoang ebe eena oa oa,
bobeli ba bona ebe ba timela.
4Morena o bua tjena ho 'na:
“Ha tau le taoana
li puruma holim'a sefifi,
leha sekhakhatha sa balisana
se ka li futuhela,
li ke ke tsa tšosoa
ke mehoo ea bona,
li ke ke tsa nyarosoa
ke lerata la bona.
Le Moren'a mabōtho
o tla theoha joalo,
ho tla loanela Thabeng ea Sione
le leralleng la eona.
5Joalokaha nonyana
li thathalatsa mapheo,
Moren'a mabōtho
o sireletsa Jerusalema joalo;
o tla e sireletsa a e lopolle,
a fete holim'a eona a e pholose.”
6Lōna Baiseraele, khutlelang ho eo le mo furaletseng haholo. 7Ka letsatsi leo, e mong le e mong o tla furalla melimo ea hae ea bohata, ea silefera le ea khauta, eo a iketselitseng eona ka matsoho a hae a boetsalibe.
8“Baasiria ba tla bolaoa,
ba bolaoe ka sabole e se ea motho,
ba timetsoe ka sabole e se ea motho.
Baasiria ba tla baleha sabole,
bahlankana ba bona
ba sebelisoe ka thata.
9Khosi ea bona e tla baleha
ke ho tšaba,
balaoli ba lahle mekhele ea bona
ke ho tšoha,”
ho rialo Morena
eo mollo oa hae o leng Sione,
eo sebōpi sa hae
se leng Jerusalema.
